[page principale | nouveautés | La Bible | la foi | sujets | études AT | études NT | Index_auteurs-ouvrages-sujets | centres d’intérêt]
TESTAMENTA VAOVAO
Accès direct aux livres
de la Parole : Matthieu, Marc, Luc, Jean, Actes, Romains, 1 Corinthiens, 2 Corinthiens, Galates, Éphésiens, Philippiens, Colossiens,
1 Thessaloniciens, 2 Thessaloniciens,
1 Timothée, 2 Timothée, Tite, Philémon, Hébreux,
Jacques, 1 Pierre, 2 Pierre,
1 Jean, 2 Jean, 3 Jean, Jude, Apocalypse
Accès direct aux
chapitres de Matthieu : 1, 2,
3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27, 28
1 [Ny filazana ny razan'i
Jesosy Kristy] Ny filazana ny razan'i Jesosy Kristy, zanak'i Davida zanak'i
Abrahama.
2 Abrahama niteraka an'i
Isaka; ary Isaka niteraka an'i Jakoba; ary Jakoba niteraka an'i Joda mirahalahy
avy;
3 ary Joda niteraka an'i
Fareza sy Zara tamin'i Tamara; ary Fareza niteraka an'i Hezrona; ary Hezrona
niteraka an-dRama*;
4 ary Rama* niteraka an'i
Aminadaba; ary Aminadaba niteraka an'i Nasona; ary Nasona niteraka an'i
Salmona; [*Gr. Arama]
5 ary Salmona niteraka an'i
Boaza tamin-dRahaba; ary Boaza niteraka an'i Obeda tamin-dRota; ary Obeda
niteraka an'i Jese;
6 ary Jese niteraka an'i
Davida mpanjaka. Ary Davida niteraka an'i Solomona tamin'ny vadin'i Oria;
7 ary Solomona niteraka
an-dRehoboama; ary Rehoboama niteraka an'i Abia; ary Abia niteraka an'i Asa*;
[*Gr. Asafa]
8 ary Asa* niteraka an'i
Josafata; ary Josafata niteraka an'i Jorama; ary Jorama niteraka an'i Ozia;
[*Gr. Asafa]
9 ary Ozia niteraka an'i
Jotama; ary Jotama niteraka an'i Ahaza; ary Ahaza niteraka an'i Hezekia;
10 ary Hezekia niteraka an'i
Manase; ary Manase niteraka an'i Amona*; ary Amona* niteraka an'i Josia; [*Gr.
Amosa]
11 ary Josia niteraka an'i
Jekonia mirahalahy avy, tamin'ny nifindrana tany Babylona.
12 Ary taorian'ny nifindrana
tany Babylona Jekonia dia niteraka an'i Sealtiela*; ary Sealtiela* niteraka
an'i Zerobabela; [*Gr. Salatiela]
13 ary Zerobabela niteraka
an'i Abihoda; ary Abihoda niteraka an'i Eliakima; ary Eliakima niteraka an'i
Azora;
14 ary Azora niteraka an'i
Zadoka; ary Zadoka niteraka an'i Akima; ary Akima niteraka an'i Elihoda;
15 ary Elihoda niteraka an'i
Eleazara; ary Eleazara niteraka an'i Matana; ary Matana niteraka an i Jakoba;
16 ary Jakoba niteraka an'i
Josefa, vadin'i Maria; ary Maria niteraka an'i Jesosy, Izay atao hoe Kristy.
17 Ary ny taranaka rehetra
hatramin'i Abrahama ka hatramin'i Davida dia taranaka efatra ambin'ny folo; ary
hatramin'i Davida ka hatramin'ny nifindrana tany Babylona dia taranaka efatra
ambin'ny folo; ary hatramin'ny nifindrana tany Babylona ka hatramin'i Kristy
dia taranaka efatra ambin'ny folo.
18 Ary ny nahaterahan'i
Jesosy Kristy dia toy izao: Rehefa nanaiky Maria, renin'i Jesosy, ho
fofombadin'i Josefa, raha tsy mbola nivady izy, dia hita fa nitoe-jaza avy
tamin'ny Fanahy Masina izy.
19 Ary Josefa vadiny, izay
lehilahy marina sady tsy ta-hanala baraka azy, dia nikasa hametraka azy
mangingina.
20 Fa raha mbola nisaina
izany izy, indro, nisy anjelin'ny Tompo niseho taminy tamin'ny nofy ka nanao
hoe: Ry Josefa, zanak'i Davida, aza matahotra hampakatra an'i Maria vadinao; fa
ny Zaza ao an-kibony dia avy amin'ny Fanahy Masina,
21 ka hiteraka Zazalahy izy,
ary ny anarany hataonao hoe Jesosy*; fa Izy no hamonjy ny olony ho afaka
amin'ny fahotany. [*Jesosy = Jehovah no Mpamonjy]
22 Ary izany rehetra izany
dia tonga mba hahatanteraka izay nampilazain'ny Tompo ny mpaminany* hoe: [*Gr.
profeta dia olona voafidin'Andriamanitra ho mpilaza ny teniny]
23 Indro, ny virijina
hitoe-jaza ka hiteraka zazalahy; Ary ny anarany hataon'ny olona hoe Imanoela
(Isa. 7. 14), izany hoe, raha adika: Amintsika Andriamanitra.
24 Ary Josefa, rehefa nahatsiaro
tamin'ny torimasony, dia nanao araka izay nandidian'ny anjelin'ny Tompo ary ka
nampakatra ny vadiny.
25 Ary tsy nahalala azy izy
mandra-piterany Zazalahy; ary ny anarany nataony hoe Jesosy.
1 Ary rehefa teraka Jesosy
tao Betlehema an'i Jodia, tamin'ny andron'i Heroda mpanjaka, indreo, nisy Magy*
avy tany atsinanana tonga tany Jerosalema ka nanao hoe:[*Magy = olon-kendry]
2 Aiza Ilay teraka ho
Mpanjakan'ny Jiosy? fa nahita ny kintany teny atsinanana izahay ka tonga mba
hiankohoka eo anatrehany.
3 Ary nony nandre izany
Heroda mpanjaka, dia nangorohoro izy mbamin'i Jerosalema rehetra.
4 Dia namory ny lohan'ny
mpisorona rehetra sy ny mpanora-dalàna tamin'ny vahoaka izy ka nanontany ary
hoe: Aiza mba no hahaterahan'i Kristy?
5 Ary hoy ireo taminy: Ao
Betlehema an'i Jodia; fa izao no voasoratry ny mpaminany:
6 Ary ianao, ry Betlehema,
tanin'ny Joda, tsy dia kely indrindra ao amin'ny andrianan'ny Joda ianao tsy
akory; Fa avy ao aminao no hivoahan'izay anankiray ho Mpanapaka, Ka Izy no ho
Mpiandry ny Isiraely oloko (Mik. 5.1).
7 Dia nampaka ny Magy
mangingina Heroda ka namototra fatratra taminy izay andro nisehoan'ilay
kintana.
8 Dia naniraka azy hankany
Betlehema izy ka nanao hoe: Andeha, fotory tsara ny amin'ilay Zazakely; koa
rehefa hitanareo Izy, dia ambarao amiko, mba hankanesako any koa hiankohoka eo
anatrehany.
9 Ary rehefa nandre ny
tenin'ny mpanjaka izy ireo, dia lasa; ary, indro, ilay kintana hitany teny
atsinanana nialoha azy mandra-pijanony teo ambonin'izay nitoeran'ny Zazakely.
10 Ary nony nahita ny kintana
izy, dia nifaly indrindra.
11 Ary rehefa tafiditra tao
an-trano izy, dia nahita ny Zazakely sy Maria reniny ka niankohoka teo
anatrehany; ary nony efa nosokafany ny fitehirizan-drakiny, dia nanolotra
zavatra ho Azy izy, dia volamena sy zava-manitra ary miora.
12 Ary rehefa
notoroan'Andriamanitra hevitra tamin'ny nofy izy tsy hiverina any amin'i
Heroda, dia lalana hafa no nalehany nody ho any amin'ny fonenany.
13 Ary nony efa lasa nandeha
ireo, indro, nisy anjelin'ny Tompo niseho tamin'i Josefa tamin'ny nofy ka nanan
hoe: Mifohaza ianao, ka ento ny Zazakely sy ny reniny, dia mandosira any
Egypta, ary mitoera any ambara-pilazako aminao; fa Heroda efa hitady ny
Zazakely hovonoiny.
14 Dia nifoha izy ka nitondra
ny Zazakely sy ny reniny, raha mbola alina, dia lasa nankany Egypta;
15 ary nitoetra tany izy
ambara-pahafatin'i Heroda, mba hahatanteraka izay nampilazain'i Jehovah ny
mpaminany hoe: Nantsoiko hiala tany Egypta ny zanako (Hos. 11. 1).
16 Ary nony efa fantatr'i
Heroda fa voafitaky ny Magy izy, dia tezitra indrindra izy ka naniraka namono
ny zazalahy rehetra hatramin'ny roa taona no ho midina, izay tao Betlehema sy
tamin'ny manodidina rehetra, araka ny andro izay nofotorany fatratra tamin'ny
Magy.
17 Dia tanteraka izay
nampilazaina an'i Jeremia mpaminany hoe:
18 Nisy feo re tao
Rama, dia fidradradradrana sy fitomaniana fatratra; Rahely nitomany ny zanany,
Ary tsy azo nampiononina izy, satria lany ritra ireny (Jer. 31. 15).
19 Ary rehefa maty
Heroda, indro, nisy anjelin'ny Tompo niseho tamin'i Josefa tany Egypta tamin'ny
nofy ka nanao hoe:
20 Mifohaza ianao, ka
ento ny Zazakely sy ny reniny, dia mankanesa any amin'ny tanin'ny Isiraely; fa
efa maty izay nitady ny ain'ny Zazakely.
21 Dia nifoha izy ka
nitondra ny Zazakely sy ny reniny, dia tonga tany amin'ny tanin'ny Isiraely.
22 Fa rehefa reny fa
Arkelaosy no nanjaka tany Jodia nandimby an'i Heroda rainy, dia natahotra
hankany izy; ary rehefa notoroan'Andriamanitra hevitra tamin'ny nofy izy, dia
lasa nankany amin'ny tany Galilia.
23 Ary nony tonga
tany izy, dia nonina tao amin'ny tanàna atao hoe Nazareta, mba hahatanteraka
izay nampilazaina ny mpaminany hoe: Hatao hoe Nazarena Izy.
1 Ary tamin'izany
andro izany dia niseho Jaona Mpanao batisa, nitory tany an-efitr'i Jodia nanao
hoe:
2 Mibebaha ianareo;
fa efa akaiky ny fanjakan'ny lanitra.
3 Fa izy no ilay
nampilazaina an'Isaia mpaminany hoe: Injany! misy feon'ny miantso mafy any
an-efitra hoe: Amboary ny lalan'i Jehovah, Ataovy mahitsy ny lalan-kalehany
(Isa. 40. 3).
4 Ary ny fitafian'izany
Jaona izany dia lamba volon-drameva, ary fehin-kibo hoditra no tamin'ny
valahany; ary ny fihinany dia valala sy tantely remby.
5 Ary Jerosalema sy
Jodia rehetra mbamin'ny tany rehetra amoron'i i Jordana dia nivoaka nankany
amin'i Jaona,
6 ka nataony batisa
tao amin'ny ony Jordana ireny, rehefa niaiky ny fahotany.
7 Fa nony nahita ny
Fariseo sy ny Sadoseo maro nanatona ny batisany izy, dia hoy izy taminy: Ry
taranaky ny menarana, iza no nanoro hevitra anareo handositra ny fahatezerana
ho avy?
8 Koa mamoaza voa
miendrika ny fibebahana ianareo;
9 ary aza manao
anakampo hoe: Manana an'i Abrahama ho rainay izahay; fa lazaiko aminareo fa
Andriamanitra mahay manangana zanaka ho an'i Abrahama avy amin'ireto vato
ireto.
10 Ary, indro, efa
mipetraka eo amin'ny fototry ny hazo sahady ny famaky; koa ny hazo rehetra izay
tsy mamoa voa tsara dia hokapaina ka hatsipy any anaty afo.
11 Izaho dia manao
batisa anareo amin'ny rano ho amin'ny fibebahana; fa Ilay avy ao aoriako no
mahery noho izaho, ka tsy miendrika hitondra ny kapany aza aho; Izy no hanao
batisa anareo amin'ny Fanahy Masina sy ny afo;
12 eny an-tànany ny
fikororohany, ary Izy hanadio tsara ny eo am-pamoloany ka hanangona ny variny
ho any an-tsompitra; fa ny akofa sy ny mololo hodorany amin'ny afo tsy mety
maty.
13 Ary tamin'izay
Jesosy dia avy tany Galilia ka tonga teo amoron'i Jordana, dia nanatona an'i
Jaona Izy mba hataony batisa.
14 Fa Jaona nandà Azy
ka nanao hoe: Izaho no tokony hataonao batisa, ka Hianao indray va no mankaty
amiko?
15 Fa namaly Jesosy
ka niteny taminy hoe: Ekeo ihany ankehitriny, fa izao no mety amintsika
hahatanteraka ny fahamarinana rehetra. Ka dia nekeny Izy.
16 Ary raha vao natao
batisa Jesosy, dia niakatra avy teo amin'ny rano niaraka tamin'izay Izy; ary,
indro, nisokatra taminy ny lanitra, ary hitany ny Fanahin'Andriamanitra nidina
tahaka ny voromailala ka nankeo amboniny.
17 Ary, injao!
nisy feo avy tany an-danitra nanao hoe: Ity no Zanako malalako Izay sitrako.
1 Ary Jesosy
dia nentin'ny Fanahy nankany an-efitra, mba halain'ny devoly* fanahy.[*Devoly =
mpiampanga, na mpanendrikendrika]
2 Ary nifady hanina
efa-polo andro sy efa-polo alina Izy, koa nony afaka izany, dia noana.
3 Dia nanatona ny
mpaka fanahy ka nanao taminy hoe: Raha Zanak'Andriamanitra Hianao, dia teneno
ho tonga mofo ireto vato ireto.
4 Fa Izy kosa namaly
ka nanao hoe: Voasoratra hoe: Tsy mofo ihany no hiveloman'ny olona, fa ny teny
rehetra izay aloaky ny vavan'Andriamanitra (Deo. 8. 3).
5 Ary ny devoly
nitondra Azy nankany amin'ny tanàna masina ka nampitoetra Azy teo an-tampon ny
tempoly,
6 dia nanao taminy
hoe: Raha Zanak'Andriamanitra Hianao, mianjerà any ambany any; fa voasoratra
hoe: Izy handidy ny anjeliny ny aminao; Ary eny an-tànany no hitondran'ireo
Anao, fandrao ho tafintohina amin'ny vato ny tongotrao (Sal. 91. 11, 12).
7 Hoy Jesosy taminy:
Voasoratra hoe koa: Aza maka fanahy an'i Jehovah Andriamanitrao (Deo. 6. 16).
8 Ary ny devoly
nitondra Azy Indray nankany an-tendrombohitra avo dia avo ka naneho Azy ny
fanjakana rehetra amin'izao tontolo izao mbamin'ny voninahiny,
9 dia nanao taminy
hoe: Izao rehetra izao dia homeko Anao, raha hiankohoka eto anatrehako Hianao.
10 Fa hoy Jesosy
taminy: Mandehana ianao, ry Satana: fa voasoratra hoe; Jehovah Andriamanitrao
no hiankohofanao, ary Izy irery ihany no hotompoinao (Deo. 6. 13).
11 Dia nandao Azy ny
devoly, ary indreo, nisy anjely tonga ka nanompo Azy.
12 Ary nony ren'i
Jesosy fa efa voasambotra Jaona, dia lasa nankany Galilia Izy.
13 Ary nony niala
tany Nazareta Izy, dia nankany Kapernaomy, izay ao amoron-dranomasina, ao
amin'ny zara-tanin'ny Zebolona sy ny Naftaly, ka nonina tao Izy,
14 mba hahatanteraka
izay nampilazaina an'Isaia mpaminany hoe:
15 Ny tanin'ny
Zebolona sy ny tanin'ny Naftaly, Ao amin'ny tany amoron-dranomasina, any
an-dafin'i Jordana, Galilia, tanin'ny jentilisa,
16 Ny olona izay
nitoetra tao amin'ny maizina dia nahita mazava lehibe; Ary izay nitoetra tao
amin'ny tany aloky ny fahafatesana no niposahan'ny fahazavana (Isa. 8. 23; 9.
1).
17 Ary tamin'izany
andro izany dia nanomboka nitori-teny Jesosy ka nanao hoe: Mibebaha ianareo, fa
efa akaiky ny fanjakan'ny lanitra.
18 Ary nony
nitsangantsangana teny amoron'ny Ranomasin'i Galilia Jesosy, dia nahita olona
mirahalahy, dia Simona, izay atao hoe Petera, sy Andrea rahalahiny, nanarato teny
amin'ny ranomasina; fa mpanarato izy.
19 Dia hoy Jesosy
taminy: Andeha hanaraka Ahy, fa hataoko mpanarato olona ianareo.
20 Dia nandao ny
harato niaraka tamin'izay izy ka nanaraka Azy.
21 Ary raha mbola
nandroso Izy, dia nahita olona mirahalahy hafa koa, dia Jakoba zanak'i Zebedio,
sy Jaona rahalahiny, izay niara-nipetraka tamin'i Zebedio rainy teo
an-tsambokely ka namboatra ny haratony; ary niantso azy mirahalahy Izy.
22 Dia nandao ny
sambokely sy ny rainy niaraka tamin'izay izy ka nanaraka Azy.
23 Ary Jesosy nandeha
eran'i Galilia ka nampianatra tao amin'ny synagogan'ny olona teo sy nitory ny
filazantsaran'ny fanjakana ary nahasitrana ny aretina rehetra mbamin'ny rofy
rehetra tamin'ny olona.
24 Ary niely eran'i
Syria ny lazany, ka dia nentin'ny olona tany aminy ny marary rehetra, izay
azon'ny aretina maro samy hafa sy ny fangirifiriana, dia ny demoniaka* sy izay
mararin'ny androbe ary ny mararin'ny paralysisa, ka nahasitrana ireny
Izy.[*Demoniaka = olona nidiran'ny demonia; izahao Mat.7.22]
25 Dia nanaraka Azy
ny vahoaka betsaka avy tany Galilia sy Dekapolisy sy Jerosalema sy Jodia ary ny
avy tany an-dafin'i Jordana.
1 Ary Jesosy, nony
nahita ny vahoaka, dia niakatra teo an-tendrombohitra; ary rehefa tafapetraka
Izy, dia nanatona Azy ny mpianany.
2 Dia niloa-bava Izy
ka nampianatra azy hoe:
3 Sambatra ny
malahelo am-panahy; fa azy ny fanjakan'ny lanitra.
4 Sambatra ny ory; fa
izy no hampifalina.
5 Sambatra ny
malemy fanahy; fa izy no handova ny tany (Sal. 37. 11).
6 Sambatra ny noana
sy mangetaheta ny fahamarinana; fa izy no hovokisana.
7 Sambatra ny
miantra; fa izy no hiantrana.
8 Sambatra ny madio
am-po; fa izy no hahita an'Andriamanitra,
9 Sambatra ny
mpampihavana; fa izy no hatao hoe zanak'Andriamanitra.
10 Sambatra izay
enjehina noho ny fahamarinana; fa azy ny fanjakan'ny lanitra.
11 Sambatra ianareo,
raha haratsin'ny olona sy enjehiny ary asiany izay teny ratsy rehetra
hitenenany lainga anareo noho ny amiko.
12 Mifalia sy
miravoravoa ianareo, fa lehibe ny valim-pitianareo any an-danitra; fa toy izany
ihany no nanenjehany ny mpaminany izay talohanareo.
13 Hianareo no
fanasin'ny tany; fa raha ny fanasina no tonga matsatso, inona indray no
hahasira azy? Tsy misy heriny hanaovana na inona na inona intsony izy, fa
hariana any ivelany ka hohitsahin'ny olona.
14 Hianareo no
fahazavan'izao tontolo izao. Tsy azo afenina izay tanàna miorina eo
an-tampon-tendrombohitra.
15 Ary koa, tsy misy
olona mandrehitra jiro ka mametraka azy ao ambanin'ny vata famarana, fa
apetrany eo amin'ny fanaovan-jiro, ka dia mazava amin'izay rehetra ao an-trano
izany.
16 Aoka hazava eo
imason'ny olona toy izany koa ny fahazavanareo, mba hahitany ny asa soa
ataonareo ka hankalazany ny Rainareo Izay any an-danitra.
17 Aza ataonareo fa
tonga Aho handrava ny lalàna na ny mpaminany; tsy tonga Aho handrava, fa
hanatanteraka.
18 Fa lazaiko
aminareo marina tokoa: Mandra-pahafoan'ny lanitra sy ny tany, dia tsy hisy ho
foana akory amin'ny lalàna, na dia litera* iray na tendron-tsoratra iray aza,
mandra-pahatanterak'izy rehetra.[*Dia yod, izay litera kely indrindra amin'ny
Abidy Hebreo]
19 Ary amin'izany na
zovy na zovy no mamaha ny anankiray amin'ireo didy madinika indrindra ireo ka
mampianatra ny olona toy izany, dia hatao hoe kely indrindra amin'ny
fanjakan'ny lanitra izy. Fa na zovy na zovy no mankaṭ sy mampianatra ireo dia
izy no hatao hoe lehibe amin'ny fanjakan'ny lanitra.
20 Fa lazaiko
aminareo: Raha tsy mihoatra noho ny an'ny mpanora-dalàna sy ny Fariseo ny
fahamarinanareo, dia tsy hiditra amin'ny fanjakan'ny lanitra mihitsy ianareo.
21 Efa renareo fa
voalaza tamin'ny ntaolo hoe: Aza mamono olona (Eks. 20. 13); ary izay mamono
olona dia miendrika hohelohina amin'ny fitsarana.
22 Fa Izaho kosa
milaza aminareo hoe: Izay rehetra tezitra* amin'ny rahalahiny dia miendrika
hohelohina amin'ny fitsarana; ary na zovy na zovy no hanao amin'ny rahalahiny
hoe: Olom-poana ianao, dia miendrika hohelohina amin'ny Synedriona; ary na zovy
na zovy no hanao hoe: Foka ialahy, dia miendrika ho ao amin'ny helo** mirehitra
afo. [*Na: tezitra foana] [**Gr. Gehena]
23 Ary amin'izany,
raha mitondra ny fanatitrao ho eo amin'ny alitara ianao, ary eo no mahatsiaro
fa ny rahalahinao manana alahelo aminao,
24 dia avelao eo
anoloan'ny alitara ny fanatitrao, ka mandehana aloha, ataovy izay hihavananao
amin'ny rahalahinao, ary rehefa miverina, dia vao atero ny fanatitrao.
25 Mihavàna faingana
amin'ilay manana ady aminao, raha mbola miara-dia aminy ianao, fandrao ilay
manana ady aminao hanolotra anao amin'ny mpitsara, ary ny mpitsara kosa
hanolotra anao amin'ny mpamatotra, ka hatao ao an-tranomaizina ianao.
26 Lazaiko aminao
marina tokoa: Tsy ho afaka ao mihitsy ianao, ambara-pandoanao ny variraiventy
farany indrindra.
27 Efa, renareo fa
voalaza hoe: Aza mijangajanga (Eks. 20. 14).
28 Fa Izaho kosa
milaza aminareo fa izay rehetra mijery vehivavy hila azy dia efa nijangajanga
taminy tam-pony sahady.
29 Fa raha ny masonao
ankavanana no manafintohina* anao, dia esory hiala iny, ka ario ho afaka
aminao; fa mahasoa anao na dia very aza ny iray momba ny tenanao, ka tsy ny tenanao
rehetra no hariana any amin'ny helo.[*Ny teny Grika adika hoe manafintohina
amin'ny Testamenta Vaovao, dia mamandrika no tena dikany]
30 Ary raha ny
tananao ankavanana no manafintohina anao, dia tapaho Izy, ka ario ho afaka
aminao; fa mahasoa anao na dia very aza ny iray momba ny tenanao, ka tsy ny
tenanao rehetra no ho lasa ho any amin'ny helo.
31 Ary voalaza hoe:
Na zovy na zovy no misaotra ny vadiny, dia aoka izy hanome an-dravehivavy
taratasy fisaoram-bady (Deo. 24. 1).
32 Fa Izaho kosa
milaza aminareo hoe: Izay rehetra misaotra ny vadiny afa-tsy noho ny
fijangajangana ihany dia mampijangajanga azy; ary na zovy na zovy no manambady
izay voasaotra, dia mijangajanga.
33 Ary koa, efa
renareo fa voalaza tamin'ny ntaolo hoe: Aza mianian-tsy ṭ, fa efao amin'i
Jehovah ny fianiananao (Lev. 19. 12).
34 Fa Izaho kosa
milaza aminareo hoe: Aza mianiana akory na amin'ny lanitra, fa seza
fiandrianan'Andriamanitra izany;
35 na amin'ny tany,
fa fitoeran-tongony izany; na amin'i Jerosalema, fa tanànan'ny Mpanjaka lehibe
izany.
36 Aza mianiana
amin'ny lohanao; fa tsy mahay mahafotsy na mahamainty na dia singam-bolo iray
akory aza ianao.
37 Fa aoka ny
teninareo ho Eny, eny; Tsia, tsia; fa izay mihoatra noho izany dia avy amin'ny
ratsy*.[*Na amin'ilay ratsy]
38 Efa renareo fa
voalaza hoe: Maso solon'ny maso, ary nify solon'ny nify (Eks. 21. 24).
39 Fa Izaho kosa
milaza aminareo hoe: Aza manohitra izay manisy ratsy anareo; fa na zovy na zovy
no mamely tahamaina ny takolakao ankavanana, atolory azy koa ny anankiray.
40 Ary izay te hiady
aminao ka tahaka ny akanjonao, dia avelao ho azy koa ny lambanao.
41 Ary na zovy
na zovy no hanery anao handeha maily* iray, mandehana miaraka aminy maily
roa.[*Na: kilometatra]
42 Omeo izay
mangataka aminao; ary aza ilaoza-mihodina izay te hisambotra aminao.
43 Efa renareo fa
voalaza hoe: Tiava ny namanao (Lev. 19. 18), ary mankahalà ny fahavalonao.
44 Fa Izaho kosa
milaza aminareo hoe: Tiava ny fahavalonareo, ary mivavaha ho an'izay manenjika
anareo,
45 mba ho tonga
zanaky ny Rainareo Izay any an-danitra ianareo; fa Izy mampiposaka ny
masoandrony amin'ny ratsy fanahy sy ny tsara fanahy ary mampilatsaka ny
ranonorana amin'ny marina sy ny tsy marina.
46 Fa raha izay tia
anareo ihany no tianareo, inona no valim-pitia azonareo? Moa na dia ny mpamory
hetra aza tsy mba manao izany koa va?
47 Ary raha ny
rahalahinareo ihany no arahabainareo, inona no ataonareo mihoatra noho ny
sasany? Moa na dia ny jentilisa aza tsy mba manao toy izany ihany va?
48 Koa amin
izany aoka ho tanteraka ianareo toy ny fahatanterahan'ny Rainareo Izay any
an-danitra.
1 Tandremo mba
tsy hanao ny asan'ny fahamarinanareo* eo imason'ny olona hahitany izany; Fa
raha tsy izany, dia tsy manana valim-pitia amin'ny Rainareo Izay any an-danitra
ianareo.[*Na: ny fiantrana]
2 Koa
amin'izany, raha manao fiantrana ianao, aza mba mitsoka trompetra eo aloanao
tahaka ny fanaon'ny mpihatsaravelatsihy eo amin'ny synagoga sy eny an-dalambe
mba hankalazan'ny olona azy. Lazaiko aminareo marina tokoa fa efa azony ny valim-pitiany.
3 Fa ianao kosa, raha
manao fiantrana, dia aoka tsy ho fantatry ny tananao ankavia izay ataon'ny
tananao ankavanana,
4 mba hatao ao
amin'ny mangingina ny fiantranao; ary ny Rainao, Izay mahita ao amin'ny
mangingina, no hamaly anao.
5 Ary raha mivavaka
ianareo, aza mba ho tahaka ny mpihatsaravelatsihy; Fa izy tia ny mivavaka
mitsangana eo amin'ny synagoga sy eo an-joron-dalana hahitan'ny olona azy.
Lazaiko aminareo marina tokoa fa efa azony ny valim-pitiany.
6 Fa ianao kosa, raha
mivavaka, dia mid́ra ao amin'ny efi-tranonao, ka rehefa voarindrinao ny
varavaranao, dia mivavaha amin'ny Rainao, Izay ao amin'ny mangingina; ary ny
Rainao, Izay mahita ao amin'ny mangingina no hamaly anao.
7 Ary raha mivavaka
ianareo, dia aza mba manao teny maro foana tahaka ny jentilisa; Fa ataony ho ny
hamaroan'ny teniny no hihainoana azy.
8 Koa aza manahaka
azy ianareo; fa fantatry ny Rainareo izay tokony ho anareo, raha tsy mbola
mangataka aminy aza ianareo.
9 Koa amin'izany
mivavaha toy izao ianareo: Rainay Izay any an-danitra, hohamasinina anie ny
anaranao.
10 Ho tonga anie ny
fanjakanao. Hatao anie
ny sitraponao etỳ an-tany tahaka ny any an-danitra.
11 Omeo anay
anio izay hanina sahaza ho anay.
12 Ary mamelà
ny helokay* tahaka ny namelanay izay meloka** taminay. [*Na: trosa] [**Na:nitrosa]
13 Ary aza mitondra
anay ho amin'ny fakam-panahy, fa manafaha anay amin'ny* ratsy**. [*Na:
amin'ilay] [** Ampio hoe: Fa Anao ny fanjakana sy ny hery ary ny voninahitra
mandrakizay. Amena]
14 Fa raha mamela ny
fahadisoan'ny olona ianareo, dia mba hamela ny anareo kosa ny Rainareo Izay any
an-danitra.
15 Fa raha tsy mamela
ny fahadisoan'ny olona ianareo, dia tsy hamela ny fahadisoanareo ny Rainareo.
16 Ary raha mifady
hanina ianareo, aza mety ho tahaka ny mpihatsaravelatsihy, izay malahelo
tarehy; fa mampisotisoty ny tavany izy mba ho hitan'ny olona fa mifady. Lazaiko
aminareo marina tokoa fa efa azony ny valim-pitiany.
17 Fa ianao kosa,
raha mifady hanina, dia hosory ny lohanao, ary sasao ny tavanao,
18 mba tsy ho
hitan'ny olona fa mifady, fa ho hitan'ny Rainao, Izay ao amin'ny mangingina;
ary ny Rainao, Izay mahita ao amin'ny mangingina, no hamaly anao.
19 Aza mihary harena
ho anareo eto an-tany, izay misy kalalao sy harafesina manimba, sady misy
mpangalatra manami-trano sy mangalatra.
20 Fa miharia harena
ho anareo any an-danitra, izay tsy misy kalalao na harafesina manimba, sady tsy
misy mpangalatra manamitrano na mangalatra.
21 Fa izay itoeran'ny
harenao, dia ho any koa ny fonao.
22 Ny maso no
jiron'ny tena; koa amin'izany, raha tsara ny masonao, dia hazava avokoa ny
tenanao rehetra.
23 Fa raha ratsy ny
masonao, dia ho maizina avokoa ny tenanao rehetra; koa raha maizina ny
fahazavana ao anatinao, manao ahoana ny halehiben'izany fahamaizinana izany!
24 Tsy misy olona
mahay manompo tompo roa; fa ny anankiray ho halany, ary ny anankiray ho tiany;
na ny anankiray hombany, ary ny anankiray hohamavoiny. Tsy mahay manompo
an'Andriamanitra sy Mamôna* ianareo.[*Mamôna = harena]
25 Ary noho izany dia
lazaiko aminareo hoe: Aza manahy ny amin'ny ainareo, dia izay hohaninareo na
izay hosotroinareo, na ny amin'ny tenanareo, dia izay hotafinareo. Moa ny aina
tsy mihoatra noho ny hanina va, ary ny tena noho ny fitafiana?
26 Tsinjovy ny
voro-manidina, fa tsy mba mamafy, na mijinja, na mitaona ho any an-tsompitra
ireny; ary ny Rainareo Izay any an-danitra mamelona azy. Moa tsy mihoatra
lavitra noho ireny va ianareo?
27 Ary iza ao
aminareo, na dia manahy aza, no mahay manampy ny andro hiainany* na dia kely
monja** aza? [* Na: Ny halavan'ny tenany] [** Gr. Hakiho iray]
28 Ary nahoana no
manahy ny amin'ny fitafiana ianareo? Diniho tsara ny fanirin'ny voninkazo* any
an-tsaha; tsy mba miasa na mamoly ireny;[*Karazan'ny lilia]
29 nefa lazaiko
aminareo fa na dia Solomona tao amin'ny voninahiny rehetra aza tsy mba nitafy
tahaka ny anankiray amin'ireny.
30 Ary raha ny ahitra
any an-tsaha, izay any ihany anio ka hatsipy ao am-patana rahampitso, no
ampitafin'Andriamanitra toy izany, tsy mainka va ianareo, ry kely finoana?
31 Dia aza manahy
ianareo ka manao hoe: Inona no hohaninay? na: Inona no hosotroinay? na: Inona
no hotafinay?
32 Fa izany rehetra
izany dia katsahin'ny jentilisa fatratra; fa fantatry ny Rainareo Izay any
an-danitra fa tokony ho anareo izany rehetra izany.
33 Fa katsaho aloha
ny fanjakany sy ny fahamarinany, dia hanampy ho anareo izany rehetra izany.
34 Ary amin'izany dia
aza manahy ny amin'ny ampitso ianareo; fa ny ampitso hanahy ny azy. Ampy ho an'ny andro ny ratsy miseho
ao aminy.
1 Aza mitsara, mba
tsy hotsaraina ianareo.
2 Fa araka ny
fitsarana ataonareo no hitsarana anareo; ary araka ny ohatra ataonareo no
hanoharana ho anareo.
3 Ary nahoana ianao
no mijery ny sombin-kazo eo amin'ny mason'ny rahalahinao, fa ny andry eo
amin'ny masonao dia tsy mba tsaroanao?
4 Ary ahoana no
hilazanao amin'ny rahalahinao hoe: Aoka aho hanaisotra ny sombin-kazo eo
amin'ny masonao; nefa, indro, ny andry eo amin'ny masonao?
5 Ry
mpihatsaravelatsihy, esory aloha ny andry eo amin'ny masonao, ary amin'izay vao
ho hitanao tsara ny hanesoranao ny sombin-kazo eo amin'ny mason'ny rahalahinao.
6 Aza omena ny alika
izay masina; ary aza atsipy eo anoloan'ny kisoa ny vato soanareo*, fandrao
hanitsaka azy izy, dia hifotitra ka hamiravira anareo. [*perilanareo]
7 Mangataha, dia
homena ianareo; mitadiava, dia hahita ianareo; dondony, dia hovohana ianareo.
8 Fa izay rehetra
mangataka no mahazo; ary izay mitady no mahita; ary izay mandonḍna no
hovohana.
9 Ary iza moa
aminareo, raha angatahan'ny zanany mofo, no hanome azy vato?
10 ary raha
angatahany hazandrano, no hanome azy menarana?
11 Koa raha ianareo,
na dia ratsy aza, mahalala hanome zava-tsoa ho an'ny zanakareo, tsy mainka va
ny Rainareo Izay any an-danitra no hanome zava-tsoa ho an'izay mangataka aminy?
12 Koa amin'izany na
inona na inona tianareo hataon'ny olona aminareo, dia mba ataovy aminy kosa
tahaka izany; fa izany no lalàna sy mpaminany.
13 Midira amin'ny
vavahady èty ianareo; fa lehibe ny vavahady, ary malalaka ny lalana izay
mankany amin'ny fahaverezana, ka maro ny miditra any.
14 Fa èty ny
vavahady, ary tery ny lalana izay mankany amin'ny fiainana, ka vitsy ny mahita
azy.
15 Mitandrema
ianareo, fandrao ho voafitaky ny mpaminany sandoka, izay mankao aminareo
amin'ny fitafian'ny ondry, fa ao anatiny dia amboadia* mitoha izy.[*lopa]
16 Ny voany no
hahafantaranareo azy. Manoty voaloboka amin'ny tsilo va ny olona, na aviavy
amin'ny songosongo?
17 Dia toy izany, ny
hazo tsara rehetra dia mamoa voa tsara; fa ny hazo ratsy rehetra dia mamoa voa
ratsy.
18 Ny hazo tsara tsy
mety mamoa voa ratsy, ary ny hazo ratsy tsy mety mamoa voa tsara.
19 Ny hazo rehetra
izay tsy mamoa voa tsara dia hokapaina ka hatsipy any anaty afo.
20 Ka dia ny voany no
hahafantaranareo azy.
21 Tsy izay rehetra
manao amiko hoe: Tompoko, Tompoko, no hiditra amin'ny fanjakan'ny lanitra, fa
izay manao ny sitrapon'ny Raiko Izay any an-danitra.
22 Maro no hanao
amiko amin'izany andro izany hoe: Tompoko, Tompoko, tsy efa naminany tamin'ny
anaranao va izahay? ary tsy efa namoaka demonia* tamin'ny anaranao va izahay?
Ary tsy efa nanao asa lehibe maro tamin'ny anaranao va izahay? [*Demonia =
fanahy ratsy, na anjely ratsy]
23 Ary dia hambarako
aminy marimarina hoe: Tsy mba fantatro akory ianareo hatrizay hatrizay; mialà
amiko, ianareo mpanao meloka.
24 Koa amin'izany na
zovy na zovy no mandre izany teniko izany ka mankaṭ azy, dia hoharina amin'ny
lehilahy manan-tsaina izy, izay nanorina ny tranony teo ambonin'ny vatolampy.
25 Ary latsaka ny
ranonorana, ka nisy riaka be, sady nifofofofo ny rivotra ka namely izany trano
izany; nefa tsy nianjera izy, satria efa naorina teo ambonin'ny vatolampy.
26 Fa izay rehetra
mandre izany teniko izany, nefa tsy mankaṭ azy, dia hoharina amin'ny lehilahy
adala, izay nanorina ny tranony teo ambonin'ny fasika.
27 Ary latsaka ny
ranonorana, ka nisy riaka be, sady nifofofofo ny rivotra ka namely izany trano
izany; dia nianjera izy, ka loza ny fianjerany.
28 Ary nony efa
vitan'i Jesosy izany teny izany, dia talanjona ny vahoaka noho ny fampianarany,
29 satria nampianatra
azy toy izay manana fahefana Izy, fa tsy tahaka ny mpanora-dalàna teo aminy.
1 Ary raha nidina avy
teo an-tendrombohitra Izy, dia nisy vahoaka betsaka nanaraka Azy.
2 Ary, indro, nisy
boka anankiray nanatona dia niankohoka teo anatrehany ka nanao hoe: Tompoko ô,
raha mety Hianao, dia mahay manadio ahy.
3 Ary Jesosy naninjitra
ny tànany, dia nanendry azy ka nanao hoe: Mety Aho; madiova ianao. Dia nadio
tamin'ny habokany niaraka tamin'izay izy.
4 Ary hoy Jesosy
taminy: Tandremo mba tsy hilaza amin'olona na dia iray akory aza ianao; fa
mandehana, misehoa amin'ny mpisorona, ka mitondrà ny fanatitra izay nandidian'i
Mosesy ho vavolombelona amin'ireo.
5 Ary nony tonga tao
Kapernaomy Jesosy, dia nisy kapiteny anankiray nankao aminy ka nitaraina taminy
6 nanao hoe: Tompoko
ô, ny ankizilahiko mandry ao an-trano, mararin'ny paralysisa ka mijaly loatra.
7 Dia hoy Jesosy
taminy: Ho avy Aho hahasitrana azy.
8 Fa namaly ilay
kapiteny ka nanao hoe: Tompoko, tsy miendrika hidiranao ao ambanin'ny
tafon-tranoko aho; fa mitenena ihany, dia ho sitrana ny ankizilahiko.
9 Fa izaho koa mba lehilahy
manan-dehibe ihany ka manana miaramila izay feheziko; ary raha hoy izaho
amin'ny anankiray: Mandehana, dia mandeha izy; ary amin'ny anankiray koa: Avia,
dia avy izy; ary amin'ny andevolahiko: Ataovy izao, dia manao izy.
10 Ary nony nahare
izany Jesosy, dia gaga ka niteny tamin'izay nanaraka Azy hoe: Lazaiko aminareo
marina tokoa fa tsy mbola nahita finoana lehibe toy izany Aho na dia tamin'ny
Isiraely aza.
11 Ary lazaiko
aminareo fa maro ny avy any atsinanana sy any andrefana no ho tonga ka hipetraka
hiara-mihinana amin'i Abrahama sy Isaka ary Jakoba any amin'ny fanjakan'ny
lanitra;
12 fa ny zanaky ny
fanjakana dia hariana amin'ny maizina any ivelany; any no hisy ny fitomaniana
sy ny fikitroha-nify.
13 Ary Jesosy niteny
tamin'ilay kapiteny hoe: Mandehana; tongava aminao araka ny ninoanao. Dia
sitrana tamin'izany ora izany ilay ankizilahy.
14 Ary Jesosy, nony
niditra tao an-tranon'i Petera, dia nahita ny rafozam-bavin'i Petera nandry teo
nanavin'ny tazo.
15 Ary nanendry ny
tànany Izy, dia niala taminy ny tazo; dia nitsangana ravehivavy ka nanompo Azy.
16 Ary nony hariva ny
andro, dia nentin'ny olona tany aminy ny demoniaka maro; ary ny teniny ihany no
namoahany ny fanahy ratsy, ary izay narary rehetra dia nositraniny avokoa,
17 mba, hahatanteraka
izay nampilazaina an'Isaia mpaminany hoe: Izy naka ny rofintsika sy nitondra ny
aretintsika (Isa. 53. 4).
18 Ary Jesosy, nony
nahita ny vahoaka betsaka manodidina Ary, dia nanome teny hiala ho eny am-pita.
19 Ary nanatona ny
mpanora-dalàna anankiray ka nanao taminy hoe: Mpampianatra ô, hanaraka Anao aho
na aiza na aiza no halehanao.
20 Fa hoy Jesosy
taminy : Ny amboahaolo* manan-davaka; ary ny voro-manidina manana fialofana; fa
ny Zanak'olona tsy mba manana izay hipetrahan'ny lohany.[*volpa]
21 Ary nisy hafa koa
tamin'ny mpianatra niteny taminy hoe: Tompoko, aoka aho aloha handeha handevina
ny raiko.
22 Fa hoy Jesosy
taminy: Manaraha Ahy; ary aoka ny maty handevina ny maty ao aminy.
23 Ary nony
niondrana an-tsambokely Izy, dia nanaraka Azy ny mpianany.
24 Ary, indro,
nisy tafio-drivotra mafy tonga tamin'ny ranomasina, ka dia efa nila ho
voasafotry ny alon-drano ny sambokely; fa Izy natory.
25 Ary nanatona
izy ireo, dia namoha Azy ka nanao hoe: Tompoko, vonjeo, fa maty izahay!
26 Ary hoy Izy
taminy: Nahoana no saro-tahotra ianareo, ry kely finoana? Dia nitsangana Izy,
ka noteneniny mafy ny rivotra sy ny ranomasina, dia tonga tony tsara ny andro.
27 Ary
talanjona ny olona ka nanao hoe: Lehilahy manao ahoana re Io, fa ny rivotra sy
ny ranomasina aza dia manaiky Azy!
28 Ary nony
tonga teny am-pita teo amin'ny tanin'ny Gadarena Izy, dia nifanena taminy ny
demoniaka roa lahy, nivoaka avy teny amin'ny fasana, sady masiaka loatra, ka
tsy nisy olona nahazo nandalo tamin'izany lalana izany.
29 Ary, indro,
niantso izy ka nanao hoe: Moa mifaninona akory izahay sy Hianao, ry
Zanak'Andriamanitra ô? Tonga eto va Hianao hampijaly anay alohan'ny fotoana?
30 Ary nisy
kisoa maro andiany iray nihinana teny lavidavitra azy teny.
31 Ary ny
demonia nifona tamin'i Jesosy ka nanao hoe: Raha avoakanao ary izahay, dia
iraho hankany anatin'ireo kisoa andiany ireo.
32 Ary hoy Izy
taminy: Mandehana. Dia nivoaka ireo, ka lasa nankany anatin'ny kisoa; ary,
indreny, ny kisoa andiany rehetra nitratrevatreva teny amin'ny hantsana ho any
amin'ny ranomasina, ka dia maty tany anatin'ny rano.
33 Ary ny
mpiandry nandositra, dia nankany an-tanàna ka nilaza ny zavatra rehetra ny
amin'ireo demoniaka.
34 Ary, indreo,
nivoaka ny tao an-tanàna rehetra mba hitsena an'i Jesosy; ka nony nahita Azy
izy, dia nifona taminy mba hiala amin'ny fari-taniny.
1 Ary niondrana
an-tsambokely Izy, dia nita ka tonga tao an-tanànany.
2 Ary, indro,
nisy lehilahy anankiray mararin'ny paralysisa nandry tamin'ny fandriana
nentin'ny olona teo aminy; ary Jesosy, nony nahita ny finoan'ireo, dia nanao
tamin'ilay mararin'ny paralysisa hoe: Matokia, anaka; voavela ny helokao.
3 Ary, indreo,
ny mpanora-dalàna sasany nanao anakampo hoe: Miteny ratsy* ity Lehilahy ity. [*Gr. manao blasfemia, dia miteny ratsy,
indrindra fa ny amin'Andriamanitra, na mihambo hanana izay
fomban'Andriamanitra]
4 Fa Jesosy
nahafantatra ny eritreriny, dia nanao hoe: Nahoana ianareo no mieritreri-dratsy
ao am-ponareo?
5 Fa iza moa no
moramora kokoa, ny manao hoe va: Voavela ny helokao, sa ny manao hoe: Mitsangàna,
ka mandehana?
6 Fa mba ho
fantatrareo fa ny Zanak'olona manana fahefana eto ambonin'ny tany hamela heloka
(dia hoy Izy tamin'ilay mararin'ny paralysisa): Mitsangàna, betao ny
fandrianao, ka modia any an-tranonao.
7 Dia nitsangana izy
ka lasa nody tany an-tranony.
8 Ary ny vahoaka,
raha nahita izany, dia raiki-tahotra ka nankalaza an'Andriamanitra, Izay nanome
ny olona fahefana toy izany.
9 Ary nony niala teo
Jesosy, dia nahita lehilahy atao hoe Matio nipetraka teo am-pamorian-ketra*, ka
hoy Izy taminy; Andeha hanaraka Ahy. Dia nitsangana Matio ka nanaraka Azy.[*Dia
ny hetra sy ny fadin-tseranana, etc]
10 Ary raha nipetraka
nihinana tao an-trano Izy, indreo, nisy mpanota sy mpamory hetra maro tonga ka
niara-nipetraka tamin'i Jesosy mbamin'ny mpianany.
11 Ary ny Fariseo,
raha nahita izany, dia niteny tamin'ny mpianatra hoe: Nahoana kosa ny
Mpampianatra anareo no miara-komana amin'ny mpamory hetra sy ny mpanota?
12 Ary raha nahare
izany Jesosy, dia nanao hoe: Tsy ny finaritra no mila mpanao fanafody, fa ny
marary.
13 Fa mandehana ka
mianara izay hevitry ny teny hoe: Famindram-po no sitrako, fa tsy fanatitra
alatsa-drà (Hos 6:6); fa tsy tonga hiantso ny marina Aho, fa ny mpanota.
14 Dia nankany amin'i
Jesosy ny mpianatr'i Jaona ka nanao hoe: Nahoana izahay sy ny Fariseo no mifady
hanina matetika, fa ny mpianatrao kosa tsy mba mifady?
15 Ary hoy Jesosy
taminy: Moa mahay misaona va ny havan'ny mpampakatra, raha mbola ao aminy ihany
ny mpampakatra? fa ho avy ny andro izay hanesorana ny mpampakatra hiala aminy,
dia amin'izay vao hifady izy.
16 Ary tsy misy olona
manampina lamba tonta amin'ny tapa-damba tsy mbola voaḷna; fa ny vaovao izay
natampina dia handrovitra ny lamba, ka hitatra ny triatra.
17 Ary tsy misy
manisy divay vaovao ao anaty siny hoditra tonta; raha izany, dia ho triatra ny
siny hoditra, ka ho raraka ny divay, sady ho simba ny siny hoditra; fa ny siny
hoditra vaovao no asian'ny olona divay vaovao, dia miara-maharitra izy roroa.
18 Raha mbola nilaza
izany taminy Izy, indro, tonga ny mpanapaka anankiray, dia niankohoka teo
anatrehany ka nanao hoe: Maty ankehitriny izao ny zanako-vavy; fa andeha re,
mametraha ny tananao aminy, dia ho velona izy.
19 Dia nitsangana
nanaraka azy Jesosy mbamin'ny mpianany.
20 Ary, indro, nisy
vehivavy anankiray, izay efa narary* roa ambin'ny folo taona, nankeo ivohony ka
nanendry ny somotraviavin-dambany. [*Gr. narary nandeha rà]
21 Fa hoy izy
anakampony: Na dia ny lambany ihany aza no ho voatendriko, dia ho sitrana*
aho.[*Na: voavonjy]
22 Ary Jesosy
nihodina ka nahita azy, dia nanao hoe: Matokia, ry zanako-vavy, ny finoanao no
efa nahasitrana* anao. Dia sitrana** ilay vehivavy tamin'izay ora izay. *Na:
namonjy.[*Na: voavonjy]
23 Ary Jesosy, nony
niditra tao an-tranon'ilay mpanapaka ka nahita ny mpitsoka sodina sy ny vahoaka
nitabataba,
24 dia nanao hoe:
Mivoaha; fa tsy maty razazavavy, fa matory. Dia nihomehy Azy fatratra ny olona.
25 Ary nony efa
navoaka ny olona, dia niditra Jesosy ka nandray ny tànan-drazazavavy, dia
nitsangana izy.
26 Ary ny
lazan'izany dia niely tamin'izany tany rehetra izany.
27 Ary nony
niala teo Jesosy, dia nisy jamba roa lahy nanaraka Azy sady niantsoantso hoe:
Mamindrà fo aminay, ry Zanak'i Davida ô!
28 Ary rehefa
niditra tao an-trano Izy, dia nanatona Azy ireo jamba; ary hoy Jesosy taminy:
Mino va ianareo fa mahay manao izany Aho? Hoy izy taminy: Eny, Tompoko.
29 Dia nanendry
ny masony Izy ka nanao hoe: Tongava aminareo araka ny finoanareo.
30 Dia
nahiratra ny masony; ary Jesosy namepetra azy mafy ka nanao hoe: Tandremo mba
tsy ho fantatr'olona izao.
31 Kanjo nony
niala teo izy roa lahy, dia nampiely ny lazany tamin'izany tany rehetra izany.
32 Ary rehefa
nivoaka ireo, dia indro, nisy lehilahy moana anankiray izay demoniaka nentin'ny
olona tany amin'i Jesosy.
33 Ary rehefa
navoaka ny demonia, dia niteny ilay moana; ary gaga ny vahoaka ka nanao hoe:
Tsy mbola nisy niseho toy izao tamin'ny Isiraely.
34 Fa ny
Fariseo kosa nanao hoe: Ny lohan'ny demonia no amoahany ny demonia.
35 Ary Jesosy
nandeha nitety ny tanàna rehetra sy ny vohitra, nampianatra tao amin'ny
synagoga sy nitory ny filazantsaran'ny fanjakana ary nahasitrana ny aretina
rehetra mbamin'ny rofy rehetra.
36 Ary nony
nahita ny vahoaka Jesosy, dia nahonena Azy ny fijeriny ireo, satria
nampahantraina ireo ka nafoy toy ny ondry tsy misy mpiandry.
37 Dia hoy Izy
tamin'ny mpianany:
38 Be ny
vokatra, fa ny mpiasa no vitsy; koa amin'izany mangataha amin'ny Tompon'ny
vokatra mba hampandehanany mpiasa hamory ny vokatra.
1 Ary Jesosy
niantso ny mpianany roa ambin'ny folo lahy hankeo aminy ka nanome azy fahefana
hamoaka fanahy maloto sy hahasitrana ny aretina rehetra mbamin'ny rofy rehetra.
2 Ary izao no
anaran'ny Apostoly roa ambin'ny folo lahy: Ny voalohany, Simona, izay atao hoe
Petera, dia Andrea rahalahiny; Jakoba, zanak'i Zebedio, sy Jaona rahalahiny;
3 Filipo sy
Bartolomeo; Tomasy sy Matio mpamory hetra; Jakoba, zanak'i Alfeo,
4 sy Tadeo;
Simona Kananeana* ary Jodasy Iskariota, ilay namadika Azy. [* Na: Zelota,
izahao Lio.6. 15]
5 Ireo roa
ambin'ny folo lahy ireo dia nirahin'i Jesosy ka nodidiany hoe: Aza mandeha any
amin'ny lalan'ny jentilisa, ary aza miakatra amin'izay tanànan'ny Samaritana,
6 fa aleo
mankany amin'ny ondry very amin'ny taranak'isiraely.
7 Ary raha
mandeha ianareo, dia mitoria hoe: Efa mby akaiky ny fanjakan'ny lanitra.
8 Sitrano ny
marary, atsangano ny maty, diovy ny boka, avoahy ny demonia; efa nahazo
maimaimpoana ianareo, koa manomeza maimaimpoana.
9 Aza mitady
volamena, na volafotsy, na varahina, ho ao anatin'ny fehin-kibonareo,
10 na kitapom-batsy
ho amin'izay haleha, na akanjo roa, na kapa na tehina; fa ny mpiasa dia
miendrika hahazo ny haniny.
11 Ary izay tanàna na
vohitra hiakaranareo, dia fantaro tsara izay miendrika ao; ka mitoera ao aminy
mandra-pialanareo.
12 Ary raha vao
miditra ao amin'ny trano ianareo, dia miarahabà ny ao.
13 Koa raha miendrika
ny ao an-trano, dia aoka ho ao aminy ny fiadanana tononinareo; fa raha tsy
miendrika izy, dia aoka hiverina aminareo ny fiadanana voatononareo.
14 Ary izay tsy
hampandroso anareo, na tsy hihaino ny teninareo, raha miala amin'izany trano na
tanàna izany ianareo, dia ahintsano ny vovoka amin'ny tongotrareo.
15 Lazaiko aminareo
marina tokoa fa ho moramora kokoa ny ho amin'ny tany Sodoma sy Gomora amin'ny
andro fitsarana noho ny ho amin'izany tanàna izany.
16 Indro, Izaho
maniraka anareo ho tahaka ny ondry ao ampovoan'ny amboadia*; koa hendre tahaka
ny menarana, ary morà** tahaka ny voromailala. [* lopa] [** Gr. aoka ho tsotra]
17 Ary mitandrema
ianareo noho ny amin'ny olona; fa hatolony ho amin'ny Synedriona sy hokapohiny
ao amin'ny synagogany ianareo;
18 ary ho entiny eo
anatrehan'ny mpanapaka sy ny mpanjaka ianareo noho ny amiko, ho vavolombelona
aminy sy amin'ny jentilisa.
19 Fa raha manolotra
anareo izy, dia aza manahy ny amin'izay fomba hitenenanareo, na izay holazainareo;
Fa homena anareo amin izany ora izany izay holazainareo.
20 Fa tsy ianareo no
miteny, fa ny Fanahin'ny Rainareo no miteny ao anatinareo.
21 Ary ny rahalahy
hanolotra ny rahalahiny mba ho faty, ary ny ray hanolotra ny zanany; ary ny
zanaka hitsangana hanohitra ny rainy sy ny reniny ka hahafaty azy.
22 Ary ho halan'ny
olona rehetra ianareo noho ny anarako; fa izay maharitra hatramin'ny farany no
hovonjena.
23 Ary raha manenjika
anareo amin'ny tanàna anankiray ny olona dia mandosira ho any amin'ny hafa; fa
lazaiko aminareo marina tokoa: Tsy hahatapitra ny tanànan'ny Isiraely ianareo
tsy akory mandra-pahatongan'ny Zanak'olona.
24 Ny mpianatra tsy
mihoatra noho ny mpampianatra, na ny mpanompo noho ny tompony.
25 Fa ampy amin'ny
mpianatra, raha tonga tahaka ny mpampianatra azy, ary ny mpanompo, raha tonga
tahaka ny tompony. Raha ny tompon-trano no nataony hoe Belzeboba, tsy mainka va
ny ankohonany?
26 Koa amin'izany aza
matahotra azy ianareo; fa tsy misy afenina izay tsy haseho, na takona izay tsy
ho fantatra.
27 Izay lazaiko
aminareo ao amin'ny maizina, dia ambarao eo amin'ny mazava, ary izay ren'ny
sofinareo, dia torio eo ambonin'ny tampon-trano.
28 Ary aza matahotra
izay mamono ny tena, nefa tsy mahay mamono ny fanahy; fa aleo matahotra Izay
mahay mahavery ny fanahy sy ny tena ao amin'ny helo*.[*Gr. gehena]
29 Tsy varidimiventy*
ihany va no vidin'ny tsintsina roa? nefa tsy misy na dia iray akory aza
amin'ireny ho latsaka amin'ny tany, raha tsy avelan'ny Rainareo.[*Gr. asaria,
izay ampahafolon'ny denaria]
30 Fa na dia ny
volon-dohanareo aza dia voaisa avokoa.
31 Koa aza matahotra;
fa mihoatra noho ny tsintsina maro ianareo.
32 Ary amin'izany na
zovy na zovy no hanaiky Ahy eo anatrehan'ny olona, dia hekeko kosa izy eo
anatrehan'ny Raiko Izay any an-danitra.
33 Fa na zovy na zovy
no handà Ahy eo anatrehan'ny olona, dia holaviko kosa izy eo anatrehan'ny Raiko
Izay any an-danitra.
34 Ary aza ataonareo
fa tonga hitondra fiadanana ambonin'ny tany Aho; tsy tonga hitondra fiadanana
Aho, fa sabatra.
35 Fa tonga Aho hampifandrafy
olona amin'ny rainy, ary ny zanakavavy amin'ny reniny, ary ny vinantovavy
amin'ny rafozanivavy;
36 ary ny
ankohonan'ny olona ihany no fahavalony (Mik. 7. 6).
37 Izay tia ray
na reny mihoatra noho ny fitiavany Ahy dia tsy miendrika ho Ahy, ary izay tia
ny zananilahy na ny zananivavy mihoatra noho ny fitiavany Ahy dia tsy miendrika
ho Ahy.
38 Ary izay tsy
mitondra* ny hazo fijaliany ka tsy manaraka Ahy dia tsy miendrika ho Ahy.[*Gr.
mandray]
39 Izay mamonjy
ny ainy no hamery azy; ary izay mamery ny ainy noho ny amiko dia hahazo azy.
40 Izay mandray
anareo dia mandray Ahy; ary izay mandray Ahy dia mandray Izay naniraka Ahy.
41 Izay mandray
mpaminany, satria mpaminany izy, dia handray ny valim-pitian'ny mpaminany; ary
izay mandray olona marina, satria olona marina izy, dia handray ny
valim-pitian'ny olona marina.
42 Ary na zovy
na zovy no manome rano mangatsiaka na dia eran'ny kapoaka ihany aza
hosotroin'ny anankiray amin'ireo madinika ireo, satria mpianatra izy, dia
lazaiko aminareo marina tokoa fa tsy ho very ny valim-pitiany.
1 Ary rehefa
vitan'i Jesosy ny nandidiany ny mpianany roa ambin'ny folo lahy, dia niala teo
Izy hampianatra sy hitoriteny any an-tanànan'ny olona.
2 Ary rehefa
ren'i Jaona tao an-tranomaizina ny asa nataon'i Kristy, dia naniraka ny
mpianany izy
3 hanao aminy hoe:
Hianao va Ilay ho avy, sa mbola hafa no andrasantsika?
4 Ary Jesosy namaly
ka nanao taminy hoe: Mandehana ianareo, ka ambarao amin'i Jaona izao renareo sy
hitanareo izao:
5 Mahiratra ny jamba,
ary afaka ny mandringa; diovina ny boka, ary malady ny marenina; atsangana ny
maty, ary ny malahelo dia itoriana ny filazantsara.
6 Ary sambatra izay
tsy ho tafintohina noho ny amiko.
7 Ary nony lasa
ireny, dia vao nilaza an'i Jaona tamin'ny vahoaka Jesosy ka nanao hoe: Hizaha
inona no nivoahanareo nankany an-efitra? Volotara nohozongozonin'ny rivotra va?
8 Sa hizaha inona no
nivoahanareo? Olona mitafy soa* va? Indro, ny mitafy soa* dia ao an-tranon'ny mpanjaka.[*Gr. malemy]
9 Sa hizaha inona no
nivoahanareo? Mpaminany va? Eny, hoy Izaho aminareo, sady mihoatra lavitra noho
ny mpaminany izy.
10 Izy no ilay
voasoratra hoe: Indro, Izaho maniraka ny irako hialoha Anao, Izay hamboatra ny
lalanao eo alohanao (Mal. 3. 1).
11 Lazaiko aminareo
marina tokoa: Amin'izay nateraky ny vehivavy tsy mbola nisy nitsangana izay
lehibe noho Jaona Mpanao-batisa; nefa ny kely indrindra amin'ny fanjakan'ny
lanitra dia lehibe noho izy.
12 Ary hatramin'ny
andron'i Jaona Mpanao-batisa ka mandraka ankehitriny ny fanjakan'ny lanitra dia
rombahina, ary ny mpandrombaka maka azy an-keriny.
13 Fa ny mpaminany
rehetra sy ny lalàna dia naminany hatramin'i Jaona.
14 Ary raha mety
mandray ianareo, dia izy no ilay Elia izay ho avy.
15 Izay manan-tsofina
ho enti-mihaino, aoka izy hihaino.
16 Fa tahaka ny inona
no hanoharako ity taranaka ity? Tahaka ny ankizy madinika mipetraka eny
an-tsena izy, izay miantso ny namany ka manao hoe:
17 Efa nitsoka sodina
taminareo izahay, nefa tsy nandihy ianareo, efa nanao feo fisaonana izahay,
nefa tsy niteha-tratra ianareo.
18 Fa tonga Jaona tsy
nihinana na nisotro, ka hoy ny olona: Manana demonia izy.
19 Tonga ny
Zanak'olona mihinana sy misotro kosa, ka hoy ny olona: Indro, olona fatra-pitia
hanina sy mpisotro divay, sakaizan'ny mpamory hetra sy ny mpanota. Fa ny
fahendrena dia hamarinin ny asany*.[*Na: (ny zanany)]
20 Ary tamin'izany
dia vao niteny mafy ny tanàna izay nanaovany ny ankamaroan'ny asany lehibe Izy,
satria tsy nibebaka ireo, ka nanao hoe:
21 Lozanao, ry
Korazina! Lozanao, ry Betsaida! fa raha mba tany Tyro sy Sidona no natao ny asa
lehibe izay natao teo aminareo, dia ho efa nibebaka ela tamin'ny lamba
fisaonana sy ny lavenona ireny.
22 Fa lazaiko
aminareo fa ho moramora kokoa ny ho amin'i Tyro sy Sidona amin'ny andro
fitsarana noho ny ho aminareo.
23 Ary ianao, ry Kapernaomy,
hasandratra hatrany an-danitra va ianao? Hietry hatrany amin'ny
fiainan-tsi-hita* ianao; fa raha mba tany Sodoma no natao ny asa lehibe izay
natao teo aminao, dia ho naharitra ambaraka androany izy.
24 Fa lazaiko
aminareo fa ho moramora kokoa ny ho amin'ny tany Sodoma amin'ny andro fitsarana
noho ny ho aminao.
25 Tamin'izany andro
izany dia namaly Jesosy ka nanao hoe: Midera Anao Aho, Raiko, Tompon'ny lanitra
sy ny tany, fa nafeninao tamin'ny hendry sy ny manan-tsaina izany zavatra izany
ka nasehonao tamin'ny zaza madinika.
26 Eny, Raiko; fa
izany no sitraponao.
27 Ny zavatra rehetra
natolotry ny Raiko Ahy; ary tsy misy mahalala tsara ny Zanaka, afa-tsy ny Ray;
ary tsy misy mahalala tsara ny Ray, afa-tsy Zanaka sy izay tian'ny Zanaka
hanehoana Azy.
28 Mankanesa
atỳ amiko, ianareo rehetra izay miasa fatratra sy mavesatra entana, fa
Izaho no hanome anareo fitsaharana.
29 Ento ny ziogako,
ka mianara amiko; fa malemy fanahy sady tsy miavona am-po Aho; dia hahita
fitsaharana ho an'ny fanahinareo ianareo.
30 Fa mora ny
ziogako, ary maivana ny entako.
1 Tamin'izany andro
izany Jesosy nandeha namaky ny tanimbary tamin'ny Sabata; ary noana ny mpianany
ka nanoty salohim-bary, dia nihinana.
2 Fa nony nahita
izany ny Fariseo, dia hoy izy taminy: Indro, ny mpianatrao manao izay tsy mety
hatao amin'ny Sabata.
3 Ary hoy Izy taminy:
Tsy mbola novakinareo va ny teny milaza ilay nataon'i Davida, raha noana izy
mbamin'izay nanaraka azy,
4 Fa niditra tao
amin'ny tranon'Andriamanitra izy ka nihinana ny mofo aseho, izay nahadiso raha
haniny, na izay nanaraka azy, afa-tsy ny mpisorona ihany?
5 Ary tsy mbola
novakinareo ao amin'ny lalàna va fa amin'ny Sabata ny mpisorona ao amin'ny
tempoly manota ny Sabata, nefa tsy manan-tsiny?
6 Ary dia lazaiko
aminareo fa misy eto lehibe noho ny tempoly.
7 Fa raha fantatrareo
izay hevitry ny teny hoe: Famindram-po no sitrako, fa tsy fanatitra alatsa-drà
(Hos. 6. 6), dia tsy mba nanameloka ny tsy manan-tsiny ianareo.
8 Fa Tompon'ny Sabata
ny Zanak'olona.
9 Ary nony niala teo
Jesosy, dia niditra tao amin'ny synagoga;
10 ary, indro, nisy
lehilahy maty* tanana teo. Ary ny olona nanontany Azy hoe: Mety va ny
mahasitrana amin'ny Sabata? mba hiampangany Azy.[*Gr. efa maina, na malazo]
11 Ary hoy Izy
taminy: Iza moa no olona ao aminareo, raha manana ondry anankiray, ka latsaka
any an-kady amin'ny Sabata, no tsy handray azy sy hampakatra azy?
12 Ary tsy mihoatra
lavitra noho ny ondry va ny olona? Koa amin'izany dia mety ny manao soa amin'ny
Sabata.
13 Dia hoy Izy
tamin-dralehilahy: Ahinjiro ny tananao. Dia nahinjiny ka sitrana ho tahaka ny
anankiray.
14 Ary ny Fariseo dia
lasa nivoaka ka niara-nisaina mba hahafaty Azy.
15 Fa Jesosy nahalala
izany, ka dia niala teo. Ary nisy olona betsaka nanaraka Azy, ka dia
nositraniny avokoa izy rehetra;
16 ary nandrara azy
Izy tsy hanao izay hahafantarana Azy,
17 mba hahatanteraka
izay nampilazaina an'Isaia mpaminany hoe:
18 Indro ny
Mpanompoko, Izay nofidiko, Ny Malalako, Izay sitraky ny foko indrindra;
Hapetrako ao aminy ny Fanahiko, Ary hitory ny rariny amin'ny jentilisa Izy;
19 Tsy
hifanditra, na hiantso mafy Izy; Ary tsy hisy handre ny feony any an-dalana;
20 Tsy
hotapahiny ny volotara torotoro, Ary tsy hovonoiny ny lahin-jiro manetona,
Ambara-pamoakany ny rariny ho mpandresy;
21 Ary ny
anarany no hitokian'ny jentilisa (Isa. 42:1-4).
22 Dia nentina
tany amin'i Jesosy ny lehilahy anankiray izay demoniaka, sady jamba no moana;
dia nositraniny, ka dia niteny sy nahita ilay moana.
23 Dia
talanjona ny vahoaka rehetra ka nanao hoe: Moa Ity va Ilay Zanak'i Davida?
24 Fa nony
ren'ny Fariseo izany, dia hoy izy: Tsy misy amoahan'ilehiny ny demonia, afa-tsy
Belzeboba, lohan'ny demonia.
25 Ary Jesosy
nahalala ny eritreriny, dia nanao taminy hoe: Ho foana ny fanjakana rehetra
izay miady an-trano; ary tsy haharitra ny tanàna rehetra, na ny trano, izay
miady an-trano.
26 Ary raha
Satana no mamoaka an'i Satana, dia miady an-trano izy; ka ahoana no
haharetan'ny fanjakany?
27 Ary raha
Belzeboba no amoahako ny demonia, iza kosa no mba amoahan'ny zanakareo azy? ary
noho izany dia izy ihany no ho mpitsara anareo.
28 Fa raha ny
Fanahin'Andriamanitra kosa no amoahako ny demonia, dia efa tonga aminareo
sahady ny fanjakan'Andriamanitra.
29 Fa hataon'ny olona
ahoana no fiditra ao an-tranon'ny mahery handroba ny entany, raha tsy afatony
aloha ny mahery? dia vao handroba ny ao an-tranony izy.
30 Izay tsy momba Ahy
dia manohitra Ahy; ary izay tsy miara-mamory amiko dia manahaka.
31 Ary noho izany dia
lazaiko aminareo hoe: Hahazo famelan-keloka ny olona amin'ny ota sy
fitenenan-dratsy* samy hafa rehetra; fa tsy hahazo famelan-keloka ny olona
amin'ny fitenenan-dratsy* ny Fanahy Masina.[*Gr.blasfemia,izahao 9. 3]
32 Ary na iza na iza
no manao teny hanohitra ny Zanak'olona, dia hahazo famelan-keloka ihany; fa na
iza na iza no miteny hanohitra ny Fanahy Masina, dia tsy mba hahazo
famelan-keloka, na amin'izao fiainana izao, na amin'ny ho avy.
33 Koa ataovy tsara
ny hazo mbamin'ny voany, na ataovy ratsy ny hazo mbamin'ny voany; fa ny voany
no ahafantarana ny hazo.
34 Ry taranaky ny
menarana! hataonareo, izay ratsy fanahy, ahoana no fahay miteny zavatra tsara?
fa avy amin'ny haben'ny ao am-po no itenenan'ny vava.
35 Ny rakitra tsara
no amoahan'ny olona tsara fanahy zavatra tsara; ary ny rakitra ratsy kosa no
amoahan'ny olona ratsy fanahy zavatra ratsy.
36 Ary lazaiko
aminareo fa hampamoahina ny olona amin'ny andro fitsarana noho ny amin'ny teny
foana rehetra izay ataony.
37 Fa ny teninao no
hanamarinana anao, ary ny teninao no hanamelohana anao.
38 Ary tamin'izany ny
sasany tamin'ny mpanora-dalàna sy ny Fariseo namaly Azy ka nanao hoe:
Mpampianatra ô, ta-hahita famantarana avy aminao izahay.
39 Fa Jesosy namaly
ka nanao taminy hoe: Izay taranaka ratsy fanahy sy mijangajanga dia
fatra-pitady famantarana; nefa tsy hisy famantarana homena azy, afa-tsy
famantarana ny amin'i Jona mpaminany;
40 fa tahaka ny
nitoeran'i Jona hateloan'andro sy hateloan'alina tao an-kibon'ny hazandrano
lehibe, dia toy izany no hitoeran'ny Zanak'olona hateloan'Andro sy
hateloan'alina ao anatin'ny tany.
41 Ny olona tany
Ninive hiara-mitsangana amin'ity taranaka ity amin'ny andro fitsarana ka
hanameloka azy; fa nibebaka izy tamin'ny nitorian'i Jona teny; nefa, indro,
misy lehibe noho Jona eto.
42 Ny mpanjakavavy
avy tany atsimo hiara-mitsangana amin'ity taranaka ity amin'ny andro fitsarana
ka hanameloka azy; fa avy tany amin'ny faran'ny tany izy hihaino ny fahendren'i
Solomona; nefa, indro, misy lehibe noho Solomona eto.
43 Raha mivoaka
amin'ny olona ny fanahy maloto, dia mandeha mitety ny tany tsy misy rano izy,
mitady fitsaharana, fa tsy mahita.
44 Dia hoy izy: Hody
any amin'ny tranoko izay nivoahako aho; ary nony tonga izy, dia hitany fa foana
ny trano sady voafafa no voavoatra.
45 Ary dia mandeha
izy ka mitondra fanahy fito hafa koa miaraka aminy izay ratsy noho izy; dia
miditra ireo ka mitoetra ao; ary ny faran'izany olona izany dia tonga ratsy
noho ny voalohany. Ary
dia tahaka izany koa no ho amin'ity taranaka ratsy fanahy ity.
46 Ary raha
mbola niteny tamin'ny vahoaka Jesosy, indreo, ny reniny mbamin'ny rahalahiny
nijanona teo ala-trano nitady hiteny aminy.
47 Ary nisy
anankiray nanao taminy hoe: Indreo, ny reninao mbamin'ny rahalahinao mijanona
ato ala-trano mitady hiteny aminao.
48 Fa namaly
Izy ka nanao tamin'ilay nilaza taminy hoe: Iza moa no reniko, ary iza no
rahalahiko?
49 Ary
naninjitra ny tànany nanondro ny mpianany Izy ka nanao hoe: Indreo ny reniko sy
ny rahalahiko;
50 Fa na iza na
iza no hanao ny sitrapon'ny Raiko Izay any an-danitra, dia izy no rahalahiko sy
anabaviko ary reniko.
1 Ary
tamin'izany andro izany dia nivoaka avy tao an-trano Jesosy ka nipetraka teo
amoron'ny ranomasina.
2 Ary nisy
vahoaka betsaka tafangona teo aminy, dia niditra teo an-tsambokely Izy ka
nipetraka; ary ny vahoaka rehetra kosa dia teny amoron-dranomasina.
3 Ary nilaza
zavatra maro taminy tamin'ny fanoharana Izy ka nanao hoe: Indro, nivoaka ny
mpamafy mba hamafy;
4 ary raha
namafy izy, ny sasany dia voafafy teny amoron-dalana; dia avy ny vorona ka
nandany azy.
5 Ary ny sasany
dia voafafy teny amin'ny tany marivo ambony vatolampy; dia nalaky nitrebona
ireny, satria tsy nisy tany lalina.
6 Fa rehefa
niposaka ny masoandro, dia nalazo ireny, ary satria tsy nanam-paka, dia maty
izy.
7 Ary ny sasany
dia voafafy teny amin'ny tsilo; ary ny tsilo naniry ka nangeja azy.
8 Ary ny sasany
dia voafafy teny amin'ny tany tsara, dia namoa: ny sasany avy zato heny, ary ny
sasany avy enim-polo heny, ary ny sasany avy telo-polo heny.
9 Izay
manan-tsofina*, aoka izy hihaino. [*Na: (Izay manan-tsofina ho enti-mihaino)]
10 Ary dia nanatona
ny mpianany ka nanao taminy hoe: Nahoana no fanoharana no itenenanao aminy?
11 Ary namaly Izy ka
nanao taminy hoe: Satria ianareo no navela* hahalala ny zava-miafina ny amin'ny
fanjakan'ny lanitra, fa ireny kosa tsy mba navela**. [* Gr. nomena] [** Gr.
nomena]
12 Fa izay manana no
homena, ka hanana be dia be izy; fa izay tsy manana kosa, na izay ananany aza
dia hesorina aminy.
13 Ary noho izany dia
fanoharana no itenenako aminy: satria mijery izy, fa tsy mahita; ary mandre
izy, fa tsy mihaino, na mahalala.
14 Dia tanteraka
aminy ny faminanian'Isaia, izay manao hoe: Handre mandrakariva ihany ianareo,
fa tsy hahafantatra: Ary hijery mandrakariva ihany ianareo, fa tsy hahita;
15 Fa efa adala ny
fon'izao olona izao. Ary efa lalodalovana ny sofiny, Ary efa nakimpiny ny masony,
Fandrao hahita ny masony, Sy handre ny sofiny, Ka hahalala ny fony, Dia
hibebaka izy, Ka hahasitrana azy Aho. (Isa. 6. 9, 10).
16 Fa sambatra ny
masonareo, fa mahita, ary ny sofinareo, fa mandre.
17 Fa lazaiko
aminareo marina tokoa fa maro ny mpaminany sy ny olona marina naniry hahita
izay hitanareo, nefa tsy mba nahita; ary naniry handre izay renareo, nefa tsy
mba nandre.
18 Koa amin'izany dia
henoinareo ny fanoharana ny amin'ny mpamafy:
19 Raha misy mandre
ny tenin'ny fanjakana, fa tsy mahalala, dia avy ilay ratsy ka manaisotra izay
nafafy tao am-pony. Dia izany no ilay nafafy teny amoron-dalana.
20 Fa ilay nafafy
teny amin'ny tany marivo ambony vatolampy dia izay mandre ny teny ka malaky
mandray azy amin'ny hafaliana;
21 nefa tsy
manam-paka ao anatiny izy, fa maharitra vetivety foana; koa raha avy izay
fahoriana na fanenjehana noho ny teny, dia malaky tafintohina izy.
22 Ary ilay nafafy
teny amin'ny tsilo dia izay mandre ny teny ary ny fiahiahiana izao fiainana
izao sy ny fitaky ny harena mangeja ny teny, ka dia tsy mamoa izy.
23 Fa ilay nafafy
teny amin'ny tany tsara kosa dia izay mandre ny teny ka mahalala; dia izy no
mamoa ka vokatra: ny sasany avy zato heny ary ny sasany avy enim-polo heny, ary
ny sasany avy telo-polo heny.
24 Ary nanao
fanoharana hafa koa taminy Izy ka nanao hoe: Ny fanjakan'ny lanitra dia tahaka
ny lehilahy anankiray izay namafy voa tsara tany an-tanimbariny;
25 fa raha natory ny
olona, dia avy ny fahavalony ka namafy voan-tsimparifary teny amin'ny vary, dia
lasa nandeha.
26 Ary rehefa naniry
ny vary ka niteraka dia niposaka koa ny tsimparifary.
27 Dia avy ny
mpanompon-dralehilahy ka nanao taminy hoe: Tompoko, tsy voa tsara va no
nafafinao tany an-tanimbarinao? koa avy taiza kosa ny tsimparifary? Dia hoy izy
taminy:
28 Fahavalo no nanao
izany. Ary ny mpanompony nanao taminy hoe: Koa tianao va handehananay
hanongotra sy hanangona azy?
29 Fa hoy izy: Tsia,
fandrao, raha manongotra ny tsimparifary ianareo, dia hongotanareo miaraka
aminy koa ny vary.
30 Aoka ihany
hiara-maniry izy roroa ambara-pihavin'ny fararano; ary amin'ny fararano dia
holazaiko amin'ny mpijinja hoe: Angony aloha ny tsimparifary, ka ataovy
amboarany mba hodorana; fa ny vary dia taomy ho any an-tsompitro.
31 Ary nanao
fanoharana hafa koa taminy Izy ka nanao hoe: Ny fanjakan'ny lanitra dia tahaka
ny voan-tsinapy izay nalain'olona ka nafafiny tany an-tsahany;
32 fa kely noho ny
voa rehetra izy, kanefa rehefa maniry, dia lehibe noho ny anana ka tonga hazo,
dia avy ny voro-manidina ka mitoetra ao amin'ny rantsany.
33 Ary nanao
fanoharana hafa koa taminy Izy hoe: Ny fanjakan'ny lanitra dia tahaka ny
masirasira, izay nalain'ny vehivavy anankiray ka nataony* tao amin'ny koba
intelon'ny famarana, mandra-pahazon'ny masirasira azy rehetra. [*Gr. nafeniny]
34 Fanoharana no
nilazan'i Jesosy izany zavatra rehetra izany tamin'ny vahoaka, ary tsy nisy
nolazainy taminy, afa-tsy tamin'ny fanoharana,
35 mba hahatanteraka
izay nampilazaina ny mpaminany hoe: Hiloa-bava hilaza fanoharana Aho; Hanambara
zavatra izay nafenina hatrizay nanorenana izao tontolo izao Aho (Sal. 78. 2).
36 Ary rehefa nampody
ny vahoaka Jesosy, dia niditra tao an-trano Izy, ary ny mpianany nankao aminy
ka nanao hoe: Lazao aminay ny hevitry ny fanoharana ny amin'ny tsimparifary
tany an-tanimbary.
37 Ary namaly Izy ka nanao
hoe: Ny mpamafy ny voa tsara dia ny Zanak'olona;
38 ny tanimbary dia
izao tontolo izao; ny voa tsara dia ny zanaky ny fanjakana; ny tsimparifary dia
ny zanak'ilay ratsy;
39 ny fahavalo izay
namafy izany dia ny devoly; ny fararano dia ny fahataperan'izao tontolo izao;
ary ny mpijinja dia anjely.
40 Koa tahaka ny
anangonana ny tsimparifary sy andoroana azy amin'ny afo, dia toy izany no hatao
amin'ny fahataperan'izao tontolo izao.
41 Ny Zanak'olona
haniraka ny anjeliny, ary ireny dia hanangona ka hamoaka amin'ny fanjakany ny
zavatra mahatafintohina rehetra mbamin'izay manao meloka,
42 dia hanipy azy any
amin'ny fandoroana lehibe mirehitra afo izy; any no hisy ny fitomaniana sy ny
fikitroha-nify.
43 Ary amin'izany ny
marina dia hamirapiratra tahaka ny masoandro any amin'ny fanjakan'ny Rainy.
Izay manan-tsofina*, aoka izy hihaino. [*Na: (Izay manan-tsofina ho
enti-mihaino)]
44 Ary ny fanjakan'ny
lanitra dia tahaka ny harena nafenina tany an-tsaha, izay hitan'olona, ka dia
nafeniny; ary noho ny hafaliany dia lasa nandeha izy ka nivarotra ny fananany
rehetra, dia nividy izany saha izany.
45 Ary koa, ny
fanjakan'ny lanitra dia tahaka ny mpandranto anankiray izay nikatsaka vato
soa*;[*Gr.perila]
46 ary rehefa nahita
vato soa* iray saro-bidy izy, dia lasa nivarotra ny fananany rehetra ka nividy
azy.[*Gr. perila]
47 Ary koa, ny
fanjakan'ny lanitra dia tahaka ny harato-tarihina, izay nalatsaka tao amin'ny
ranomasina ka nahavory ny samy hafa karazana rehetra;
48 ary rehefa feno
izany, dia notarihiny ho eny an-tanety, dia nipetraka ny olona ka nifantina ny
tsara hataony ao an-karona, fa ny ratsy nariany.
49 Dia tahaka izany
no hatao amin'ny fahataperan'izao tontolo izao; hivoaka ny anjely ka hanavaka
ny ratsy fanahy hisaraka amin'ny marina,
50 dia
hatsipiny any amin'ny fandoroana lehibe mirehitra afo izy; any no hisy ny
fitomaniana sy ny fikitroha-nify.
51 Efa azonareo va
izany rehetra izany? Hoy ireo taminy: Eny.
52 Dia hoy Izy
taminy: Koa amin'izany ary ny mpanora-dalàna rehetra izay nampianarina ho
amin'ny fanjakan'ny lanitra dia samy tahaka ny tompon-trano, izay mamoaka avy
amin'ny firaketany zava-baovao sy ela.
53 Ary rehefa vitan'i
Jesosy ireo fanoharana ireo, dia niala teo Izy.
54 Ary nony tonga
tany amin'ny taniny Izy, dia nampianatra ny olona tao amin'ny synagoga, ary
talanjona ny olona ka nanao hoe: Avy taiza re no nahazoan'ilehity izany
fahendrena sy asa lehibe izany?
55 Tsy Ilehity va
ilay Zanaky ny mpandrafitra? Tsy Maria va no anaran'ny reniny? Ary tsy Jakoba sy Josefa sy Simona
ary Jodasy va no rahalahiny?
56 Ary ny
anabaviny, moa tsy eto amintsika avokoa va izy? Koa avy taiza no
nahazoan'ilehity izany zavatra rehetra izany?
57 Ary
tafintohina taminy izy. Fa hoy Jesosy taminy: Tsy misy mpaminany tsy hajaina,
afa-tsy amin'ny taniny sy ny mpianakaviny ihany.
58 Ary tsy
nanao asa lehibe maro teo Izy noho ny tsi-finoan'ireo.
1 Tamin'izany
andro izany Heroda mpanapaka nandre ny lazan'i Jesosy,
2 ka hoy izy
tamin'ny mpanompony: Jaona Mpanao-batisa izay; efa nitsangana tamin'ny maty
izy, koa izany no ananany hery hanao izany asa lehibe izany.
3 Fa Heroda efa
nisambotra an'i Jaona, dia namatotra azy ka nanao azy tao an-tranomaizina, noho
ny tamin'i Herodiasy, vadin'i Filipo rahalahiny.
4 Fa Jaona efa nilaza
taminy hoe: Diso ianao, raha manambady azy.
5 Ary Heroda naniry
hamono azy, saingy natahotra ny vahoaka izy, satria nataon'ireo ho mpaminany
Jaona.
6 Fa nony tonga ny
fitsingerenan'ny taona nahaterahan'i Heroda, dia nandihy teo anatrehany ny
zanakavavin'i Herodiasy ka nahafaly an'i Heroda.
7 Ary noho izany dia
nianiana izy fa hanome azy izay hangatahiny na inona na inona.
8 Ary rehefa
nomen-dreniny saina razazavavy, dia nanao hoe: Omeo ahy eto an-dovia ny lohan'i
Jaona Mpanao-batisa.
9 Dia nalahelo ny
mpanjaka; kanefa noho ny fianianany sy ny olona izay niara-nipetraka nihinana
teo aminy, dia nandidy ihany izy mba homena izany.
10 Ary dia naniraka
hanapaka ny lohan'i Jaona tao an-tranomaizina izy.
11 Dia nentina
an-dovia ny lohany ka nomena ilay zazavavy; ary izy nitondra azy ho ao
amin-dreniny.
12 Ary avy ny
mpianany, dia naka ny faty ka nandevina azy; ary dia lasa izy ka nilaza tamin'i
Jesosy.
13 Ary nony nandre
izany Jesosy, dia niondrana an-tsambokely niala teo handeha hitokana any
an-tany foana; ary raha nandre izany ny vahoaka, dia niala teny amin'ny tanàna
maro izy ka nandeha an-tanety* nanaraka Azy.[*Na: nandeha tongotra]
14 Ary nony nivoaka
Jesosy, dia nahita vahoaka betsaka, ary onena azy ka nahasitrana ny marariny.
15 Ary nony hariva ny
andro, dia nanatona Azy ny mpianatra ka nanao hoe: Tany foana ity, ary efa
hariva ny andro izao; ravao ny vahoaka, mba hankanesany eny amin'ny vohitra
hividy hanina ho azy.
16 Fa hoy Jesosy
taminy: Tsy tokony handeha izy; omeonareo hanina izy.
17 Fa hoy ny mpianany
taminy: Tsy misy atỳ aminay, afa-tsy mofo dimy sy hazandrano roa.
18 Ary hoy Izy: Ento
eto amiko izany.
19 Dia nasainy
nipetraka teny ambonin'ny ahitra ny vahoaka, ary noraisiny ny mofo dimy sy ny
hazandrano roa, dia niandrandra ny lanitra Izy ka nisaotra; ary nony efa
novakiny ny mofo, dia natolony ny mpianatra, ary ny mpianatra kosa nanolotra ho
an'ny vahoaka.
20 Ary nihinana
avokoa izy rehetra, ka dia voky; ary nangoniny ny sombintsombiny sisa tsy lany,
ka dia nahafeno harona roa ambin'ny folo.
21 Ary izay nihinana
dia tokony ho dimy arivo lahy, afa-tsy ny zaza amim-behivavy.
22 Ary niaraka
tamin'izay dia nanery ny mpianatra hiondrana an-tsambokely Jesosy ka hita eo
alohany ho eny am-pita mandra-pandràvany ny vahoaka.
23 Ary rehefa
noravany ny vahoaka, dia niakatra tao an-tendrombohitra Izy mba hitokana
hivavaka; ary nony hariva ny andro, dia nitoetra irery teo Izy.
24 Ary efa mby teo
ampovoan'ny ranomasina ny sambokely tamin'izay, dia natopatopan'ny alon-drano
izy, fa notohain'ny rivotra.
25 Ary tamin'ny
fiambenana fahefatra amin'ny alina dia nankeny amin'ny mpianany Jesosy,
nitsangantsangana teny ambonin'ny ranomasina.
26 Ary nony nahita
Azy nitsangantsangana tambonin'ny ranomasina ny mpianatra, dia raiki-tahotra ka
nanao hoe: Matoatoa io; dia niantso izy noho ny tahotra.
27 Ary Jesosy niteny
taminy niaraka tamin'izay hoe: Matokia, fa Izaho ihany, aza matahotra.
28 Ary Petera namaly
Azy ka nanao hoe: Tompoko, raha Hianao ihany, dia asaovy manatona Anao eny
ambonin'ny rano aho.
29 Ary hoy Izy:
Manatona. Dia nidina niala tamin'ny sambokely Petera ka nandeha tambonin'ny
rano hanatona an'i Jesosy.
30 Fa raha nahita ny
rivotra* izy, dia natahotra, ary raha vao nilentika izy, dia niantso hoe: Tompo
ô, vonjeo aho![* Na: (rivotra mahery)]
31 Ary naninjitra ny
tànany niaraka tamin'izay Jesosy, dia nandray azy ka nanao taminy hoe: Ry kely
finoana, nahoana no niahanahana ianao?
32 Ary rehefa
niakatra teo an-tsambokely izy, dia nitsahatra ny rivotra.
33 Ary izay teo
an-tsambokely dia niankohoka teo anatrehany ka nanao hoe: Zanak'Andriamanitra
tokoa Hianao.
34 Ary nony
tafita izy, dia tonga teo an-tanety, any Genesareta.
35 Ary nony
nahafantatra Azy ny tompon-tany teo, dia naniraka tany amin'ny tany rehetra
manodidina izy ka nitondra ny marary rehetra ho eo aminy.
36 Ary
nangataka taminy ireo mba hamela azy hanendry na dia ny somotraviavin-dambany
ihany aza; koa na iza na iza no nanendry dia sitrana tokoa.
1 Dia nankeo
amin'i Jesosy ny Fariseo sy ny mpanora-dalàna sasany avy tany Jerosalema ka
nanao hoe:
2 Nahoana ny
mpianatrao no mandika ny fampianarana voatolotry ny razana? Fa tsy mba manasa
tanana izy, raha hihinan-kanina.
3 Ary Izy namaly ka
nanao taminy hoe: Nahoana kosa ianareo no mandika ny didin'Andriamanitra noho
ny fampianarana voatolotra anareo?
4 Fa Andriamanitra
efa nanao hoe: Manajà ny rainao sy ny reninao (Eks. 20. 12), ary koa: Izay miteny ratsy ny
rainy na ny reniny dia hatao maty tokoa (Eks. 21. 17).
5 Fa hoy kosa
ianareo: Na zovy na zovy no hilaza amin'ny rainy na ny reniny hoe: Efa
fanatitra ho an'Andriamanitra izay rehetra tokony hahazoanao soa avy amiko, dia
tsy mba hanaja ny rainy akory izy.
6 Koa dia foananareo
ny tenin'Andriamanitra noho ny fampianarana voatolotra anareo.
7 Ry
mpihatsaravelatsihy, marina ny naminanian'Isaia anareo hoe:
8 Ity firenena ity
manaja Ahy amin'ny molony; Fa ny fony kosa lavitra Ahy.
9 Koa foana ny
ivavahan'ireo amiko, raha mampianatra ny didin'olombelona ho fampianarana izy
(Isa. 29. 13).
10 Ary niantso ny
vahoaka hankeo aminy Izy ka nanao taminy hoe: Mihainoa ka mahafantara:
11 tsy izay miditra
amin'ny vava no mahaloto ny olona; fa izay mivoaka avy amin'ny vava, izany no
mahaloto ny olona.
12 Dia nankeo aminy
ny mpianatra ka nanao taminy hoe: Fantatrao va fa tafintohina ny Fariseo, raha
nandre izany teny izany?
13 Ary Izy namaly ka
nanao hoe: Ny zavatra rehetra izay tsy nambolen'ny Raiko Izay any an-danitra
dia hongotana.
14 Avelao izy;
mpitarika jamba izy; ary raha ny jamba no mitarika ny jamba, dia samy ho
latsaka any an-kady izy roa.
15 Ary Petera
namaly ka nanao taminy hoe: Lazao aminay ny hevitr'izany fanoharana izany.
16 Ary hoy
Jesosy: Hianareo koa va mbola tsy mahafantatra ihany?
17 Tsy
fantatrareo va fa izay rehetra miditra amin'ny vava dia mankao an-kibo ka
avoaka ao amin'ny fivoahana?
18 Fa izay
mivoaka avy amin'ny vava kosa dia avy amin'ny fo, ka izany no mahaloto ny
olona.
19 Fa avy
amin'ny fo no ivoahan'ny sain-dratsy, dia ny vonoan'olona, ny
fakam-badin'olona, ny fijangajangana, ny halatra, ny ampanga lainga, ny
fitenenan-dratsy*;[*Gr. blasfemia, izahao 9. 3]
20 izany no
mahaloto ny olona; fa ny mihinana amin'ny tanana tsy misasa tsy mba mahaloto ny
olona.
21 Dia niala
teo Jesosy ka nankany amin'ny fari-tanin'i Tyro sy Sidona.
22 Ary, indro,
nisy vehivavy Kananita anankiray nivoaka avy tamin'izany tany izany ka niantso
nanao hoe: Mamindrà fo amiko, Tompoko, Zanak'i Davida ô! ny zanako-vavy
ampahorin'ny demonia loatra.
23 Fa Izy tsy
namaly teny azy. dia nanatona ny mpianany ka nangataka taminy nanao hoe: Roahy
izy, fa miantso mafy ato aoriantsika.
24 Ary Izy
namaly ka nanao hoe: Tsy nirahina Aho afa-tsy ho amin'ny ondry very amin'ny
taranak'isiraely.
25 Fa nanatona
ihany ravehivavy, dia niankohoka teo anatrehany ka nanao hoe: Tompoko ô, vonjeo
aho.
26 Fa Izy
namaly ka nanao hoe: Tsy mety raha maka ny mofon-jaza ka manipy azy ho an'ny
amboakely.
27 Fa hoy
ravehivavy: Marina izany, Tompoko; fa na dia ny amboakely aza mba mihinana izay
sombintsombiny latsaka avy amin'ny latabatry ny tompony ihany.
28 Dia namaly
Jesosy ka nanao taminy hoe: Ravehivavy, lehibe ny finoanao; tongava aminao
araka izay irinao. Dia sitrana ny zananivavy tamin'izay ora izay.
29 Ary raha
niala teo Jesosy, dia nankany amoron'ny Ranomasin'i Galilia Izy; ary niakatra
nankeo an-tendrombohitra Izy ka nipetraka teo;
30 ary nisy
vahoaka betsaka nankeo aminy nitondra ny mandringa, ny jamba, ny moana, ny
kilemaina, ary ny maro hafa koa, ka nametraka azy teo akaikin'ny tongotr'i
Jesosy; dia nahasitrana azy Izy;
31 ka dia
talanjona ny vahoaka, raha nahita ny moana miteny, ny kilemaina sitrana, ny
mandringa afaka, ary ny jamba mahiratra; dia nankalaza an'Andriamanitry ny
Isiraely izy.
32 Ary Jesosy
niantso ny mpianany hankeo aminy ka nanao hoe: Mahonena Ahy ny vahoaka, fa efa
nitoetra hateloana tatỳ amiko izy izao ka tsy manan-kohanina; ary tsy
tiako ny hampody azy tsy mihinana, fandrao reraka eny an-dalana izy.
33 Fa hoy ny
mpianatra taminy: Aiza no hahitanay mofo atỳ an-efitra ampy hahavoky izao
vahoaka betsaka izao!
34 Ary hoy
Jesosy taminy: Misy mofo firy any aminareo? Ary hoy izy: Fito sy hazandrano
madinika vitsy foana.
35 Ary Izy
nandidy ny vahoaka betsaka hipetraka amin'ny tany.
36 Dia nandray
ny mofo fito mbamin'ny hazandrano Izy, ary rehefa nisaotra, dia namaky ka
nanolotra azy ho an'ny mpianatra, ary ny mpianatra kosa nanolotra ho an'ny
vahoaka.
37 Ary nihinana
avokoa izy rehetra, ka dia voky; ary nangoniny ny sombintsombiny sisa tsy lany,
ka dia nahafeno sobiky fito.
38 Ary izay
nihinana dia efatra arivo lahy, afa-tsy ny zaza amim-behivavy.
39 Ary nony efa
nampody ny vahoaka Izy, dia niondrana an-tsambokely ka nankany amin'ny
sisin-tanin'i Magadana.
1 Ary ny
Fariseo sy ny Sadoseo nankeo aminy, dia naka fanahy Azy ka nangataka Azy haneho
famantarana aminy avy any an-danitra.
2 Ary Izy
namaly ka nanao taminy hoe: Nony hariva, dia hoy ianareo: Ho tsara ny andro, fa
mena ny lanitra.
3 Ary nony maraina,
dia hoy ianareo: Ho ratsy ny andro, fa mena sy manjombona ny lanitra.
Fantatrareo ny hamantatra ny tarehin'ny lanitra, fa ny famantarana ny fotoana
dia tsy hainareo.
4 Izay taranaka ratsy
fanahy sy mijangajanga dia fatra-pitady famantarana; nefa tsy misy famantarana
homena azy, afa-tsy ny famantarana ny amin'i Jona ihany. Ary nandao azy Jesosy
ka lasa.
5 Ary rehefa tonga
teny am-pita ny mpianatra, dia nanadino hitondra mofo izy.
6 Ary hoy Jesosy
taminy: Mihevera, ka mitandrema ianareo, fandrao azon'ny masirasiran'ny Fariseo
sy ny Sadoseo.
7 Dia niara-nisaina
izy ka nanao hoe: Ny tsy nitondrantsika mofo angaha izany.
8 Ary Jesosy nahalala
izany, dia nanao hoe: Nahoana ianareo, ry kely finoana, no miara-misaina satria
tsy manana mofo?
9 Tsy mbola
mahafantatra va ianareo, ary tsy tsaroanareo va ny mofo dimy ho an'ny dimy
arivo, ka firy harona moa no nangoninareo?
10 na ny mofo fito ho
an'ny efatra arivo, ka firy sobiky moa no nangoninareo?
11 Ahoana no tsy
ahafantaranareo fa tsy ny amin'ny mofo no nolazaiko taminareo? Fa tandremo,
fandrao azon'ny masirasiran'ny Fariseo sy ny Sadoseo.
12 Dia fantany fa tsy
nasainy hitandrina izy, fandrao azo'ny masirasira fanaovana mofo, fa andrao
azon'ny fampianaran'ny Fariseo sy ny Sadoseo.
13 Ary rehefa tonga
tany amin'ny faritanin'i Kaisaria-filipo Jesosy, dia nanontany ny mpianany Izy
ka nanao hoe: Ataon'ny olona ho iza moa ny Zanak'olona*?[*Na: (Aho)]
14 Dia hoy ireo: Hoy
ny sasany: Jaona Mpanao-batisa; ary hoy ny sasany: Elia; ary hoy ny sasany:
Jeremia, na anankiray amin'ny mpaminany.
15 Ary hoy Jesosy
taminy: Fa ianareo kosa manao Ahy ho iza?
16 Ary namaly Simona
Petera ka nanao hoe: Hianao no Kristy, Zanak'Andriamanitra velona.
17 Dia namaly Jesosy
ka nanao taminy hoe: Sambatra ianao, ry Simona Bar-jona; fa tsy nofo aman-drà
no naneho anao izany, fa ny Raiko Izay any an-danitra.
18 Ary Izaho milaza
aminao koa: Hianao no Petera*, ary ambonin'ity vatolampy ity no haoriko ny
fiangonako**; ary ny vavahadin'ny fiainan-tsi-hita*** tsy haharesy azy.
[*Petera = Vato; izahao Jao.1, 42] [**Gr. eklesia] [***Gr. Hadesy]
19 Homeko anao ny
fanalahidin'ny fanjakan'ny lanitra; ka na inona na inona fehezinao eto
ambonin'ny tany dia hofehezina any an-danitra; ary na inona na inona vahanao
etỳ ambonin'ny tany dia hovahana any an-danitra.
20 Ary tamin'izany
dia nandrara ny mpianatra Izy mba tsy hilaza amin'olona akory fa Izy no Kristy.
21 Hatramin'izany no
vao natoron'i Jesosy ny mpianany fa tsy maintsy hankany Jerosalema Izy ka
hampijalin'ny loholona sy ny lohan'ny mpisorona ary ny mpanora-dalàna, dia
hovonoina, ary hatsangana amin'ny andro fahatelo.
22 Ary Petera
nanohina Azy hitanila kely ka niteny mafy Azy hoe: Sanatria aminao izany,
Tompoko! Tsy ho aminao tokoa izany!
23 Fa Izy nihodina ka
niteny tamin'i Petera hoe: Mankanesa ato ivohoko, ry Satana; fahatafintohinana
amiko ianao, satria tsy misaina izay an'Andriamanitra ianao, fa izay an'ny olona.
24 Dia hoy Jesosy
tamin'ny mpianany: Raha misy olona ta-hanaraka Ahy, aoka izy handà ny tenany sy
hitondra ny hazo fijaliany ka hanaraka Ahy.
25 Fa na iza na iza
no ta-hamonjy ny ainy, dia hahavery azy; ary na iza na iza no hahavery ny ainy
noho ny amiko, dia hahazo izany.
26 Fa inona moa no
soa ho azon'ny olona, raha mahazo izao tontolo izao, kanefa very ny ainy? Ary
inona no homen'ny olona ho takalon'ny ainy?
27 Fa ho avy ny
Zanak'olona amin'ny voninahitry ny Rainy, mbamin'ny anjeliny, dia hamaly ny
olona rehetra araka ny nataony.
28 Lazaiko aminareo
marina tokoa: Misy ny sasany eto izay tsy mba hanandrana fahafatesana
mandra-pahitany ny Zanak'olona avy amin'ny fanjakany.
1 Ary nony afaka
henemana, Jesosy dia naka an'i Petera sy Jakoba ary Jaona rahalahiny ka
nitondra azy niakatra ho any an-tendrombohitra avo mba hitokana.
2 Dia niova tarehy
teo anatrehany Izy, ka ny tavany namirapiratra tahaka ny masoandro, ary ny
fitafiany tonga fotsy tahaka ny mazava.
3 Ary, indreo, niseho
tamin'ny mpianatra Mosesy sy Elia, niresaka tamin'i Jesosy.
4 Dia niteny Petera
ka nanao tamin'i Jesosy hoe: Tompoko, tsara raha mitoetra eto isika; koa raha
sitrakao, aoka aho hanao lay telo eto: ny anankiray ho Anao, ny anankiray ho
an'i Mosesy, ary ny anankiray ho an'i Elia.
5 Raha mbola niteny
izy, indro, nisy rahona mazava nanarona azy ireo; ary, injao, nisy feo avy tao
amin'ny rahona nanao hoe: Ity no Zanako malalako Izay sitrako; Izy no henoy.
6 Ary nony nandre
izany ny mpianatra, dia lavo niankohoka sady natahotra indrindra.
7 Ary Jesosy nankeo
aminy, dia nanendry azy ka nanao hoe; Mitsangàna, fa aza matahotra.
8 Ary nony
niandrandra izy ireo, dia tsy nahita olona, afa-tsy Jesosy irery ihany.
9 Ary rehefa nidina
avy tao an-tendrombohitra izy, dia nandrara azy Jesosy ka nanao hoe: Aza milaza
amin'olona ny fahitana, mandra-pitsangan'ny Zanak'olona amin'ny maty.
10 Ary ny mpianany
nanontany Azy ka nanao hoe: Nahoana ary no ilazan'ny mpanora-dalàna fa Elia tsy
maintsy ho avy aloha?
11 Ary Jesosy namaly
ka nanao hoe: Elia dia avy ihany ka hampody ny zavatra rehetra.
12 Nefa lazaiko
aminareo: Efa tonga sahady Elia; nefa ny olona tsy nahafantatra azy, fa nanao
izay sitraky ny fony taminy. Dia tahaka izany koa no hampiaretany ny
Zanak'olona.
13 Dia fantatry ny
mpianatra fa Jaona Mpanao-batisa no nolazainy taminy.
14 Ary rehefa tonga
teo amin'ny vahoaka izy ireo, nisy lehilahy anankiray nanatona an'i Jesosy, dia
nandohalika teo anatrehany ka nanao hoe:
15 Tompoko, mamindrà
fo amin'ny zanako-lahy, fa mararin'ny androbe izy ka mahantra tokoa; fa
matetika izy no mianjera ao amin'ny afo, ary matetika ao amin'ny rano.
16 Ary nitondra azy
tamin'ny mpianatrao aho, fa tsy nahay nahasitrana azy izy.
17 Ary Jesosy namaly
ka nanao hoe: Ry taranaka tsy mino sady efa nivadika, mandra-pahoviana no
hitoerako aminareo? Mandra-pahoviana no handeferako aminareo? Ento atỳ
amiko izy.
18 Ary niteny mafy
azy Jesosy, dia nivoaka taminy ny demonia, ka sitrana ilay zazalahy tamin'izay
ora izay.
19 Dia nankao amin'i
Jesosy mangingina ny mpianatra ka nanao hoe: Nahoana izahay no tsy nahavoaka
azy?
20 Ary hoy Jesosy
taminy: Noho ny fahakelezan'ny finoanareo ihany; fa lazaiko aminareo marina
tokoa: Raha manana finoana hoatra ny voan-tsinapy iray aza ianareo ka hiteny
amin'io tendrombohitra io hoe: Mifindrà erỳ , dia hifindra izy; ary tsy
hisy tsy ho hainareo hatao.
21 * [*Ampio hoe: (21
Kanefa iny karazana iny tsy mivoaka raha tsy avoaka amin'ny fivavahana sy ny
fifadian-kanina)]
22 Ary raha nitoetra
tany Galilia izy, Jesosy dia nilaza tamin'ny mpianany hoe: Ny Zanak'olona efa
hatolotra ho eo an-tànan'ny olona
23 ka hovonoiny, nefa
amin'ny andro fahatelo dia hatsangana indray Izy. Ary dia nalahelo indrindra
ireo.
24 Ary nony tonga tao
Kapernaomy izy, dia nankeo amin'i Petera ny mpandray ny antsasaky ny sekely ka
nanao hoe: Moa ny mpampianatra anareo tsy mba mandoa ny antsasaky ny sekely*
va?[*Gr. didrakma]
25 Dia hoy Petera:
Mandoa ihany Izy. Ary raha vao tafiditra tao an-trano Petera, dia nosakanan'i
Jesosy teny izy ka nataony hoe: Ahoana no hevitrao, ry Simona? Avy amin'iza moa
no andraisan'ny mpanjaka etỳ an-tany fadin-tseranana sy vola hetra? Avy
amin'ny zanany va, sa avy amin'ny olon-kafa?
26 Ary nony hoy
Petera taminy: Avy amin'ny olon-kafa, dia hoy kosa Jesosy: Dia afaka ary ny
zanaka.
27 Nefa andrao isika
manafintohina azy, dia mankanesa ao amin'ny ranomasina ianao, ka manjonoa; ary
raiso izay hazandrano azo voalohany, ka rehefa sokafanao ny vavany, dia hahita
vola sekely* eo ianao; dia raiso izany, ka omeo azy ho avy amiko sy ianao.
1 Tamin'izany ora
izany dia nankeo amin'i Jesosy ny mpianatra ka nanao hoe: Iza moa no lehibe
indrindra ao amin'ny fanjakan'ny lanitra?
2 Ary Jesosy niantso
zazakely anankiray hankeo aminy, dia nametraka azy teo afovoany
3 ka nanao hoe:
Lazaiko aminareo marina tokoa: Raha tsy miova* ianareo ka ho tonga tahaka ny
zazakely, dia tsy hiditra amin'ny fanjakan'ny lanitra mihitsy ianareo.[*Gr.
mitodika]
4 Koa na zovy na zovy
no hanetry tena tahaka ity zazakely ity, dia izy no ho lehibe indrindra amin'ny
fanjakan'ny lanitra.
5 Ary na zovy na zovy
no handray zazakely anankiray aza tahaka itony noho ny anarako, dia mandray
Ahy.
6 Fa na zovy na zovy
no hanafintohina na dia iray aza amin'ireny madinika mino Ahy ireny, dia tsara
lavitra ho azy raha anantonana vato lehibe* fikosoham-bary ny vozony, ka alentika
any amin'ny ranomasina lalina izy.[*Na: ahodim-boriky]
7 Lozan'izao tontolo
izao noho ny fahatafintohinana! fa tsy maintsy ho avy ny fahatafintohinana,
nefa lozan'izay olona mahatonga ny fahatafintohinana.
8 Koa raha ny tananao
na ny tongotrao no manafintohina anao, tapaho izy ka ario ho afaka aminao; fa
tsara ho anao ny hiditra kilemaina na mandringa any amin'ny fiainana noho ny
manana tanana roa sy tongotra roa, nefa hariana any amin'ny afo maharitra
mandrakizay.
9 Ary raha ny masonao
no manafintohina anao, esory hiala izy, ka ario ho afaka aminao; fa tsara ho
anao ny hiditra toka-maso amin'ny fiainana noho ny manana maso roa, nefa
hariana any amin'ny helo mirehitra afo.
10 Mitandrema,
fandrao manao tsinontsinona na dia ny iray aza amin'ireny madinika ireny
ianareo; fa lazaiko aminareo: Ny anjeliny any an-danitra mahita mandrakariva ny
tavan'ny Raiko Izay any an-danitra*.[*Ampio hoe:]
11 (Fa tonga ny
Zanak'olona hamonjy ny very.)
12 Ahoana no
hevitrareo? Raha misy olona manana ondry zato, ka mania ny anankiray moa tsy
hamela ny sivy amby sivi-folo eny an-tendrombohitra va izy ka handeha hitady
ilay nania?
13 Ary raha tàhiny
hitany izy, dia lazaiko aminareo marina tokoa fa mahafaly azy iny noho ny sivy
amby sivifolo izay tsy nania.
14 Ary tahaka izany,
dia tsy sitraky ny Rainareo Izay any an-danitra, raha ho very na dia iray aza
amin'ireny madinika ireny.
15 Ary raha manota
aminao ny rahalahinao, dia mankanesa any aminy, ka rehefa mitokana ianareo roa
lahy, dia asehoy azy ny fahadisoany. Raha mihaino anao izy, dia efa azonao ny
rahalahinao;
16 fa raha tsy
mihaino anao kosa izy, dia ento miaraka aminao ny olona iray na roa, mba ho
voaorina mafy avokoa ny teny rehetra amin'ny tenin'ny vavolombelona roa na telo
(Deo. 19. 15).
17 Ary raha tsy mety
mihaino ireo izy, dia ambarao amin'ny fiangonana*; ary raha tsy mety mihaino ny
fiangonana** koa izy, dia aoka hataonao ho tahaka ny jentilisa sy ny mpamory
hetra izy. [* Gr. eklesia] [** Gr. eklesia]
18 Lazaiko aminareo
marina tokoa: Na inona na inona fehezinareo etỳ ambonin'ny tany dia
hofehezina any an-danitra; ary na inona na inona vahanareo etỳ ambonin'ny
tany dia hovahana any an-danitra.
19 Ary lazaiko
aminareo koa: Raha misy roa aminareo mifanaiky etỳ ambonin'ny tany na
amin'inona na amin'inona ka hangataka izany, dia ho azony avy amin'ny Raiko
Izay any an-danitra izany.
20 Fa na aiza na aiza
no iangonan'ny roa na telo amin'ny anarako, dia ao afovoany Aho.
21 Dia nanatona
Petera ka nanao taminy hoe: Tompoko, impiry moa no hanotan'ny rahalahiko amiko,
ka havelako izy? Hatramin'ny impito va?
22 Fa hoy Jesosy
taminy: Tsy lazaiko aminao hoe: Hatramin'ny impito, fa hatramin'ny impito amby
fito-polo*.[*Na: fito-polo impito]
23 Koa amin'izany ny
fanjakan'ny lanitra dia tahaka ny mpanjaka anankiray, izay te-hidinika amin'ny
mpanompony ny amin'ny volany.
24 Ary raha vao
nidinika izy, dia nisy anankiray nentina teo aminy, izay nitrosa talenta* iray
alina.[*Anaram-bola; ny talenta volafotsy dia sekely telo arivo]
25 Ary satria tsy
nanan-kaloa izy, dia nasain'ny tompony hamidy izy sy ny vadiny aman-janany
mbamin'ny fananany rehetra handoavana ny trosa.
26 Dia niankohoka teo
anatrehany ilay mpanompo ka nanao hoe: Tompoko, omeo andro aho, fa haloako ny
anao rehetra.
27 Ary ny
tompon'izany mpanompo izany dia onena azy ka nandefa azy sady namoy ny trosa
taminy.
28 Nefa nony nivoaka
izany mpanompo izany, dia nahita mpanompo namany anankiray, izay nitrosa
denaria* zato taminy; dia nosamboriny izy ka notraohiny sady nataony hoe:
Aloavy izay trosako aminao.[*Anaram-bola tokony ho venty no heviny]
29 Fa niankohoka ilay
mpanompo namany ka nifona taminy nanao hoe: Omeo andro aho, fa haloako ny anao.
30 Nefa tsy nety izy,
fa lasa nampanao azy tao an-tranomaizina mandra-pandoany ny trosa.
31 Ary nony
hitan'ireo mpanompo namany izay efa natao, dia nalahelo indrindra izy ka
nandeha nanambara tsara tamin'ny tompony izany rehetra natao izany.
32 Dia nampanalain'ny
tompony ralehilahy ka noteneniny hoe: Ry mpanompo ratsy fanahy, efa nafoiko
ilay trosa rehetra taminao, satria nifona tamiko ianao;
33 moa tsy tokony mba
ho namindra fo tamin'ny mpanompo namanao koa va ianao tahaka ny namindrako fo
taminao?
34 Dia tezitra ny
tompony ka nanolotra azy ho amin'ny mpampijaly mandra-pandoany ny trosa
rehetra.
35 Ary tahaka izany koa
no hataon'ny Raiko Izay any an-danitra aminareo, raha tsy samy mamela ny
rahalahinareo amin'ny fonareo avy ianareo.
1 Ary rehefa vitan'i
Jesosy izany teny izany, dia niala tany Galilia Izy ka nihazo ny lalana teny
an-dafin'i Jordana, dia tonga tany amin'ny sisin'i Jodia.
2 Ary nisy vahoaka
betsaka nanaraka Azy, dia nahasitrana azy teo Izy.
3 Ary nisy Fariseo
nanatona Azy*, dia naka fanahy Azy hoe: Mahazo misaotra ny vadiny va ny
lehilahy noho izay rehetra entiny iampangany azy na inona na inona?[*Na: (Ary
nanatona Azy ny Fariseo)]
4 Ary Izy namaly ka
nanao hoe: Tsy mbola novakinareo va ny teny, fa Izay nahary azy tamin'ny
voalohany dia nahary azy ho lahy sy vavy (Gen. 1. 27), ka dia nanao hoe:
5 Ary noho izany ny
lehilahy dia handao ny rainy sy ny reniny ka hikambana amin'ny vadiny; ary dia
ho nofo iray ihany izy roroa. (Gen. 2. 24)?
6 ka dia tsy
roa intsony izy, fa nofo iray ihany. Koa amin'izany, izay
nampiraisin'Andriamanitra dia aoka tsy hampisarahin'olona.
7 Hoy ireo
taminy: Nahoana ary Mosesy no nandidy hanome taratasy fisaoram-bady sy hisaotra
azy? (Deo. 24. 1).
8 Ary hoy
Jesosy taminy: Ny hamafin'ny fonareo no namelan'i Mosesy anareo hisao-bady; fa
tamin'ny voalohany dia tsy mba toy izany.
9 Fa lazaiko
aminareo: Na zovy na zovy no misaotra ny vadiny, afa-tsy noho ny fijangajangana
ihany, ka mampakatra ny hafa, dia mijangajanga; ary izay mampakatra ny
voasaotra dia mijangajanga koa.
10 Dia hoy ny
mpianatra taminy: Raha izany no toetry ny lehilahy amin'ny vadiny, dia aleo tsy
manambady.
11 Fa hoy Izy
taminy: Tsy ny olona rehetra no mahay mandray izany teny izany, fa izay nomena
ihany;
12 fa misy
ionoka, izay teraka ionoka hatrany an-kibon-dreniny; ary misy ionoka, izay
nataon'ny olona ionoka; ary misy ionoka, izay nanao ny tenany ionoka noho ny
fanjakan'ny lanitra. Aoka handray izany izay mahay mandray.
13 Ary
tamin'izany dia nisy zazakely nentina teo amin'i Jesosy mba hametrahany ny
tànany sy hivavahany ho azy; fa ny mpianany niteny mafy ireny.
14 Nefa Jesosy
kosa nanao hoe: Avelao ny zaza, ary aza raràna tsy hanatona Ahy; fa an'ny toa
azy ny fanjakan'ny lanitra.
15 Ary nony
nametraka ny tànany taminy Izy, dia niala teo.
16 Ary, indro,
nisy anankiray nanatona Azy ka nanao hoe: Mpampianatra ô*, inona no tsara
hataoko hahazoako fiainana mandrakizay?[*Na: (Mpampianatra tsara ô)]
17 Fa hoy Jesosy
taminy: Nahoana Aho no anontanianao ny amin'izay tsara? Iray no tsara*; fa raha
te-hiditra any amin'ny fiainana ianao, tandremo ny didy.[*Na: (Nahoana Aho no
ataonao tsara? Tsy misy tsara afa-tsy iray ihany dia Andriamanitra.)]
18 Hoy ralehilahy
taminy: Inona avy moa? Dia hoy Jesosy: Ny hoe: Aza mamono olona, Aza
mijangajanga, Aza mangalatra, Aza mety ho vavolombelona mandainga,
19 Manajà ny
rainao sy ny reninao (Eks. 20:12-16), ary: Tiava ny namanao tahaka ny tenanao
(Lev. 19:18).
20 Hoy ilay
zatovo taminy: Izany rehetra izany efa voatandriko avokoa; fa inona no tsy
mbola mahatanteraka ahy?
21 Dia hoy
Jesosy taminy: Raha tia ho tanteraka ianao, mandehana, amidio ny fanananao, ka
omeo ny malahelo, dia hanana rakitra any an-danitra ianao; ary avia hanaraka
Ahy.
22 Fa nony nandre
izany teny izany ilay zatovo, dia niala tamin'alahelo izy, satria nanana
fananana be.
23 Dia hoy Jesosy
tamin'ny mpianany: Lazaiko aminareo marina tokoa fa sarotra ny hidiran'ny manan-karena
amin'ny fanjakan'ny lanitra.
24 Ary hoy Izaho
aminareo indray: Ho moramora kokoa ny hidiran'ny rameva amin'ny vodi-fanjaitra
noho ny hidiran'ny manan-karena amin'ny fanjakan'Andriamanitra.
25 Ary nony nandre
izany ny mpianatra, dia talanjona indrindra ka nanao hoe: Iza indray no azo
hovonjena?
26 Ary Jesosy nijery
azy ka nanao taminy hoe: Tsy hain'ny olona izany, fa hain'Andriamanitra ny
zavatra rehetra.
27 Dia namaly Petera
ka nanao taminy hoe: Indro, izahay efa nahafoy ny zavatra rehetra ka nanaraka
Anao; koa inona ary no ho azonay?
28 Fa hoy Jesosy
taminy: Lazaiko aminareo marina tokoa fa rehefa mby amin'ny fanavaozana*, ka
hipetraka amin'ny seza fiandrianan'ny voninahiny ny Zanak'olona, ianareo koa,
izay nanaraka Ahy, dia hipetraka amin'ny seza fiandrianana roa ambin'ny folo ka
hitsara ny firenen'isiraely roa ambin'ny folo.[*Gr.fiteraham-baovao]
29 Ary izay rehetra
efa nahafoy trano, na rahalahy, na anabavy, na ray, na reny*, na zanaka, na
tany, noho ny anarako, dia handray zato heny ka handova fiainana
mandrakizay.[*Ampio hoe: (na vady.)]
30 Nefa maro
izay voalohany no ho farany, ary izay farany no ho voalohany.
1 Fa ny
fanjakan'ny lanitra dia tahaka ny lehilahy tompon-trano, izay nivoaka maraina
koa hanakarama mpiasa ho any an-tanim-boalobony.
2 Ary rehefa
nifanekeny tamin'ny mpiasa fa ho denaria isan'andro ny karamany, dia nasainy
nankany amin'ny tanim-boalobony ireny.
3 Ary nivoaka
tamin'ny ora fahatelo izy, dia nahita ny sasany nitoetra foana tany an-tsena,
4 ka hoy izy
taminy: Mandehana koa ianareo hankany amin'ny tanim-boaloboka, fa izay
an-keviny marina dia homeko anareo. Ka dia lasa ireny.
5 Ary nivoaka
tamin'ny ora fahenina sy fahasivy indray izy ka nanao toy izany koa.
6 Ary rehefa
tokony ho tamin'ny ora fahiraika ambin'ny folo dia nivoaka izy ka nahita ny
sasany mitoetra eo, dia hoy izy taminy: Nahoana ianareo no mitoetra foana eto
mandritra ny andro?
7 Hoy izy
taminy: Satria tsy nisy olona nanakarama anay. Dia hoy ralehilahy taminy:
Mandehana koa ianareo mankany amin'ny tanim-boaloboka.
8 Ary rehefa
hariva ny andro, dia hoy ny tompon'ny tanim-boaloboka tamin'ny mpitandrina ny
raharahany: Antsoy ny mpiasa, ka aloavy ny karamany: atombohy amin'ireo
taoriana ka vao hatramin'ireo voalohany.
9 Ary rehefa
tonga ireo nokaramaina tamin'ny ora fahiraika ambin'ny folo, dia nahazo denaria
misesy avy izy.
10 Fa rehefa
tonga ireo voalohany, dia nanantena hahazo mihoatra izy; kanjo samy denaria
misesy avy ihany no azony.
11 Ary rehefa
nahazo izany izy, dia nimonomonona tamin'ny tompon-trano ka nanao hoe:
12 Ireo olona
farany ireo dia niasa ora iray monja, kanefa nataonao mitovy aminay, izay
niaritra ny fahatrotrahana sy ny hainandro.
13 Fa izy
namaly ka nanao tamin'ny anankiray amin'ireny hoe: Ry sakaiza, tsy mba manao
izay tsy marina aminao aho; tsy efa denaria va no nifanekenao tamiko?
14 Raiso ny
anao, ka mandehana; fa ilay farany dia tiako homena toraka ny anao koa.
15 Tsy mahazo
manao izay tiako amin'ny ahy va aho? Ratsy va ny masonao, satria tsara aho?
16 Dia toy
izany, ny farany ho voalohany, ary ny voalohany ho farany.
17 Ary Jesosy,
nony niakatra ho any Jerosalema, dia naka mangingina ny mpianatra roa ambin'ny
folo lahy ka niteny taminy teny an-dalana hoe:
18 Indro,
miakatra ho any Jerosalema isika; ary ny Zanak'olona hatolotra ho amin'ireo
lohan'ny mpisorona sy ny mpanora-dalàna, dia hohelohiny ho faty Izy
19 ka hatolony
amin'ny jentilisa mba hataony ho fihomehezana sy hokapohiny sy hohomboany
amin'ny hazo fijaliana; ary amin'ny andro fahatelo dia hatsangana indray Izy.
20 Ary tamin'izany
dia nanatona an'i Jesosy ny renin'ny zanak'i Zebedio mbamin'ny zananilahy, dia
niankohoka ka nangataka zavatra taminy.
21 Ary hoy Izy
taminy: Inona no irinao? Dia hoy ravehivavy taminy: Mandidia mba
hipetrahan'ireto zanako roa lahy ireto, ny anankiray ho eo amin'ny ankavananao,
ary ny anankiray ho eo amin'ny ankavianao, ao amin'ny fanjakanao.
22 Fa Jesosy
namaly ka nanao hoe: Tsy fantatrareo izay angatahinareo; hainareo va ny misotro
amin'ny kapoaka izay efa hisotroako? Hoy izy roa lahy taminy: Hainay ihany.
23 Hoy kosa Izy
taminy: Hisotro amin'ny kapoakako tokoa ianareo; fa ny hipetraka eo an-tanako
ankavanana sy eo an-tanako ankavia, dia tsy Ahy ny hanome izany; fa izay
nanamboaran'ny Raiko izany no homena.
24 Ary nony
nandre izany izy folo lahy, dia tezitra noho ny nataon'izy mirahalahy.
25 Fa Jesosy
niantso azy hankeo aminy ka nanao hoe: Fantatrareo fa ny andrianan'ny jentilisa
mampanompo azy tokoa, ary ny lehibeny manapaka azy fatratra.
26 Fa tsy mba ho toy
izany aminareo; fa izay te-ho lehibe aminareo dia ho mpanompo anareo;
27 ary izay te-ho
ambony indrindra aminareo dia ho mpanomponareo.
28 Fa tahaka izany,
ny Zanak'olona tsy tonga mba hotompoina, fa mba hanompo ka hanolotra ny ainy ho
avotra hisolo ny maro.
29 Ary raha niala tao
Jeriko izy, dia nisy vahoaka betsaka nanaraka an'i Jesosy.
30 Ary, indreo, nisy
jamba roa lahy nipetraka teo amoron-dalana, ary nony reny fa Jesosy no mandalo,
dia niantso izy ka nanao hoe: Mamindrà fo aminay, ry Tompo, Zanak'i Davida ô!
31 Ary ny vahoaka
niteny mafy azy mba hangina; fa vao mainka niantsoantso izy ka nanao hoe:
Mamindrà fo aminay, ry Tompo, Zanak'i Davida ô!
32 Ary Jesosy
nijanona, dia niantso azy ka nanao hoe: Inona no tianareo hataoko aminareo?
33 Hoy izy taminy:
Tompoko ô, ny mba hampahiratina ny masonay.
34 Ary Jesosy dia
onena azy ka nanendry ny masony; ary nahiratra niaraka tamin'izay izy, dia
nanaraka an'i Jesosy.
1 Ary raha nanakaiky
an'i Jerosalema izy ka tonga tao Betifaga any an-tendrombohitra Oliva, dia
naniraka mpianatra roa lahy Jesosy ka nanao taminy hoe:
2 Mankanesa amin'iroa
vohitra tandrifinareo iroa, ary miaraka amin'izay dia hahita boriky mifatotra
sy ny zanany eo aminy ianareo; vahao izy, dia ento etỳ amiko.
3 Ary raha misy
miteny anareo, dia lazao hoe: Misy raharaha analan'ny Tompo azy; ary dia
havelany ho entina miaraka amin'izay izy.
4 Izany dia tonga mba
hahatanteraka izay nampilazaina ny mpaminany hoe:
5 Lazao amin'i Ziona
zanakavavy; Indro, ny Mpanjakanao avy ho anao, Malemy fanahy sady mitaingina
boriky, Dia zanaky ny boriky miasa* (Zak. 9. 9).[*Gr. mitondra zioga]
6 Ary dia nandeha ny
mpianatra ka nanao araka izay nandidian'i Jesosy azy,
7 dia nentiny
ny boriky sy ny zanany ary nataony teo amboniny ny lambany, ary Jesosy dia
nitaingina azy.
8 Ary ny
ankabiazan'ny vahoaka dia namelatra ny lambany teny an-dalana; ary ny sasany
nanapaka rantsan-kazo, dia nahahany teny an-dalana koa izany.
9 Ary ny
vahoaka izay nialoha Azy sy izay nanaraka dia niantso hoe: Hosana* ho an'ny
Zanak'i Davida! Isaorana anie Izay avy amin'ny anaran'i Jehovah! Hosana* any
amin'ny avo indrindra (Sal. 118. 26).[*Hosana = vonjeo re!]
10 Ary nony efa
tafiditra tany Jerosalema Izy, dia nihorakoraka ny tanàna rehetra ka nanao hoe:
Iza moa izao?
11 Ary ny
vahoaka nilaza hoe: Izao no Jesosy mpaminany Izay avy any Nazareta any Galilia.
12 Ary Jesosy
niditra teo an-kianjan'ny tempolin'Andriamanitra, dia nandroaka izay rehetra
nivarotra sy nividy teo an-kianjan'ny tempoly ka nanjera ny latabatry ny
mpanakalo vola sy ny fipetrahan'ny mpivarotra ny voromailala;
13 dia hoy Izy
taminy: Efa voasoratra hoe: Ny tranoko hatao hoe trano fivavahana (Isa. lvi.
7); fa ianareo kosa manao azy ho zohy fieren'ny jiolahy (Jer. 7. 11).
14 Ary nisy
jamba sy mandringa nanatona Azy teo an-kianjan'ny tempoly, dia nahasitrana azy
Izy.
15 Fa nony
hitan'ny lohan'ny mpisorona sy ny mpanora-dalàna ny zavatra mahagaga izay
nataony sy ny ankizy madinika miantso eo an-kianjan'ny tempoly ka manao hoe:
Hosana ho an'ny Zanak'i Davida! - dia tezitra izy
16 ka nanao
taminy hoe: Renao va izay lazain'ireo? Dia hoy Jesosy taminy: Eny; tsy mbola
novakinareo va ny teny manao hoe: Avy amin'ny vavan'ny ankizy madinika sy ny
zaza minono no nanamboaranao fiderana (Sal. 8. 2)?
17 Dia nandao
azy Izy ka niala tao an-tanàna hankany Betania; ary dia nitoetra tao mandritra
ny alina Izy.
18 Ary nony
niverina maraina hankany an-tanàna Izy, dia noana.
19 Ary nahita
hazo aviavy* anankiray teo amoron-dalana Izy, dia nankeo aminy, kanjo tsy
nahita na inona na inona teo aminy, afa-tsy ravina ihany; dia hoy Izy taminy:
Aza misy voa avy aminao intsony mandrakizay. Dia maina vetivety foana ilay hazo
aviavy.[*aviavimbazaha]
20 Ary nony
hitan'ny mpianatra izany, dia gaga izy ka nanao hoe: Nanao ahoana re no dia
nahamaina vetivety io aviavy io?
21 Ary Jesosy
namaly ka nanao taminy hoe: Lazaiko aminareo marina tokoa: Raha manam-pinoana
ianareo ka tsy miahanahana, dia tsy izao natao tamin'ny aviavy izao ihany no ho
vitanareo, fa raha hiteny amin'ity tendrombohitra ity aza ianareo ka hanao hoe:
Mifindrà ianao, ka mianjerà any an-dranomasina, dia ho tonga izany.
22 Ary na inona na
inona no angatahinareo amin'ny fivavahana atao amin'ny finoana dia ho azonareo.
23 Ary rehefa
tafiditra teo an-kianjan'ny tempoly Jesosy ka nampianatra, dia nanatona Azy ny
lohan'ny mpisorona sy ny loholona ka nanao hoe: Fahefana manao ahoana no
anaovanao izao? Ary iza no nanome Anao izao fahefana izao?
24 Ary Jesosy namaly
ka nanao taminy hoe: Izaho kosa hanontany anareo zavatra iray loha, ary raha
hovalianareo izany, Izaho kosa dia hilaza aminareo izay fahefana anaovako
izany:
25 Ny batisan'i
Jaona, avy taiza moa izany? Avy tany an-danitra va, sa avy tamin'ny olona? Ary
izy ireo niara-nisaina* ka nanao hoe: Raha holazaintsika hoe mantsy: Avy tany
an-danitra, dia hovaliany hoe isika: Ka nahoana no tsy nino azy
ianareo?[*Na:nieritreritra]
26 Ary raha
holazaintsika hoe kosa: Avy tamin'ny olona, dia matahotra ny vahoaka isika,
satria ataon'izy rehetra ho mpaminany Jaona.
27 Dia namaly
an'i Jesosy izy ka nanao hoe: Tsy fantatray. Dia hoy Jesosy taminy: Izaho kosa
tsy hilaza aminareo izay fahefana anaovako izany.
28 Fa ahoana kosa no
hevitrareo? Nisy lehilahy nanana zanaka roa lahy; dia nankeo amin'ny lahimatoa
izy ka nanao hoe: Anaka, andeha miasa any amin'ny tanim-boaloboko anio.
29 Fa namaly izy ka
nanao hoe: Tsy handeha aho; nefa nony afaka izany, dia nanenina izy ka nandeha
ihany.
30 Dia nankeo amin'ny
faralahy izy ka niteny toy izany koa. Ary izy namaly ka nanao hoe: Handeha aho,
tompoko; kanjo tsy nandeha izy.
31 Ka iza moa
amin'izy mirahalahy no nanao ny sitrapon'ny rainy? Hoy izy: Ny lahimatoa. Dia
hoy Jesosy taminy: Lazaiko aminareo marina tokoa fa ny mpamory hetra sy ny
vehivavy janga efa mialoha anareo ho amin'ny fanjakan'Andriamanitra.
32 Fa Jaona nankany
aminareo tamin'ny lalan'ny fahamarinana, nefa tsy nino azy ianareo; fa ny mpamory
hetra sy ny vehivavy janga no nino azy; fa ianareo kosa, na dia efa nahita
izany aza, dia mbola tsy nanenina mba hinoanareo azy.
33 Mihainoa
fanoharana hafa koa: Nisy lehilahy tompon-trano nanao tanim-boaloboka, dia
namefy azy manodidina dia nihady famiazana teo anatiny, dia nanao tilikambo,
ary dia nahofany tamin'olona mpiasa tany izany, ka nandeha ho any amin'ny tany
hafa izy.
34 Ary rehefa mby
akaiky ny taom-pahavokarana, dia naniraka ny mpanompony izy hankany amin'ny
mpiasa tany handray ny vokatra.
35 Fa ny mpiasa tany
nisambotra ny mpanompony, ka ny anankiray nokapohiny, ary ny anankiray
novonoiny, ary ny anankiray notorahany vato.
36 Dia naniraka
mpanompo hafa koa indray izy, maro noho ny teo; fa nataony toy izany koa ireny.
37 Ary nony farany dia
naniraka ny zanany hankany aminy izy ka nanao hoe: Hanaja ny zanako izy.
38 Kanjo ny mpiasa
tany, nony nahita ny zanaka, dia niresaka hoe: Ity no mpandova; andeha
hovonointsika izy, dia ho lasantsika ny lovany.
39 Ary nisambotra azy
izy ka namoaka azy teo ivelan'ny tanim-boaloboka, dia namono azy.
40 Koa raha tonga ny
tompon'ny tanim-boaloboka, hataony ahoana moa izany mpiasa tany izany?
41 Hoy izy taminy:
Hataony loza tokoa ny handringanany izany olon-doza izany, ary ny
tanim-boaloboka dia hahofany amin'ny mpiasa tany sasany izay hanome azy ny
vokatra amin'ny fotoany avy.
42 Hoy Jesosy taminy:
Tsy mbola novakinareo va ny teny ao amin'ny Soratra Masina hoe: Ny vato izay
nolavin'ny mpanao trano, Dia izy no efa natao fehizoro; Avy tamin'i Jehovah
izao Ka mahagaga eo imasontsika? (Sal. 118. 22-23).
43 Ary noho izany dia
lazaiko aminareo hoe: Hesorina aminareo ny fanjakan'Andriamanitra ka homena
izay firenena mahavokatra ny voany.
44 Ary izay potraka
amin'ity vato ity dia ho torotoro, fa na zovy na zovy no hianjerany, dia ho
mongomongo*.[*Gr. haely toy ny vovoka]
45 Ary rehefa ren'ny
lohan'ny mpisorona sy ny Fariseo ny fanoharana nataon'i Jesosy, dia fantany fa
ny tenany no nolazainy amin'izany.
46 Dia nitady
hisambotra Azy izy, saingy natahotra ny vahoaka, satria nataon'ny vahoaka ho
mpaminany Jesosy.
1 Ary Jesosy namaly,
dia nilaza fanoharana taminy indray ka nanao hoe:
2 Ny fanjakan'ny
lanitra dia tahaka ny mpanjaka, izay nanao fanasana fampakaram-bady ho an'ny
zananilahy.
3 Ary izy naniraka ny
mpanompony hiantso izay efa nasaina mba hankao amin'ny fampakaram-bady; fa tsy
nety ho avy ireo.
4 Dia naniraka
mpanompo hafa koa indray izy ka nanao hoe: Lazao amin'ny efa nasaina hoe:
Indro, efa voavoatra ny nahandroko; efa voavono ny ombiko sy ny nafahiko, ka
efa voavoatra avokoa ny zavatra rehetra; koa mankanesa atỳ amin'ny
fampakaram-bady ianareo.
5 Nefa tsy nahoany
akory izany, fa samy lasa nandeha izy, ny anankiray ho any amin'ny sahany, ary
ny anankiray ho any amin'ny varony.
6 Ary ny sisa
nisambotra ny mpanompony, dia nisetrasetra taminy ka namono azy.
7 Ary dia tezitra
ilay mpanjaka ka naniraka ny miaramilany, dia nandringana izany mpamono olona
izany sady nandoro ny tanànany.
8 Dia hoy izy
tamin'ny mpanompony: Efa voavoatra ny fampakaram-bady, fa ny efa nasaina no tsy
miendrika.
9 Koa mankanesa
ianareo any amin'ny sampanan-dalana, ary izay hitanareo, dia asao ho ao amin'ny
fampakaram-bady.
10 Dia nivoaka ho any
amin'ny lalana ireny mpanompo ireny ka namory izay rehetra hitany, na ny ratsy,
na ny tsara; ary dia feno mpihinana ny fampakaram-bady.
11 Ary nony efa
niditra ny mpanjaka hizaha ny mpihinana, dia nahita lehilahy anankiray izay tsy
niakanjo ny akanjo fitondra amin'ny fampakaram-bady.
12 Dia hoy izy
taminy: Ry sakaiza, ahoana no idiranao eto, nefa ianao tsy miakanjo ny akanjo
fitondra amin'ny fampakaram-bady? Dia sina izy.
13 Ary dia hoy ny
mpanjaka tamin'ny mpanompony: Afatory ny tongony aman-tànany, dia ario any
amin'ny maizina any ivelany izy; any no hisy ny fitomaniana sy ny
fikitroha-nify.
14 Fa maro no
antsoina, nefa vitsy no fidina.
15 Ary tamin'izay dia
lasa ny Fariseo ka niara-nisaina mba hamandrika Azy amin'ny teniny.
16 Dia naniraka ny
mpianany mbamin'ny Herodiana hankeo aminy izy ka nanao hoe: Mpampianatra ô,
fantatray fa marina Hianao ka mampianatra marina ny lalan'Andriamanitra ary tsy
manahy olona, satria tsy mba mizaha tavan'olona.
17 Koa lazao aminay
ary izay hevitrao: Moa mety va ny mandoa vola hetra ho an'i Kaisara, sa tsia?
18 Fa Jesosy nahalala
ny faharatsiany, dia nanao hoe: Nahoana no maka fanahy Ahy ianareo, ry
mpihatsaravelatsihy?
19 Asehoy Ahy
ny farantsakely fandoa amin'ny hetra. Dia nitondrany denaria Izy.
20 Ary hoy
Jesosy taminy: An'iza ity sary sy soratra ity?
21 Hoy izy
taminy: An'i Kaisara. Dia hoy Jesosy taminy: Aloavy ho an'i Kaisara ary izay
an'i Kaisara, ary ho an'Andriamanitra izay an'Andriamanitra.
22 Ary nony
nahare izy, dia gaga, ary dia nandao Azy ka lasa nandeha.
23 Tamin'izany
andro izany dia nankeo amin'i Jesosy ny Sadoseo sasany, izay milaza fa tsy misy
fitsanganan'ny maty, ka nanontany Azy hoe:
24 Mpampianatra
ô, Mosesy nilaza hoe: Raha misy maty momba, aoka ny rahalahiny hampakatra ny
vadiny ka hiteraka hamelo-maso ny rahalahiny (Deo. 25. 5).
25 Koa nisy
fito mirahalahy tetỳ aminay; ary ny zokiny nampaka-bady, dia maty, ary
satria tsy nanan-janaka iry, dia navelany ho an'ny rahalahiny ny vadiny;
26 ary toy
izany koa ny faharoa sy ny fahatelo, hatramin'ny fahafito.
27 Koa faran'izy
rehetra dia maty koa ravehivavy.
28 Ary amin'ny
fitsanganan'ny maty, ho vadin'iza amin'izy fito mirahalahy moa ravehivavy?
satria efa samy nanambady azy avokoa izy rehetra.
29 Ary Jesosy namaly
ka nanao taminy hoe: Mahadiso hevitra anareo ny tsi-fahafantaranareo ny Soratra
Masina na ny herin'Andriamanitra.
30 Fa amin'ny
fitsanganan'ny maty dia tsy mba hisy hampaka-bady, na havoaka hampakarina, fa
ho tahaka ny anjely* any an-danitra izy.[*Na: (anjelin'Andriamanitra)]
31 Fa ny amin'ny
fitsanganan'ny maty, moa tsy mbola novakinareo va ny teny nataon'Andriamanitra
taminareo manao hoe:
32 Izaho no
Andriamanitr'i Abrahama sy Andriamanitr'isaka ary Andriamanitr'i Jakoba (Eks.
3. 6)? Andriamanitra tsy an'ny maty, fa an'ny velona.
33 Ary ny vahoaka,
raha nandre, dia talanjona tamin'ny fampianarany.
34 Fa ny Fariseo,
nony nandre fa nampahasina ny Sadoseo Izy, dia niangona.
35 Ary ny anankiray
tamin'ireo, izay mpahay lalàna, nanontany naka fanahy Azy ka nanao hoe:
36 Mpampianatra ô, ny
didy manao ahoana moa no lehibe ao amin'ny lalàna?
37 Dia hoy Jesosy
taminy: Tiava an'i Jehovah Andriamanitrao amin'ny fonao rehetra sy ny fanahinao
rehetra ary ny sainao rehetra (Deo. 6. 5).
38 Izany no didy
lehibe sady voalohany.
39 Ary ny faharoa,
izay tahaka azy ihany, dia izao: Tiava ny namanao tahaka ny tenanao (Lev. 19. 18).
40 Izany didy
roa izany no ihantonan'ny lalàna rehetra sy ny mpaminany.
41 Ary rehefa
tafangona ny Fariseo, dia nanontany azy Jesosy ka nanao hoe:
42 Ahoana no
hevitrareo ny amin'i Kristy? Zanak'iza moa Izy? Hoy izy taminy: Zanak'i Davida.
43 Hoy Jesosy taminy:
Koa nahoana ary Davida amin'ny Fanahy no manao Azy hoe Tompo, ka manao hoe:
44 Jehovah nilaza
tamin'ny Tompoko hoe: Mipetraha eo an-tanako ankavanana Ambara-panaoko ny
fahavalonao ho eo ambanin'ny tongotrao (Sal. 110. 1)?
45 Koa raha Davida
ary manao Azy hoe Tompo, ahoana no maha-zanany Azy?
46 Dia tsy nisy
nahavaly Azy na dia teny iray akory aza; ary hatramin'izay andro izay dia tsy
nisy sahy nanontany Azy intsony.
1 Ary tamin'izany
Jesosy dia niteny tamin'ny vahoaka sy tamin'ny mpianany ka nanao hoe:
2 Eo amin'ny fipetrahan'i
Mosesy no ipetrahan'ny mpanora-dalàna sy ny Fariseo;
3 koa amin'izany,
izay rehetra lazainy dia ataovy ka tandremo; fa aza mba manao araka ny asany,
satria miteny ihany izy, nefa tsy manao.
4 Eny, mamehy entana
sady mavesatra no sarotra entina izy ka manaingina izany eo amin'ny soroky ny
olona, nefa ny tenany tsy mety manetsika izany na dia amin'ny rantsan-tànany
anankiray asa.
5 Ary ny asany
rehetra dia ataony mba ho hitan'ny. olona; fa ataony lehibe ny fylakiterany,
ary ataony vaventy ny somotraviaviny.
6 Ary tia ny
fitoerana aloha eo amin'ny fanasana izy, sy ny fipetrahana aloha eo amin'ny
synagoga
7 sy ny
hoharabain'ny olona eny an-tsena ary ny hataon'ny olona hoe: Raby ô!
8 Fa ianareo
kosa aza mba mety hatao hoe: Raby ô; fa iray ihany no mpampianatra anareo, ary
ianareo rehetra dia mpirahalahy avokoa.
9 Ary aza
milaza olona etỳ an-tany ho rainareo; fa iray ihany no Rainareo, dia Izay
any an-danitra.
10 Ary aza mba
mety hatao hoe mpitarika ianareo; fa iray ihany no Mpitarika anareo, dia
Kristy.
11 Fa izay lehibe
aminareo no ho mpanompo anareo.
12 Fa izay
manandra-tena no haetry; ary izay manetry tena no hasandratra.
13 Fa lozanareo,
mpanora-dalàna sy Fariseo, mpihatsaravelatsihy! fa arindrinareo eo anoloan'ny
olona ny fanjakan'ny lanitra; fa ianareo tsy miditra, ary izay miditra dia tsy
avelanareo hiditra*.[*Ampio hoe:]
14 (Lozanareo
mpanora-dalàna sy Fariseo, mpihatsaravelatsihy! Fa laninareo ny tranon'ny
mpitondratena, ary dia manao vavaka lavareny ho fiolahana ianareo; koa izany no
hahazoanareo fahamelohana mafimafy kokoa.)
15 Lozanareo,
mpanora-dalàna sy Fariseo, mpihatsaravelatsihy! fa mandeha mitety ny ranomasina
sy ny tany maina ianareo mba hahazoanareo na dia iray ihany aza ho proselyta;
ary rehefa azonareo izy, dia ataonareo zanaky ny helo mihoatra indroa noho
ianareo aza.
16 Lozanareo,
mpitarika jamba izay manao hoe: Raha misy mianiana amin'ny tempoly, dia tsy
mampaninona izany; fa raha misy mianiana amin'ny volamena amin'ny tempoly, dia
haningo-tena izy.
17 Ry adala sy jamba!
iza no lehibe, ny volamena va, sa ny tempoly izay nahamasina ny volamena?
18 Ary koa: Raha misy
mianiana amin'ny alitara, dia tsy mampaninona izany; fa raha misy mianiana
amin'ny fanatitra eo amboniny, dia haningo-tena izy.
19 Ry jamba! iza no
lehibe, ny fanatitra, sa ny alitara izay mahamasina ny fanatitra?
20 Koa amin'izany,
izay mianiana amin'ny alitara, dia mianiana aminy mbamin'ny zavatra rehetra
izay eo amboniny.
21 Ary izay mianiana
amin'ny tempoly dia mianiana aminy mbamin'izay mitoetra ao anatiny.
22 Ary izay mianiana
amin'ny lanitra dia mianiana amin'ny seza fiandrianan'Andriamanitra mbamin'izay
mipetraka eo amboniny.
23 Lozanareo,
mpanora-dalàna sy Fariseo, mpihatsaravelatsihy! fa mandoa ny fahafolon'ny
solila sy ny aneta ary ny komina* ianareo, nefa navelanareo izay lehibe amin'ny
lalàna, dia ny rariny sy ny famindram-po ary ny finoana; ireto tokony ho
nataonareo, nefa tsy tokony havelanareo ireroana.[*Anaran-java-maniry ireo]
24 Ry mpitarika
jamba! tantavaninareo ny moka, nefa atelinareo ny rameva.
25 Lozanareo,
mpanora-dalàna sy Fariseo, mpihatsaravelatsihy! fa diovinareo ny vohon'ny
kapoaka sy ny lovia, nefa ny ao anatiny dia feno rombaka sy tsi-fahononana.
26 Ry Fariseo jamba!
diovy aloha ny atin'ny kapoaka sy ny lovia, mba ho madio koa ny vohony.
27 Lozanareo,
mpanora-dalàna sy Fariseo, mpihatsaravelatsihy! fa ianareo dia tahaka ny fasana
voalalotra fotsy, izay miseho tsara tarehy eo ivelany, nefa ny ao anatiny dia
feno taolan'ny maty mbamin'ny fahalotoana rehetra.
28 Dia tahaka izany
koa ianareo: raha amin'ny eo ivelany dia miseho amin'ny olona ho marina, nefa
ny ao anatinareo dia feno fihatsaram-belatsihy sy tsi-fankatoavan-dalàna.
29 Lozanareo,
mpanora-dalàna sy Fariseo, mpihatsaravelatsihy! fa manao ny fasan'ny mpaminany
ianareo sady manisy haingony ny rarivatom-pasan'ny olona marina,
30 ka hoy ianareo:
Raha niara-belona tamin'ny razanay izahay, dia tsy mba nikambana taminy
handatsa-drà ny mpaminany.
31 Ka dia miampanga
tena ianareo fa zanak'izay namono ny mpaminany.
32 Ary ianareo koa
dia mamenoa ny famaran'ny razanareo.
33 Ry bibilava,
taranaky ny menarana, hataonareo ahoana no fandositra ny fanamelohana ho any
amin'ny helo?
34 Ary noho izany,
indro, Izaho maniraka mpaminany sy olon-kendry ary mpanora-dalàna ho atỳ
aminareo; koa ny sasany hovonoinareo sy hohomboanareo amin'ny hazo fijaliana,
ary ny sasany hokapohinareo ao amin'ny synagoganareo sy henjehinareo mitety
vohitra,-
35 mba hanody anareo
ny rà marina rehetra, izay nalatsaka tambonin'ny tany, hatramin'ny ran'i Abela
marina ka hatramin'ny ran'i Zakaria, zanak'i Barakia, izay novonoinareo teo
anelanelan'ny tempoly sy ny alitara.
36 Lazaiko aminareo
marina tokoa: Hanody ity taranaka ity izany rehetra izany.
37 Ry Jerosalema, ry
Jerosalema, izay mamono ny mpaminany sy mitora-bato izay irahina ho aminao,
impiry Aho no ta-hanangona ny zanakao, tahaka ny fanomban'ny akoho ny zanany ao
ambanin'ny elany, fa tsy nety ianareo!
38 Indro, avela ho
lao ho anareo ny tranonareo.
39 Fa lazaiko
aminareo: Hatramin'izao dia tsy hahita Ahy tokoa ianareo mandra-pilazanareo
hoe: Isaorana anie Izay avy amin'ny anaran'i Jehovah.
1 Ary nony niala teo
an-kianjan'ny tempoly Jesosy, dia lasa nandeha; ary ny mpianany nanatona Azy
hampizaha Azy ny rafitry ny tempoly.
2 Fa Izy namaly ka
nanao taminy hoe: Tsy hitanareo va ireo rehetra ireo? Lazaiko aminareo marina
tokoa: Tsy havela hisy vato hifanongoa eto ka tsy horavana. [*Na:Tsy hitanareo
izany rehetra izany]
3 Ary nipetraka teo
an-tendrombohitra Oliva Izy, dia nanatona Azy mangingina ny mpianany ka nanao
hoe: Lazao aminay izay andro hahatongavan'izany, ary izay ho famantarana ny
fihavianao sy ny fahataperan'izao tontolo izao.
4 Ary Jesosy namaly
ka nanao taminy hoe: Mitandrema, fandrao hisy hamitaka anareo.
5 Fa maro no ho avy
amin'ny anarako hanao hoe: Izaho no Kristy, ka maro no ho voafitany.
6 Ary handre ady sy
filazana ady ianareo; koa mitandrema, aza matahotra; fa tsy maintsy ho tonga
izany; nefa tsy mbola tonga ny farany.
7 Fa hisy firenena
hitsangana hamely firenena, ary hisy fanjakana hitsangana hamely fanjakana; ary
hisy mosary sy horohorontany amin'ny tany samy hafa.
8 Fa izany rehetra
izany no fiandohan'ny fahoriana*.[*Gr. faharariam-piterahana; izahao 19. 28]
9 Ary dia hatolony ho
amin'ny fahoriana ianareo ka hovonoiny; ary ho halan'ny firenena rehetra ianareo
noho ny anarako.
10 Ary amin'izany
andro izany dia ho tafintohina ny maro, ary hifampiampanga sy hifankahala izy.
11 Ary hisy
mpaminany sandoka maro hitsangana ka hamitaka ny maro.
12 Ary noho ny
haben'ny tsi-fankatoavan-dalàna dia hihamangatsiaka ny fitiavan'ny maro.
13 Fa izay maharitra
hatramin'ny farany no hovonjena.
14 Ary hotorina
amin'izao tontolo izao ity filazantsaran'ny fanjakana ity ho vavolombelona
amin'ny firenena rehetra, dia vao ho tonga ny farany.
15 Koa raha hitanareo
mitsangana ao amin'izay fitoerana masina ny fahavetavetan'ny fandravana, izay
nampilazaina an'i Daniela mpaminany (Dan. 12. 11; 9. 27) (aoka hisaina izay
mamaky izany),
16 dia aoka izay
olona any Jodia handositra ho any an-tendrombohitra;
17 ary izay ao
an-tampon-trano aoka tsy hidina haka ny ao an-tranony;
18 ary izay any
an-tsaha aoka tsy hiverina haka ny lambany.
19 Ary lozan'ny
bevohoka sy ny mampinono amin'ireo andro ireo!
20 Fa mivavaha
ianareo mba tsy ho amin'ny ririnina na ho amin'ny Sabata no handosiranareo.
21 Fa amin'izany
andro izany dia hisy fahoriana lehibe, izay tsy mbola nisy toa azy hatrizay
niandohan'izao tontolo izao ka mandraka ankehitriny, sady tsy hisy intsony.
22 Ary raha tsy efa
nohafohezina izany andro izany, dia tsy nisy nofo hovonjena; fa noho ny olom-boafidy
dia hohafohezina izany andro izany.
23 Koa raha misy
manao aminareo hoe: Indro,y Kristy, na: Indro, ar ; aza mino ianareo.
24 Fa hisy Kristy
sandoka sy mpaminany sandoka hitsangana ka haneho famantarana lehibe sy
fahagagana, ary raha azo atao, na dia ny olom-boafidy aza dia hofitahiny.
25 Indro, voalazako
aminareo rahateo izany.
26 Ary amin'izany,
raha misy manao aminareo hoe: Indro, any an-efitra Izy, aza mankany ianareo;
Indro, ao amin'ny efi-trano Izy, aza mino.
27 Fa tahaka ny
helatra avy any atsinanana ka hita hatrany andrefana, dia ho tahaka izany ny
fihavian'ny Zanak'olona.
28 Fa izay
itoeran'ny faty, dia any no hiangonan'ny voromahery.
29 Ary raha vao
afaka ny fahoriana amin'ireo andro ireo, ny masoandro dia hohamaizinina, ary ny
volana tsy hahazava; ny kintana hiraraka avy any an-danitra, ary ny herin'ny
lanitra hohozongozonina.
30 Ary
amin'izany andro izany dia hiseho eo amin'ny lanitra ny famantarana ny
Zanak'olona, ka dia hitomany ny firenena rehetra ambonin'ny tany, ary hahita ny
Zanak'olona avy amin-kery sy voninahitra lehibe eo amin'ny rahon'ny lanitra
izy.
31 Ary amin'ny
ampanenoana mafy ny trompetra dia haniraka ny anjeliny Izy, ary hangonin'ireo
ny olom-boafidy avy amin'ny vazan-tany* efatra hatramin'ny faravodilanitra
rehetra.[*Gr. rivotra]
32 Ary mianara
ny fanoharana ny amin'ny aviavy:* Raha vao manaroka ny rantsany ka mandravina,
dia fantatrareo fa efa akaiky ny lohataona.[*aviavimbazaha]
33 Dia tahaka
izany koa ianareo, raha vao hitanareo izany rehetra izany, dia aoka ho fantatrareo
fa efa akaiky mby eo am-baravarana Izy*.[*Na: izany]
34 Lazaiko
aminareo marina tokoa: Tsy mba ho lany izao taranaka izao
mandra-pahatongan'izany rehetra izany.
35 Ny lanitra sy ny
tany ho levona, fa ny teniko tsy mba ho levona.
36 Fa ny amin'izany
andro sy ora izany dia tsy misy mahalala, na dia ny anjelin'ny lanitra aza,
[ary na ny Zanaka aza,] afa-tsy ny Ray ihany.
37 Fa tahaka ny
andron'i Noa, dia ho tahaka izany koa ny fihavian'ny Zanak'olona.
38 Fa tahaka ny
tamin'ny andro fony tsy mbola tonga ny Safo-drano, ka nihinana sy nisotro ny
olona ary nampaka-bady sy namoaka ny ampakarina, mandra-pihavin'ny andro izay
nidiran'i Noa tao amin'ny sambo-fiara,
39 ary tsy fantany
mandra-pihavin'ny Safo-drano izay nandringana ny olona rehetra, dia ho tahaka
izany ny fihavian'ny Zanak'olona.
40 Ary
amin'izany hisy roa lahy any an-tsaha; ny anankiray horaisina, ary ny anankiray
havela.
41 Ary hisy roa
vavy manodina ny fikosoham-bary; ny anankiray horaisina, ary ny anankiray
havela.
42 Koa
amin'izany miambena ianareo; fa tsy fantatrareo izay andro hihavian'ny
Tomponareo.
43 Nefa aoka ho
fantatrareo izao: Raha fantatry ny tompon-trano ny fiambenana amin'ny alina
izay hihavian'ny mpangalatra, dia ho niambina izy ka tsy namela ny tranony
hotamina.
44 Koa miomana kosa ianareo;
fa amin'izay ora tsy ampoizinareo no hihavian'ny Zanak'olona.
45 Iza moa no
mpanompo mahatoky sy manan-tsaina, izay notendren'ny tompony hifehy ny
mpanompony mba hanome azy hanina amin'ny fotoana?
46 Sambatra izany
mpanompo izany, raha avy ny tompony ka hahita azy manao izany.
47 Lazaiko aminareo
marina tokoa: Hotendreny ho mpanapaka ny fananany rehetra izy.
48 Fa raha manao
anakampo izany mpanompo ratsy fanahy izany hoe: Maharitra ela ny tompoko,
49 ka dia mikapoka ny
mpanompo namany izy ary mihinana sy misotro amin'ny mpimamo,
50 dia ho avy ny
tompon'izany mpanompo izany amin'ny andro izay tsy ampoiziny sy amin'ny ora
izay tsy fantany,
51 dia hotapahiny
roa* izy ka homeny anjara any amin'ny mpihatsaravelatsihy; any no hisy ny
fitomaniana sy ny fikitroha-nify.[*Na: hokapohiny mafy]
1 Ary amin'izany ny
fanjakan'ny lanitra dia ho tahaka ny virijina folo, izay nitondra ny fanalany*
ka nivoaka hitsena ny mpampakatra.[*Na: fanilony]
2 Ary ny dimy
tamin'ireo dia adala, fa ny dimy kosa hendry.
3 Fa ny adala nandray
ny fanalany*, nefa tsy nitondra solika fitaiza;[*Na: fanilony]
4 ary ny hendry kosa
nitondra solika tao anatin'ny fitondrany sy ny fanalany*.[*Na: fanilony]
5 Ary raha naharitra
ela ny mpampakatra, dia samy rendrehana avy izy rehetra, ka dia natory.
6 Ary nony
mamatonalina, dia nisy antso hoe: Indro ny mpampakatra! Mivoaha mba hitsena
azy.
7 Dia nitsangana ireo
virijina ireo, ka samy namboatra ny fanalany*.[*Na: fanilony]
8 Dia hoy ny adala
tamin'ny hendry: Mba omeo kely amin'ny solikareo izahay; fa efa ho faty ny
fanalanay*.[*Na: fanilonay]
9 Fa ny hendry namaly
ka nanao hoe: Sao tsy ampy ho anay sy ho anareo, fa mandehana mankany amin'ny
mpivarotra ianareo, ka mividiana ho anareo.
10 Fa raha mbola lasa
nividy izy, dia tonga ny mpampakatra, ary izay efa niomana dia niara-niditra
taminy tao amin'ny fampakaram-bady, ary dia narindrina ny varavarana.
11 Ary rehefa afaka
izany, dia tonga kosa ireo virijina teo ka nanao hoe Tompoko, tompoko, vohay
izahay.
12 Fa izy namaly hoe:
Lazaiko aminareo marina tokoa: Tsy fantatro ianareo.
13 Koa amin'izany
miambena ianareo, fa tsy fantatrareo na ny andro na ny ora.
14 Fa ny fanjakan'ny
lanitra dia tahaka ny olona izay efa handeha ho any an-tany hafa ka niantso ny
mpanompony, dia nanolotra azy ny fananany:
15 koa ny anankiray
nomeny talenta dimy, ny anankiray roa, ary ny anankiray iray,- samy araka izay
fahaizany avy; dia lasa nandeha izy.
16 Ary niaraka
tamin'izay dia lasa ilay nandray ny talenta dimy, ka nataony varotra izany; ary
nahazo tombony talenta dimy koa izy.
17 Ary toy
izany koa, ilay nandray ny roa dia nahazo roa ho tombony.
18 Fa ilay
nandray ny iray kosa dia lasa nihady ny tany ka nandevina ny volan'ny tompony.
19 Ary nony
ela, dia tonga ny tompon'ireo mpanompo ireo ka nampilaza azy ny amin'ny volany.
20 Ary nony
nanatona ilay nandray ny talenta dimy, dia nitondra talenta dimy koa izy ka
nanao hoe: Tompoko, talenta dimy no natolotrao ahy; indro, nahazo tombony
talenta dimy koa aho.
21 Hoy ny
tompony taminy: Tsara izany, ry mpanompo tsara sady mahatoky; nahatoky*
tamin'ny kely ianao, dia hotendreko ho mpanapaka ny be; mid́ra amin'ny
fifalian'ny tomponao.[*Na: Ry mpanompo tsara sady mahatoky, nahatoky tsara,
etc]
22 Ary nony
nanatona koa ilay nandray ny talenta roa, dia hoy izy: Tompoko, talenta roa no
natolotrao ahy; indro, nahazo tombony talenta roa koa aho.
23 Hoy ny
tompony taminy: Tsara izany, ry mpanompo tsara sady mahatoky; nahatoky*
tamin'ny kely ianao, dia hotendreko ho mpanapaka ny be; mid́ra amin'ny
fifalian'ny tomponao.[*Na: Ry mpanompo tsara sady mahatoky, nahatoky tsara,
etc]
24 Fa nony
nanatona kosa ilay nandray ny talenta iray, dia nilaza hoe: Tompoko, fantatro
fa olona mila voatsiary ianao, mijinja eny amin'izay tsy namafazanao, ary
manangona eny amin'izay tsy nanahafanao;
25 dia natahotra
aho ka lasa nandevina ny talentanao tao anatin'ny tany; indry, lasanao ny anao.
26 Ary ny
tompony namaly ka nanao taminy hoe: Ry mpanompo ratsy sady malaina, efa
fantatrao fa mijinja eny amin'izay tsy namafazako aho, ary manangona eny
amin'izay tsy nanahafako;
27 koa tokony
ho nampanàna ny volako tamin'ny mpanana vola ianao, ka raha tonga aho, dia ho
nandray ny ahy mban-janany.
28 Koa alao aminy ny
talenta, dia omeo ilay manana ny talenta folo.
29 Fa izay rehetra
manana dia homena, ka hanam-be izy; fa izay tsy manana kosa, na dia izay
ananany aza dia halaina aminy.
30 Ary ario ho
any amin'ny maizina any ivelany ny mpanompo tsy mahasoa; any no hisy ny
fitomaniana sy ny fikitroha-nify.
31 Ary raha
tonga ny Zanak'olona amin'ny voninahiny, arahin'ny anjely rehetra, dia
hipetraka eo ambonin'ny seza fiandrianan'ny voninahiny Izy;
32 ary ny
firenena rehetra hangonina eo anatrehany, dia hanavaka azy, tahaka ny mpiandry
ondry manavaka ny ondry amin'ny osy*;[*Gr: zanak'osy]
33 ary
hametraka ny ondry eo amin'ny ankavanany Izy, fa ny osy* eo amin'ny ankaviany.
34 Ary
amin'izany ny Mpanjaka dia hilaza amin'izay eo amin'ny ankavanany hoe: Avia
ianareo izay notahin'ny Raiko, mandovà ny fanjakana izay voavoatra ho anareo
hatrizay nanorenana izao tontolo izao;
35 fa noana Aho, dia
nomenareo hanina; nangetaheta Aho dia nampisotroinareo; nivahiny Aho, dia
nampiantranoinareo;
36 tsy nanan-kitafy
Aho, dia notafianareo; narary Aho, dia notsaboinareo; tao an-tranomaizina Aho,
dia novangianareo.
37 Ary dia hamaly Azy
ny marina ka hanao hoe: Tompoko, oviana no hitanay noana Hianao ka nomenay
hanina, na nangetaheta ka nampisotroinay?
38 Ary oviana no
hitanay nivahiny Hianao ka nampiantranoinay, na tsy nanan-kitafy ka notafianay?
39 Ary oviana no
hitanay narary Hianao, na tao an-tranomaizina, ka novangianay?
40 Dia hamaly ny
Mpanjaka ka hanao aminy hoe: Lazaiko aminareo marina tokoa: Araka izay efa
nataonareo tamin'ny anankiray amin'ireto rahalahiko kely indrindra ireto no
nataonareo tamiko.
41 Ary dia hilaza
indray amin'izay eo amin'ny ankaviany kosa Izy hoe: Mialà amiko, ianareo izay
voaozona, ho any amin'ny afo maharitra mandrakizay, izay voavoatra ho an'ny
devoly sy ny anjeliny;
42 fa noana Aho, fa
tsy mba nomenareo hanina; nangetaheta Aho, fa tsy mba nampisotroinareo;
43 nivahiny Aho, fa
tsy mba nampiantranoinareo; tsy nanan-kitafy Aho, fa tsy mba notafianareo;
narary sy tao an-tranomaizina Aho, fa tsy mba novangianareo.
44 Ary dia hamaly
kosa ireo hoe: Tompoko, oviana no hitanay noana Hianao, na nangetaheta, na
nivahiny, na tsy nanan-kitafy, na narary, na tao an-tranomaizina, ka tsy mba
nanompo Anao izahay?
45 Fa hamaly azy Izy
ka hanao hoe: Lazaiko aminareo marina tokoa: Araka izay tsy nataonareo tamin'ny
anankiray amin'ireto kely indrindra ireto no tsy mba nataonareo tamiko.
46 Ary ireo dia hiala
ho any amin'ny fampijaliana mandrakizay; fa ny marina ho any amin'ny fiainana
mandrakizay.
1 Ary rehefa vitan'i
Jesosy izany teny rehetra izany, dia nilaza tamin'ny mpianany hoe Izy:
2 Fantatrareo fa raha
afaka indroa andro, dia ho tonga ny Paska, koa ny Zanak'olona dia hatolotra
hohomboana amin'ny hazo fijaliana.
3 Ary tamin'izany dia
nivory ny lohan'ny mpisorona sy ny loholona tao an-kianjan'ny tranon'ny
mpisoronabe atao hoe Kaiafa.
4 Ary niara-nihevitra
izy hisambotra an'i Jesosy amin'ny fitaka ka hamono Azy;
5 kanefa hoy izy: Tsy
amin'ny andro firavoravoana, fandrao hisy tabataba amin'ny olona.
6 Ary nony tany
Betania Jesosy, tao an-tranon'i Simona boka,
7 dia nanatona
Azy ny vehivavy anankiray nitondra tavoara alabastara feno menaka manitra
saro-bidy loatra, ka naidiny tamin'ny lohany izany, raha nipetraka nihinana
Izy.
8 Fa nony nahita
izany ny mpianatra, dia tezitra ka nanao hoe: Inona no anton'izao
fandaniam-poana izao?
9 Fa azo namidy ho
lafo be iny ka homena ny malahelo.
10 Ary fantatr'i
Jesosy izay nataon'ireo, ka dia hoy Izy taminy: Nahoana ianareo no mampalahelo
an-dravehivavy? fa asa soa no nataony tamiko.
11 Fa ny malahelo dia
eto aminareo mandrakariva, fa Izaho tsy mba ho eto aminareo mandrakariva.
12 Fa izy no
nampidina izany menaka manitra izany tamin'ny tenako, dia ny hamboatra Ahy
halevina no nanaovany izany.
13 Lazaiko aminareo
marina tokoa: Na aiza na aiza amin'izao tontolo izao no hitoriana ity
filazantsara ity, dia holazaina koa izay nataon-dravehivavy mba ho
fahatsiarovana azy.
14 Ary ny anankiray
tamin'ny roa ambin'ny folo lahy, atao hoe Jodasy Iskariota, dia nankao amin'ny
lohan'ny mpisorona
15 ka nanao hoe:
Homenareo hoatrinona aho hanolorako Azy aminareo? Ary izy nandanja sekely
volafotsy telo-polo homena azy.
16 Ary hatramin'izay
no nitadiavany izay andro hahazoany mamadika Azy.
17 Ary tamin'ny
voalohan'ny andro fihinanana ny mofo tsy misy masirasira dia nankeo amin'i
Jesosy ny mpianatra ka nanao hoe: Aiza no tianao hamboarinay hihinananao ny
Paska?
18 Ary hoy Izy:
Mankanesa any an-tanàna ho any amin-dralehilahy, ka lazao aminy hoe: Hoy ny
Mpampianatra: Efa akaiky ny fotoako; koa ato aminao Aho sy ny mpianatro no
hitandrina ny Paska.
19 Ary ny mpianatra
dia nanao araka ny nasain'i Jesosy nataony ka namboatra ny Paska.
20 Ary nony hariva ny
andro, dia nipetraka nihinana Izy mbamin'ny mpianatra roa ambin'ny folo
lahy*.[*Na: (mbamin'ny roa ambin'ny folo lahy)]
21 Ary raha mbola
nihinana izy, dia hoy Jesosy: Lazaiko aminareo marina tokoa fa ny anankiray aminareo
hamadika Ahy.
22 Dia nalahelo
indrindra izy rehetra, ka samy nanontany Azy hoe: Moa izaho va izany, Tompoko?
23 Ary Izy namaly ka
nanao hoe: Izay niara-nanatsoboka ny tànany tamiko tao anatin'ny lovia, izy no
hamadika Ahy.
24 Ny Zanak'olona dia
mandeha tokoa araka izay nanoratana Azy, nefa lozan'izay olona hahazoana ny
Zanak'olona hatolotra! tsara ho an'izany olona izany raha tsy ary akory.
25 Ary Jodasy, izay
namadika Azy, dia namaly ka nanao hoe: Izaho va izany, Raby ô? Dia hoy Izy
taminy: Voalazanao.
26 Ary raha mbola
nihinana izy, dia nandray mofo Jesosy, ka nony efa nisaotra Izy, dia novakiny
ka natolony ny mpianatra, ary hoy Izy: Raiso, hano, ity no tenako.
27 Ary nandray
kapoaka* Izy, ka nony efa nisaotra, dia natolony azy ka nataony hoe: Sotroinareo
rehetra ity;[* Na: (ny kapoaka)]
28 fa ity no rako,
dia ny amin'ny fanekena*, izay alatsaka ho an'ny maro ho famelan-keloka.[*Na:
(ny fanekena vaovao)]
29 Ary lazaiko
aminareo fa hatramin'izao dia tsy mba hisotro itony vokatry ny voaloboka itony
intsony Aho mandra-pihavin'ny andro hiarahako misotro izay vaovao aminareo any
amin'ny fanjakan'ny Raiko.
30 Ary rehefa nihira
fiderana izy, dia lasa nankany amin'ny tendrombohitra Oliva.
31 Ary tamin'izany
dia hoy Jesosy taminy: Hianareo rehetra dia ho tafintohina noho ny amiko anio
alina; fa voasoratra hoe: Hamely ny mpiandry Aho, dia hihahaka ny ondry
andrasana (Zak. 13. 7).
32 Fa rehefa
atsangana Aho, dia hialoha anareo ho any Galilia.
33 Fa Petera namaly
ka nanao taminy hoe: Na dia ho tafintohina noho ny aminao aza ny olona rehetra,
izaho tsy mba ho tafintohina mandrakizay.
34 Hoy Jesosy taminy:
Lazaiko aminao marina tokoa fa anio alina, raha tsy mbola misy akoho maneno,
dia handà Ahy intelo ianao.
35 Hoy Petera taminy:
Na dia hiara-maty aminao aza aho, tsy mba handà Anao tokoa aho. Ary toy izany
koa no nolazain'ny mpianatra rehetra.
36 Ary Jesosy
mbamin'ny mpianany dia tonga tao amin'ny saha anankiray atao hoe Getsemane, ary
hoy Izy tamin'ny mpianany: Mipetraha eto aloha ianareo, raha mbola mankeroa hivavaka
Aho.
37 Ary nitondra an'i
Petera mbamin'izy roa lahy zanak'i Zebedio Izy, dia nalahelo am-po sy ory
indrindra.
38 Dia hoy Izy
taminy: Fadiranovana loatra ny fanahiko, toy ny efa ho faty; mitoera eto, ka
miaraha miari-tory amiko.
39 Ary nony nandroso kelikely
Izy, dia niankohoka ka nivavaka hoe: Raiko ô, raha azo atao, dia aoka hesorina
amiko ity kapoaka ity; nefa aoka tsy ny sitrapoko anie no hatao, fa ny Anao.
40 Ary nankeo amin'ny
mpianatra Izy ka nahita azy matory, dia hoy Izy tamin'i Petera: Hay! tsy
mahazaka ny miara-miari-tory amiko na dia ora iray ihany aza ianareo!
41 Miareta tory sy
mivavaha ianareo, mba tsy hidiranareo amin'ny fakam-panahy; mety ihany ny
fanahy, fa ny nofo no tsy manan-kery.
42 Dia nandeha
fanindroany Izy ka nivavaka hoe: Raiko ô, raha tsy azo esorina ity, fa tsy
maintsy hosotroiko, dia aoka ny sitraponao no hatao.
43 Ary nony tonga
Izy, dia nahita azy matory indray; fa efa nilondolondo ny masony.
44 Ary rehefa nandao
azy Izy ka lasa indray, dia nivavaka fanintelony ka nanao izany teny izany
ihany.
45 Dia nankeo amin'ny
mpianatra Izy ka nanao taminy hoe: Matoria ary ankehitriny, ka mialà sasatra
ianareo*; indro, efa akaiky ny ora, ary ny Zanak'olona hatolotra eo an-tànan'ny
mpanota.[*Na: Mbola matory ihany va ianareo ka miala sasatra?]
46 Mitsangàna, andeha
isika; indro fa efa akaiky ilay mamadika Ahy.
47 Ary raha mbola
niteny Jesosy, indro, avy Jodasy, izay isan'ny roa ambin'ny folo lahy,
mbamin'ny vahoaka betsaka niaraka taminy, nitondra sabatra sy langilangy,
nirahin'ny lohan'ny mpisorona sy ny loholona.
48 Ary ilay namadika
Azy nanome famantarana ny olona ka nanao hoe: Izay horohako no Izy; sambory
Izy.
49 Ary niaraka
tamin'izay dia nanatona an'i Jesosy izy ka nanao hoe: Finaritra, Raby! dia
nanoroka Azy.
50 Fa hoy Jesosy taminy:
Ry sakaiza, ataovy izay nalehanao eto*. Dia nanatona ny olona ka nisambotra
an'i Jesosy ary nitana Azy.[*Na: haninona eto ianao?]
51 Ary, indro, ny
anankiray tamin'izay nomba an'i Jesosy naninjitra ny tànany, dia nanatsoaka ny
sabany ka nikapa ny mpanompon'ny mpisoronabe ary nahafaka ny sofiny.
52 Fa hoy Jesosy
taminy: Ampidiro amin'ny tranony ny sabatrao; fa izay rehetra mandray sabatra
no hovonoina amin'ny sabatra.
53 Ary ataonao va fa
tsy mahazo mangataka amin'ny Raiko Aho, dia haniraka anjely tsy omby roa
ambin'ny folo legiona ho etỳ amiko Izy ankehitriny?
54 Raha izany, dia
hatao ahoana no hahatanteraka ny Soratra Masina, izay milaza fa tsy maintsy ho
tonga izany?
55 Ary tamin'izany
ora izany dia niteny tamin'ny vahoaka Jesosy ka nanao hoe: Mivoaka mitondra
sabatra sy langilangy hisambotra Ahy toy ny hisambotra jiolahy va ianareo?
Isan'andro dia nipetraka nampianatra teo an-kianjan'ny tempoly Aho, nefa tsy
nisambotra Ahy ianareo.
56 Fa izany rehetra
izany dia tonga mba hahatanteraka izay voasoratry ny mpaminany. Ary tamin'izany
dia nandao Azy ny mpianatra rehetra ka nandositra.
57 Ary izay efa
nisambotra an'i Jesosy dia nitondra Azy ho any amin'i Kaiafa mpisoronabe, izay
nivorian'ny mpanora-dalàna sy ny loholona.
58 Ary Petera
nanaraka Azy teny lavidavitra eny hatrany amin'ny kianjan'ny tranon'ny
mpisoronabe; ary niditra izy, dia niara-nipetraka tao amin'ny mpiandry raharaha
mba hahita izay hiafarany.
59 Ary ny lohan'ny
mpisorona mbamin'ny Synedriona rehetra nitady teny ho entiny hiampanga lainga
an'i Jesosy mba hamonoany Azy;
60 fa tsy nahita izy,
na dia maro aza ny vavolombelona mandainga tonga teo. Ary nony farany dia nisy roa lahy tonga teo,
izay nanao hoe:
61 Ilehity
nanao hoe: Mahay mandrava ny tempolin'Andriamanitra Aho sy manangana azy amin'ny
hateloana.
62 Dia
nitsangana ny mpisoronabe ka nanao tamin'i Jesosy hoe: Tsy mety mamaly akory va
Hianao? Inona no iampangan'ireto Anao?
63 Nefa tsy
niteny Jesosy. Dia hoy ny mpisoronabe taminy: Ampianianiko amin'Andriamanitra
velona Hianao hilaza aminay, raha Hianao no Kristy, Zanak'Andriamanitra.
64 Hoy Jesosy
taminy: Voalazanao; ary koa, lazaiko aminareo: Hatramin'izao dia ho hitanareo
ny Zanak'olona mipetraka eo amin'ny tanana ankavanan'ny Hery sy avy eo amin'ny
rahon'ny lanitra.
65 Ary
tamin'izany ny mpisoronabe dia nandriatra ny fitafiany ka nanao hoe: Efa niteny
ratsy* Izy; ahoana no mbola ilantsika vavolombelona indray? indro, efa renareo
izao fitenenan-dratsy* izao.[*Gr. blasfemia, izahao 9. 3]
66 Ahoana no
hevitrareo? Ary ireo namaly ka nanao hoe: Miendrika hohelohina ho faty Izy.
67 Dia nororany
ny tavany, ka nasiany totohondry Izy; ary ny sasany namely tahamaina Azy.
68 ka nanao
hoe: Maminania aminay, ry Kristy, iza no namely Anao?
69 Ary Petera
nipetraka teo ivelany, teo an-kianja, dia nanatona azy ny ankizivavy anankiray
ka nanao hoe: Hianao koa nomba an'i Jesosy, ilay Galiliana.
70 Fa izy nandà
teo anatrehan'izy rehetra ka nanao hoe: Tsy azoko izay lazainao.
71 Ary nony
niala ho eo am-bavahady izy, dia nahita azy ny ankizivavy anankiray koa ka
nilaza tamin'izay teo hoe: Ity koa nomba an'i Jesosy avy any Nazareta.
72 Ary nandà
indray tamin'ny fianianana izy ka nanao hoe: Tsy fantatro izany Lehilahy izany.
73 Ary nony
afaka kelikely, dia nanatona izay nijanona teo ka nanao tamin'i Petera hoe: Marina
tokoa fa naman'ireny ianao; fa ny fiteninao miampanga anao.
74 Dia vao
niozona sy nianiana izy ka nanao hoe: Tsy fantatro izany Lehilahy izany; ary
niaraka tamin'izay dia nisy akoho naneno.
75 Ary Petera
nahatsiaro ny tenin'i Jesosy, izay nolazainy hoe: Raha tsy mbola misy akoho
maneno, dia handà Ahy intelo ianao. Ary rehefa nivoaka teny ivelany izy, dia
nitomany fatratra.
1 Ary nony
maraina ny andro, ny lohan'ny mpisorona rehetra sy ny loholona dia
niara-nihevitra hiampanga an'i Jesosy mba hamonoany Azy.
2 Ary rehefa
nafatony Izy, dia nentiny ka natolony an'i Pilato governora.
3 Ary Jodasy,
ilay namadika Azy, raha nahita fa nohelohina Jesosy, dia nanenina ka namerina
ny sekely volafotsy telo-polo tamin'ny lohan'ny mpisorona sy ny loholona
4 ka nanao hoe:
Nanota aho, satria namadika rà marina. Fa hoy ireo: Ahoanay izany? fa asa anao.
5 Ary nony natsipiny
teo amin'ny tempoly ny vola, dia niala izy ka lasa nandeha, dia nanao tadimody
ary nananton-tena, ka dia maty.
6 Ary ny lohan'ny
mpisorona nandray ny vola ka nanao hoe: Tsy mety raha alatsaka ao amin'ny
rakitry ny tempoly io, fa vidin-drà.
7 Ary nony
niara-nihevitra izy, dia namidiny ny sahan'ny mpanefy vilany ny vola ho
fandevenam-bahiny.
8 Koa izany no
anaovana ny anaran'izany saha izany mandraka androany hoe Sahan-drà.
9 Ary tamin'izany dia
tanteraka izay nampilazaina an'i Jeremia mpaminany hoe: Dia nalainy ny sekely
volafotsy telo-polo, vidin'ilay notombanana*, dia ilay notombanan'ny
Zanak'Isiraely,[*Na: Nohajaina]
10 ka nomeny hamidy
ny sahan'ny mpanefy vilany izany, araka izay efa nandidian'i Jehovah ahy (Jer.
18. 2; Zak. 11. 13).
11 Ary Jesosy
nitsangana teo anatrehan'ny governora; ary ny governora nanontany Azy ka nanao
hoe: Hianao va no Mpanjakan'ny Jiosy? Dia hoy Jesosy taminy: Voalazanao.
12 Ary raha
nampangain'ny lohan'ny mpisorona mbamin'ny loholona Izy, dia tsy namaly akory.
13 dia hoy Pilato
taminy: Tsy renao va izany zavatra maro iampangany Anao izany?
14 Fa tsy namaly azy
Izy na dia indraim-bava akory aza, ka dia gaga indrindra ny governora.
15 Ary isaky ny tonga
ny andro firavoravoana dia fanaon'ny governora ny mandefa mpifatotra anankiray
ho an'ny vahoaka, araka izay tiany.
16 Ary tamin'izany
dia nisy mpifatotra malaza atao hoe Barabasy.
17 Koa nony tafangona
teo ny olona, dia hoy Pilato taminy: Iza moa no tianareo halefako ho anareo?
Barabasy, sa Jesosy, Izay atao hoe Kristy?
18 Fa fantany fa
fialonana no nanoloran'ireo Azy.
19 Ary raha nipetraka
teo amin'ny fitsarana izy, ny vadiny dia naniraka hankeo aminy ka nanao hoe:
Aza manao na inona na inona amin'izany Lehilahy marina izany, fa nampahory ahy
be ihany ny nanofisako Azy any naraina.
20 Ary ny lohan'ny
mpisorona mbamin'ny loholona nitaona ny vahoaka mba hangataka an'i Barabasy ary
hamono an'i Jesosy.
21 Fa ny governora
namaly ka nanao taminy hoe: Iza moa amin'izy roa lahy no tianareo halefako ho
anareo? Dia hoy izy: Barabasy.
22 Hoy Pilato taminy:
Ka ahoana kosa ary no hataoko amin'i Jesosy, Izay atao hoe Kristy? Dia hoy izy
rehetra: Aoka hohomboana amin'ny hazo fijaliana Izy.
23 Fa hoy ny
governora: Inona ary no ratsy nataony? Fa vao mainka niantsoantso izy ka nanao
hoe: Aoka hohomboana amin'ny hazo fijaliana Izy!
24 Ary raha hitan'i
Pilato, fa tsy nahaleo ditra aza izy, fa vao mainka nandroso ihany aza ny
tabataba, dia naka rano izy ka nanasa tanana teo anatrehan'ny vahoaka ary nanao
hoe: Afaka amin'ny ran'ity Lehilahy marina ity aho, fa asa anareo.
25 Ary ny olona
rehetra dia namaly ka nanao hoe: Aoka ny ràny ho aminay mbamin'ny zanakay.
26 Ary dia nandefa
an'i Barabasy ho an'ny olona izy; fa Jesosy nasainy nokapohina*, dia natolony
mba hohomboana tamin'ny hazo fijaliana.[*Gr. dia nokapohiny; ny teny Grika
milaza ny nokapohina tamin'ny fikapohana hoditra lehibe nisy varahina]
27 Ary ny
miaramilan'ny governora dia nitondra an'i Jesosy ho ao anati-rova* sady
nanangona ny miaramila namany rehetra ho eo aminy.[*Gr. pretoria]
28 Ary rehefa nanala
ny fitafiany, dia nanafy Azy lamba jaky izy.
29 Ary nandrandrana
satroka tsilo izy, ka nasatrony ny lohany, ary nampitaniny volotara ny tànany
ankavanana, dia nandohalika teo anatrehany izy ka naneso Azy hoe: Arahaba, ry
Mpanjakan'ny Jiosy!
30 Dia nororany Izy,
ary nalainy ny volotara ka nokapohiny ny lohany.
31 Ary rehefa naneso
Azy izy, dia nanala ilay lamba taminy, ka nampitafiny Azy indray ny fitafiany,
ary dia nentiny Izy mba hohomboana amin'ny hazo fijaliana.
32 Ary raha nandeha
izy, dia nahita lehilahy Kyreniana anankiray, atao hoe Simona, ka izy notereny
hitondra ny hazo fijalian'i Jesosy.
33 Ary rehefa tonga
teo amin'ny tany atao hoe Golgota izy, izany hoe Ikarandoha,
34 dia nomeny divay
miharo afero Izy hosotroiny; ary nony nanandrana izany Izy, dia tsy nety
nisotro.
35 Ary rehefa
voahombony tamin'ny hazo fijaliana Izy, dia nanaovany loka no fizàrany ny
fitafiany.
36 Ary nipetraka izy,
dia niambina Azy teo.
37 Ary napetany teo
ambonin'ny lohany ny soratra milaza ny nanamelohana Azy, dia izao: Ity no
Jesosy, Mpanjakan'ny Jiosy.
38 Ary nisy jiolahy
roa nohomboana tamin'ny hazo fijaliana teo an-daniny roa, ny anankiray teo
amin'ny ankavanany, ary ny anankiray teo amin'ny ankaviany.
39 Ary izay nandalo
dia niteny ratsy* Azy, sady nihifikifi-doha[*Gr. nanao blasfemia; izahao 9. 3]
40 ka nanao hoe: Ry
Ilay mandrava ny tempoly sy manangana azy amin'ny hateloana, vonjeo ny tenanao.
Raha Zanak'Andriamanitra Hianao, midina hiala amin'ny hazo fijaliana.
41 Ary dia naneso toy
izany koa ny lohan'ny mpisorona mbamin'ny mpanora-dalàna sy ny loholona ka
nanao hoe:
42 Ny sasany
novonjeny; fa ny tenany tsy hainy vonjena. Mpanjakan'ny Isiraely Izy, aoka
hidina hiala amin'ny hazo fijaliana Izy ankehitriny, dia hino Azy izahay;
43 natoky
an'Andriamanitra Izy, aoka Izy hamonjy Azy ankehitriny, raha ankasitrahany Izy
(Sal. 22. 8), satria hoy Izy: Zanak'Andriamanitra Aho.
44 Ary nandatsa Azy
toy izany koa ireo jiolahy niaraka nohomboana taminy tamin'ny hazo fijaliana.
45 Ary hatramin'ny
ora fahenina ka hatramin'ny ora fahasivy dia maizina ny tany rehetra.
46 Ary nony tokony ho
tamin'ny ora fahasivy, dia niantso tamin'ny feo mahery Jesosy ka nanao hoe:
Ely, Ely, lamà sabaktany? izany hoe: Andriamanitro ô, Andriamanitro ô, nahoana
no dia mahafoy Ahy Hianao? (Sal. 22. 1).
47 Ary ny sasany
tamin'izay nijanona teo, raha nandre izany, dia nanao hoe: Miantso an'i Elia
Ilehio.
48 Ary niaraka
tamin'izay ny anankiray teo aminy dia nihazakazaha ka nandray sipaonjy, ary
rehefa natsobony tamin'ny vinaingitra izany ka notohiziny tamin'ny volotara,
dia natohony hotsentsefin'i Jesosy.
49 Fa ny sasany kosa
nanao hoe: Aoka hoe hizahantsika na ho avy hamonjy Azy Elia, na tsia.
50 Ary rehefa niantso
tamin'ny feo mahery indray Jesosy, dia nanolotra ny fanahiny.
51 Ary, indro, ny
efitra lamba tao amin'ny tempoly dia triatra nizara roa hatrany ambony ka
hatrany ambany; dia nihorohoro ny tany, ka nitresaka ny vatolampy;
52 ary nisokatra ny
fasana, ka maro ny fatin'ny olona masina izay efa nodi-mandry no natsangana,
53 ka nivoaka avy tao
amin'ny fasana ireo taorian*'ny nitsanganan'i Jesosy, dia nankao amin'ny Tanàna
Masina ka niseho tamin'ny maro.[*Na:ary taorin',etc]
54 Ary ny kapiteny sy
ny fehiny, izay niambina an'i Jesosy, raha nahita ny horohorontany mbamin'izay
zavatra tonga teo, dia raiki-tahotra indrindra ka nanao hoe: Marina tokoa fa
Zanak'Andriamanitra io Lehilahy io.
55 Ary nisy vehivavy
maro nitsinjo teny lavitra eny, izay nanaraka an'i Jesosy hatrany Galilia ka
nanompo Azy.
56 Isan'ireny Maria
Magdalena sy Maria, renin'i Jakoba sy Josesy, ary ny renin'ny zanak'i Zebedio.
57 Ary nony hariva ny
andro, dia avy ny lehilahy manan-karena anankiray, avy any Arimatia, ny anarany
atao hoe Josefa, ary izy koa dia mpianatr'i Jesosy.
58 Izany lehilahy
izany dia nankao amin'i Pilato ka nangataka ny fatin'i Jesosy. Dia nasain'i
Pilato homena azy izany.
59 Ary rehefa
nalain'i Josefa ny faty ka nofonosiny hariry madinika madio,
60 dia naleviny tao
amin'ny fasany vaovao izay efa nolavahany tamin'ny vatolampy; ary rehefa
nanakodia vato lehibe ho eo amin'ny varavaran'ny fasana izy, dia lasa nandeha.
61 Ary tao Maria
Magdalena sy ilay Maria anankiray ka nipetraka tandrifin'ny fasana.
62 Ary nony ampitson'ny
andro fiomanana, dia nivory nankeo amin'i Pilato ny lohan'ny mpisorona sy ny
Fariseo
63 ka nanao hoe:
Tompoko, tsaroanay fa iny mpamitaka iny, fony Izy mbola velona, dia nanao hoe:
Raha afaka hateloana, dia hitsangana Aho.
64 Koa asaovy
hambenana mafy ny fasana mandra-pahatongan'ny andro fahatelo, fandrao avy ny
mpianany ka mangalatra Azy, dia hilaza amin'ny olona hoe: Efa natsangana
tamin'ny maty Izy; ka dia ho ratsy ny fitaka farany noho ny voalohany.
65 Hoy Pilato taminy:
Makà mpiambina ka mandehana, ary ataovy mafy araka izay hainareo ny fiambenana.
66 Ary nony lasa izy,
dia nalatsany ny mpiambina hiambina mafy ny fasana, rehefa nasiany tombo-kase
ny vato.
1 Ary tamin'ny
alin'ny Sabata, raha vao nazava ratsy ny andro voalohany amin'ny herinandro,
dia avy hizaha ny fasana Maria Magdalena sy ilay Maria anankiray.
2 Ary, indro, nisy
horohorontany mafy; fa nisy anjelin'ny Tompo nidina avy tany an-danitra, dia
nankeo ka nanakodia ny vato, dia nipetraka teo amboniny.
3 Ary ny fijery azy
dia tahaka ny helatra, ary ny fitafiany fotsy tahaka ny oram-panala;
4 ary ny mpiambina
nivadi-po noho ny fahatahorana azy ka tonga tahaka ny maty.
5 Ary ny anjely
namaly ka nilaza tamin'ny vehivavy hoe: Aza matahotra ianareo; fa fantatro fa
Jesosy, Izay efa nohomboana tamin'ny hazo fijaliana, no tadiavinareo.
6 Tsy ato Izy, fa efa
nitsangana araka izay nolazainy. Avia, ka jereo, fa tao no nandrian'ny Tompo.
7 Ary mandehana
faingana, ka lazao amin'ny mpianany fa efa nitsangana tamin'ny maty Izy; ary,
indro, mialoha anareo ho any Galilia Izy; any no hahitanareo Azy; indro, efa
nilaza taminareo aho.
8 Dia niala faingana
tamin'ny fasana izy ireo sady natahotra no faly indrindra, dia nihazakazaka
hilaza tamin'ny mpianatra.
9 Ary, indro, Jesosy
nifanena taminy ka nanao hoe: Finaritra. Ary izy ireo nanatona, dia nihazona ny
tongony ka niankohoka teo anatrehany.
10 Dia hoy Jesosy
taminy: Aza matahotra; fa mandehana, ka asaovy mankany Galilia ny rahalahiko;
fa any no hahitany Ahy.
11 Ary nony nandeha
izy ireo, indreny, ny mpiambina sasany nankany an-tanana ka nilaza tamin'ny
lohan'ny mpisorona ny zavatra rehetra izay vao niseho.
12 Ary rehefa
niangona izy mbamin'ny loholona, dia niara-nihevitra ka nanome vola be ny
miaramila
13 ary nanao hoe:
Lazao hoe: Ny mpianany no tonga alina ka nangalatra Azy raha sendra natory
izahay;
14 ary raha misy
milaza izany amin'ny governora, izahay dia hampanaiky azy ka hanao izay tsy
hampaninona anareo.
15 Dia nandray ny
vola izy ka nanao araka ny teny nomeny azy; ary izany teny izany dia naelin'ny
Jiosy mandraka androany.
16 Ary ny mpianatra
iraika ambin'ny folo lahy dia nankany Galilia, ho any amin'ilay tendrombohitra
nasain'i Jesosy halehany.
17 Ary nony nahita
Azy izy, dia niankohoka, fa ny sasany niahanahana.
18 Ary Jesosy
nanatona dia niteny taminy ka nanao hoe: Efa nomena Ahy ny fahefana rehetra any
an-danitra sy etỳ an-tany;
19 koa mandehana
ianareo, dia ataovy mpianatra ny firenena rehetra, manao batisa azy ho amin'ny
anaran'ny Ray sy ny Zanaka ary ny Fanahy Masina
20 sady mampianatra
azy hitandrina izay rehetra nandidiako anareo; ary, indro, Izaho momba anareo
mandrakariva ambara-pahatongan'ny fahataperan'izao tontolo izao.
Accès direct aux
chapitres de Marc : 1, 2, 3, 4, 5, 6, 7, 8, 9, 10, 11, 12, 13, 14, 15, 16
1 Ny niandohan'ny
filazantsaran'i Jesosy Kristy, Zanak'Andriamanitra.
2 Araka izay voasoratra ao
amin'Isaia mpaminany* hoe: Indro, Izaho maniraka ny irako hialoha Anao, Izay
hamboatra ny lalanao (Mal 3. 1); [*Na: ao amin'ny mpaminany]
3 Injany! misy
feon'ny miantso mafy any an-efitra hoe: Amboary ny lalan'i Jehovah. Ataovy
mahitsy ny lalan-kalehany (Isa 40. 3),
4 dia niseho
Jaona, izay nanao batisa tany an-efitra ka nitory ny batisan'ny fibebahana ho
famelan-keloka.
5 Dia nandeha
nanatona azy ny tany Jodia rehetra sy ny mponina rehetra tany Jerosalema, ka
nataony batisa tao amin'ny ony Jordana ireny, rehefa niaiky ny fahotany.
6 Ary Jaona
nitafy lamba volon-drameva; ary fehin-kibo hoditra no tamin'ny valahany, ary ny
fihinany dia valala sy tantely remby.
7 Ary nitory
izy ka nanao hoe: Avy ao aoriako Ilay mahery noho izaho, ka tsy miendrika
hiondrika hamaha ny fehin-kapany aza aho.
8 Izaho efa nanao
batisa anareo tamin'ny rano, fa Izy kosa hanao batisa anareo amin'ny Fanahy
Masina.
9 Ary tamin'izany
andro izany dia tonga avy tany Nazareta any Galilia Jesosy ka nataon'i Jaona
batisa tao Jordana.
10 Ary raha vao
niakatra avy teo amin'ny rano Izy, dia hitany ny lanitra nisokatra, ary ny
Fanahy nidina tahaka ny voromailala ka nankeo amboniny.
11 Ary nisy feo
avy tany an-danitra nanao hoe: Hianao no Zanako malalako, Hianao no sitrako.
12 Ary niaraka
tamin'izay dia nampandehanin*'ny Fanahy ho any an-efitra Izy.[*Gr. noroahin']
13 Ary tany
an-efitra efa-polo andro Izy ka nalain'i Satana fanahy; ary teo amin'ny
bibi-dia Izy, ary ny anjely nanompo Azy.
14 Ary rehefa
voasambotra Jaona, dia nankany Galilia Jesosy nitory ny
filazantsaran'Andriamanitra
15 ka nanao
hoe: Efa tonga ny fotoana, ka efa akaiky ny fanjakan'Andriamanitra; mibebaha
ianareo ka minoa ny filazantsara.
16 Ary nony
nandalo teny amoron'ny Ranomasin'i Galilia Izy, dia nahita an'i Simona sy
Andrea, rahalahin'i Simona, nanarato teo amin'ny ranomasina; fa mpanarato izy.
17 Ary hoy
Jesosy taminy: Andeha hanaraka Ahy, fa hataoko mpanarato olona ianareo.
18 Dia nandao
ny harato niaraka tamin'izay izy ka nanaraka Azy.
19 Ary rehefa
nandroso kelikely Izy, nahita an'i Jakoba, zanak'i Zebedio, Jaona rahalahiny,
izay teo an-tsambokely koa namboatra ny haratony.
20 Dia niantso
azy niaraka tamin'izay Izy; ary izy mirahalahy nandao an'i Zebedio rainy teo
an-tsambokely mbamin'ny olona nokaramainy, ka dia nanaraka an'i Jesosy.
21 Ary nankany
Kapernaomy izy ireo; nony tamin'ny Sabata, dia niditra tao amin'ny synagoga
niaraka tamin'izay Jesosy ka nampianatra.
22 Dia
talanjona ny olona tamin'ny fampianarany, satria nampianatra azy tahaka izay
manana fahefana Izy, fa tsy mba tahaka ny mpanora-dalàna.
23 Ary niaraka
tamin'izay dia nisy olona teo amin'ny synagogany, izay azon'ny fanahy maloto;
ary niantso mafy ralehilahy
24 ka nanao
hoe: Moa mifaninona akory izahay sy Hianao, ry Jesosy avy any Nazareta? Avy handringana anay va Hianao? Fantatro
fa Ilay Masin'Andriamanitra Hianao.
25 Ary Jesosy niteny
mafy azy ka nanao hoe: Mangina ianao ka mivoaha aminy.
26 Ary ny fanahy
maloto nampifanintontsintona ny tenan'ilay marary, dia niantso tamin'ny feo
mahery ka niala taminy.
27 Dia gaga ny olona
rehetra ka nifanontany hoe: Manao ahoana re izao zavatra izao? Fampianarana
vaovao misy fahefana izao! fa ny fanahy maloto aza no didiany, ka dia manaiky
Azy.
28 Ary ny lazany dia
niely niaraka tamin'izay teny tontolo eny tamin'ny tany rehetra eran'i Galilia.
29 Ary niaraka
tamin'izay, raha nivoaka avy tao amin'ny synagoga izy, dia niditra tao
an-tranon'i Simona sy Andrea Jesosy ary Jakoba sy Jaona.
30 Ary ny
rafozam-bavin'i Simona nandry teo nanavin'ny tazo; ary niaraka tamin'izay dia
nilaza azy taminy izy ireo.
31 Dia nanatona
Jesosy ka nandray ny tànany ary nanarina azy; dia afaka ny tazony, ka dia
nanompo azy izy.
32 Ary nony hariva ny
andro, ka nilentika ny masoandro, dia nentina tany aminy ny marary rehetra sy
ny demoniaka.
33 Ary ny tao
an-tanàna rehetra dia tafangona teo anoloan'ny varavarana avokoa.
34 Ary nahasitrana
olona maro izay nararin'ny aretina samy hafa Izy sady namoaka demonia maro; ary
tsy navelany hiteny ny demonia, satria nahafantatra Azy ireny.
35 Ary nifoha maraina
alina koa Izy, dia nivoaka nankany an-tany foana ka nivavaka tany.
36 Ary dia
nandeha nitady Azy Simona sy ny namany.
37 Ary nahita
Azy izy, dia nanao taminy hoe: Ny olona rehetra mitady Anao.
38 Fa hoy kosa
Izy taminy: Andeha isika hiala hankany amin'ny tanàna akaiky, mba hitoriako
teny any koa; fa izay no nahatongavako.
39 Dia nandeha
Izy ka nitori-teny tao amin'ny synagogan'ny olona eran'i Galilia sady namoaka
ny demonia.
40 Ary nisy
boka nanatona Azy ka nitaraina taminy sady nandohalika teo anatrehany ka nanao
taminy hoe: Raha mety Hianao, dia mahay manadio ahy.
41 Ary Jesosy
dia onena azy ka naninjitra ny tànany, dia nanendry azy ka nanao taminy hoe:
Mety Aho; madiova ianao.
42 Ary niaraka
tamin'izay dia niala taminy ny habokany, ka dia nadio izy.
43 Ary
namepetra azy mafy Jesosy, dia nampandeha azy niaraka tamin'izay
44 ka nanao
taminy hoe: Tandremo tsara mba tsy hisy holazainao na amin'iza na amin'iza; fa
mandehana, misehoa amin'ny mpisorona, ka manatera ny fanadiovana anao, izay
nandidian'i Mosesy, ho vavolombelona amin'ireo.
45 Nefa lasa
ralehilahy ka nilazalaza sy nampiely izany zavatra izany, ka dia tsy nahazo
niditra miharihary tao an-tanàna intsony Jesosy; fa nitoetra tany ivelany
tamin'ny tany foana Izy, dia nanatona Azy ny olona avy eny tontolo eny.
1 Ary nony
niditra tao Kapernaomy indray Izy, rehefa afaka andro vitsivitsy, dia re fa tao
an-trano Izy,
2 ka dia
tafangona ny maro, ka tsy nisy hitoerana intsony, na dia teny anoloan'ny
varavarana aza; ary Izy nitory ny teny taminy.
3 Ary nisy
nanatona nitondra ny anankiray mararin'ny paralysisa ho eo aminy, izay
nolanjain'efa-dahy.
4 Ary satria
tsy afaka nanakaiky Azy izy noho ny habetsahan'ny vahoaka, dia nanesorany ny
tafon'ny trano nitoeran'i Jesosy, ka nony efa voasokatra, dia nampidininy teo
ny fandriana izay nandrian'ilay nararin'ny paralysisa.
5 Ary Jesosy,
nony nahita ny finoan'ireo, dia nanao tamin'ilay mararin'ny paralysisa hoe:
Anaka, voavela ny helokao.
6 Ary nisy
mpanora-dalàna sasany nipetraka teo ka nieritreritra tao am-pony hoe:
7 Nahoana
Ilehity no miteny toy izany? Miteny ratsy* Izy. Iza no mahavela heloka afa-tsy
Iray ihany, dia Andriamanitra? [*Gr. manao blasfemia, izahao Mat.9.3]
8 Ary niaraka
tamin'izay Jesosy dia nahalala tao am-panahiny fa nieritreritra izany tao
am-pony ireo, dia hoy Izy taminy: Nahoana ianareo no mieritreritra izany
zavatra izany ao am-ponareo?
9 Iza moa no
moramora kokoa, ny manao amin'ilay mararin'ny paralysisa hoe: Voavela ny
helokao, sa ny manao hoe: Mitsangàna, betao ny fandrianao, ka mandehana?
10 Fa mba ho
fantatrareo fa ny Zanak'olona manana fahefana etỳ ambonin'ny tany hamela
heloka, dia lazaiko aminao (hoy Izy tamin'ilay mararin'ny paralysisa):
11 Mitsangàna,
betao ny fandrianao, ka modia any an-tranonao.
12 Dia
nitsangana izy ka nambeta ny fandriany niaraka tamin'izay ary niala teo
anatrehan'ny olona rehetra; dia talanjona izy rehetra ka nankalaza
an'Andriamanitra nanao hoe: Tsy mbola nahita izay toy izao izahay.
13 Ary lasa
nandeha teny amoron-dranomasina indray Jesosy; ary ny vahoaka rehetra nanatona
Azy, ka dia nampianatra azy Izy.
14 Ary nony
nandalo Izy, dia nahita an'i Levy, zanak'i Alfeo, nipetraka teo
am-pamorian-ketra*; ka hoy Izy taminy: Manaraha Ahy. Dia nitsangana izy ka
nanaraka Azy.[*Izahao Mat. 9.9]
15 Ary raha
nipetraka nihinana tao an-tranony Izy, dia maro ny mpamory hetra sy ny mpanota
no niara-nipetraka nihinana tamin'i Jesosy mbamin'ny mpianany; fa nisy maro
tao, dia nanaraka Azy izy.
16 Ary ny
mpanora-dalàna, izay isan'ny Fariseo*, raha nahita fa niara-nipetraka nihinana
tamin'ny mpanota sy ny mpamory hetra Izy, dia niteny tamin'ny mpianatra hoe:
Miara-mihinana sy misotro amin'ny mpamory hetra sy ny mpanota Izy![*Na:Ary ny
Mpanora-dalàna sy ny Fariseo]
17 Ary raha
nahare izany Jesosy, dia nanao taminy hoe: Tsy ny finaritra no mila mpanao
fanafody, fa ny marary; tsy tonga hiantso ny marina Aho, fa ny mpanota
18 Ary ny
mpianatr'i Jaona sy ny Fariseo nifady hanina tamin'izany; dia avy izy ka nanao
tamin'i Jesosy hoe: Nahoana ny mpianatr'i Jaona sy ny mpianatry ny Fariseo no
mifady hanina, fa ny mpianatrao kosa tsy mba mifady?
19 Ary Jesosy
niteny taminy hoe: Mahay mifady va ny havan'ny mpampakatra raha mbola ao aminy
ihany ny mpampakatra? Raha mbola ao aminy ihany ny mpampakatra dia tsy mahay
mifady izy.
20 Fa ho avy
andro izay hanalana ny mpampakatra hiala ao aminy, ka amin'izany andro izany
hifady izy.
21 Tsy misy
olona manjaitra tapa-damba tsy mbola voaḷna amin'ny lamba tonta; fa raha
izany, ny vaovao izay natampina dia handrompitra ny tonta, ka hitatra ny
triatra.
22 Ary tsy misy
olona manisy divay vaovao ao anaty siny hoditra tonta. fa raha izany, ny divay
dia hahatriatra ny siny hoditra, ka dia samy ho very foana ny divay sy ny siny
hoditra; fa divay vaovao no ho ao anaty siny hoditra vaovao.
23 Ary nandeha
namaky ny tanim-bary tamin'ny Sabata Jesosy; ary ny mpianatra dia nanoty ny
salohim-bary teny am-pandehanana.
24 Ary ny
Fariseo nanao taminy hoe: Indro, nahoana ireo no manao izay tsy mety amin'ny
Sabata?
25 Fa hoy Izy
taminy: Tsy mbola novakinareo va ny teny milaza ilay nataon'i Davida, raha
reraky ny hanoanana izy mbamin'izay nanaraka azy,
26 fa niditra
tao an-tranon'Andriamanitra tamin'ny andron'i Abiatara mpisoronabe izy ka
nihinana ny mofo aseho, izay mahadiso raha misy homana izany, afa-tsy ny
mpisorona ihany, ary nomeny koa izay nanaraka azy?
27 Ary hoy Izy
taminy: Ny Sabata no natao ho ny olona, fa tsy ny olona ho an'ny Sabata.
28 ka dia Tompon'ny
Sabata aza ny Zanak'olona.
1 Ary niditra tao
amin'ny synagoga indray Jesosy: ary nisy lehilahy anankiray maty* tanana
teo.[*Gr. efa maina, na malazo]
2 Ary nizaha taratra
Azy ny olona, na hahasitrana io amin'ny Sabata Izy na tsia, mba hiampanganany
Azy.
3 Dia hoy Jesosy
tamin'ilay lehilahy maty tanana: Mitsangàna etsy afovoany.
4 Ary hoy koa Izy
tamin'ny olona: Inona moa no mety hatao amin'ny Sabata, ny manao soa va, sa ny
manao ratsy? ny mamonjy aina va, sa ny mahafaty? Fa tsy nety niteny ny olona.
5 Ary nony nijerijery
azy tamin'ny fahatezerana Izy sady nalahelo noho ny hamafin'ny fony, dia hoy
Izy tamin-dralehilahy: Ahinjiro ny tananao. Dia nahinjiny, ka sitrana ny
tànany.
6 Ary lasa nivoaka ny
Fariseo, ka niaraka tamin'izay dia niray tetika tamin'ny Herodiana izy
hanohitra an'i Jesosy mba hahafaty Azy.
7 Ary Jesosy
mbamin'ny mpianany niala teo ka nankany amin'ny ranomasina; ary nisy olona maro
avy tany Galilia nanaraka Azy; ary nisy olona maro koa avy tany Jodia
8 sy Jerosalema sy
Edoma sy tany an-dafin'i Jordana ary tamin'ny tany manodidina an'i Tyro sy
Sidona nandre izay zavatra nataony, dia nankeo aminy.
9 Ary Izy nilaza
tamin'ny mpianany mba hanisy sambokely hiandry Azy noho ny habetsahan'ny
vahoaka, fandrao mifanety aminy ireo.
10 Fa efa nahasitrana
olona maro Izy, ka dia nifanety taminy mba hanendry Azy izay rehetra nanana
aretina*.[*Gr. kapoka]
11 Ary ny fanahy
maloto, raha nahita Azy dia niankohoka teo anatrehany ka niantso hoe: Hianao no
Zanak'Andriamanitra.
12 Ary nandrara azy
mafy Izy tsy hanao izay hahafantarana Azy.
13 Ary niakatra teo
an-tendrombohitra Jesosy ka niantso izay tiany hankeo aminy; dia nankeo aminy
ireo.
14 Ary nanendry roa
ambin'ny folo lahy Izy ho ao aminy sy hirahiny hitori-teny
15 sady hanana
fahefana hamoaka ny demonia.
16 Ary Simona dia
nomeny anarana hafa koa hoe Petera;
17 ary Jakoba,
zanak'i Zebedio, sy Jaona, rahalahin'i Jakoba; izy mirahalahy dia nomeny
anarana hafa koa hoe Boaneryjesy, izany hoe Zana-baratra;
18 ary Andrea sy
Filipo sy Bartolomeo sy Matio sy Tomasy sy Jakoba, zanak'i Alfeo, sy Tadeo sy
Simona Kananeana*[*Na: Zelota, izahao Lio.6.15]
19 ary Jodasy
Iskariota, ilay namadika Azy.
20 Ary niditra
tao an-trano Izy, dia niangona indray ny vahoaka, ka dia tsy nahazo
nihinan-kanina akory Izy.
21 Ary ny
havany, raha nandre, dia nivoaka hihazona Azy; fa hoy ireo: Efa very saina Izy.
22 Ary ny
mpanora-dalàna izay nidina avy tany Jerosalema dia nanao hoe: Manana an'i
Belzeboba Izy, sy hoe: Ny lohan'ny demonia no amoahany ny demonia.
23 Ary rehefa
niantso ireo hankeo aminy Izy, dia nanao fanoharana taminy hoe: Hataon'i Satana
ahoana no famoaka an'i Satana?
24 Fa raha misy
fanjakana miady an-trano, dia tsy haharitra izany fanjakana izany.
25 Ary raha
misy mpiray trano miady an-trano, dia tsy haharitra izany mpiray trano izany.
26 Ary raha Satana no
mitsangana hanohitra ny tenany ka miady an-trano, dia tsy haharitra izy, fa ho
rava ny heriny.
27 Kanefa tsy misy
olona afaka miditra ao an-tranon'ny mahery ka handroba ny entany, raha tsy
afatony aloha ilay mahery, dia vao robainy ny ao an-tranony.
28 Lazaiko aminareo
marina tokoa: Hahazo famelan-keloka ny zanak'olombelona amin'ny ota rehetra sy
ny fitenenan-dratsy* rehetra izay ataony;[*Gr.blasfemia; izahao Mat. 9.3]
29 fa izay miteny
ratsy ny Fanahy Masina kosa dia tsy mahazo famelan-keloka mandrakizay, fa
miendrika hohelohina ny amin'ny ota mandrakizay izy; izany no nolazainy,
30 satria ny olona
nanao hoe: Azom-panahy maloto Izy.
31 Ary avy ny reniny
mbamin'ny rahalahiny ka nijanona teo ala-trano, dia naniraka tao aminy hiantso
Azy.
32 Ary ny vahoaka
nipetraka manodidina Azy ka nanao taminy hoe: Indreo, ato ala-trano ny reninao
sy ny rahalahinao mitady Anao.
33 Ary Izy namaly azy
ka nanao hoe: Iza no reniko sy rahalahiko?
34 Ary nony nijery
izay nipetraka manodidina Azy Izy, dia hoy Izy: Indreo ny reniko sy ny
rahalahiko!
35 Fa na iza na iza
no manao ny sitrapon'Andriamanitra, dia izy no rahalahiko sy anabaviko ary
reniko.
1 Ary nampianatra teo
amoron'ny ranomasina indray Jesosy; ary nisy vahoaka betsaka nanatona Azy, dia
niditra teo an-tsambokely Izy ka nipetraka teo amin'ny ranomasina; ary ny
vahoaka rehetra dia teny an-tanety amoron-dranomasina.
2 Ary nampianatra azy
zavatra maro tamin'ny fanoharana Izy ka nilaza tamin'ny fampianarany azy hoe:
3 Mihainoa: Indro,
nivoaka ny mpamafy mba hamafy.
4 Ary raha namafy
izy, ny sasany dia voafafy teny amoron-dalana, dia avy ny vorona ka nandany
izany.
5 Ary ny sasany dia
voafafy teny amin'ny tany marivo ambony vatolampy; dia nalaky nitrebona ireny,
satria tsy nisy tany lalina.
6 Fa rehefa niposaka
ny masoandro, dia nalazo ireny; ary satria tsy nanam-paka, dia maty izy.
7 Ary ny sasany dia
voafafy teny amin'ny tsilo; ary ny tsilo naniry ka nangeja azy, dia tsy namoa
izy.
8 Ary ny sasany dia
voafafy teny amin'ny tany tsara, ary raha naniry sy namoa, dia vokatra, fa
namoa: ny sasany avy telo-polo heny, ary ny sasany avy enim-polo heny, ary ny
sasany avy zato heny.
9 Ary hoy Izy: Izay
manan-tsofina ho enti-mihaino, aoka izy hihaino.
10 Ary raha tao
amin'ny mangingina Izy, dia nanontany Azy ny amin'ny fanoharana ireo nomba Azy
mbamin'ny roa ambin'ny folo lahy.
11 Ary hoy Izy
taminy: Hianareo no efa nomena ny zava-miafina ny amin'ny
fanjakan'Andriamanitra; fa amin'ireny izay any ivelany kosa ny zavatra rehetra
dia atao amin'ny fanoharana;
12 mba hijery
mandrakariva ihany izy, fa tsy hahita; ary mba handre mandrakariva ihany izy,
fa tsy hahafantatra; fandrao hibebaka izy, ka havela ny helony (Isa. 6. 9, 10).
13 Ary hoy Izy
taminy: Tsy azonareo va ilay fanoharana teo? koa hataonareo ahoana no
fahafantatra ny fanoharana rehetra?
14 Ny mpamafy
dia mamafy ny teny.
15 Ary ireto no
ilay teo amoron-dalana, dia izay amafazana ny teny, fa rehefa nandre izy, dia
avy miaraka amin'izay Satana ka manaisotra ny teny izay nafafy tao aminy.
16 Ary tahaka
izany koa, ireto no ilay voafafy teny amin'ny tany marivo ambony vatolampy, dia
izay mandre ny teny ka malaky mandray izany amin'ny hafaliana;
17 nefa tsy
manam-paka ao anatiny ireny, fa maharitra vetivety foana; koa rehefa afaka
izany, ka tonga izay fahoriana na fanenjehana noho ny teny, dia tafintohina
miaraka amin'izay izy.
18 Ary misy
hafa koa izay voafafy teny amin'ny tsilo, dia ireo no ilay nandre ny teny,
19 fa ny
fiahiahiana izao fiainana izao sy ny fitaky ny harena ary ny filàna ny zavatra
hafa miditra, dia mangeja ny teny, ka tsy mamoa izy.
20 Ary ireto no
ilay voafafy teny amin'ny tany tsara, dia izay mandre ny teny ka mandray azy
dia mamoa: ny sasany avy telo-polo heny, ny sasany avy enim-polo heny, ary ny
sasany avy zato heny.
21 Ary hoy Izy
taminy: Moa entina* va ny jiro mba hosaronan'ny vata famarana, na hatao ao
ambanin'ny farafara? Tsy hatao amin'ny fanaovan-jiro va izy?[*Gr. avy]
22 Fa tsy misy
takona izay tsy ho hita, na miafina izay tsy haseho.
23 Raha misy olona
manan-tsofina ho enti-mihaino, aoka izy hihaino.
24 Ary hoy Izy
taminy: Diniho izay teny renareo; araka ny ohatra anoharanareo ihany no hanoharana
ho anareo, ary homena mihoatra aza ianareo.
25 Fa izay manana no
homena; ary ny amin'ny tsy manana, na dia izay ananany aza dia halaina aminy.
26 Ary hoy Izy: Toy
izao ny fanjakan'Andriamanitra: tahaka ny lehilahy mamafy voa amin'ny tany
27 ka matory sy
mahatsiaro isan'alina sy isan'andro; ary ny voa dia mitsimoka ka maniry, nefa
tsy fantany ny faniriny
28 Fa ny tany
mahavokatra ho azy: voalohany misy tahony, dia teraka, ary rehefa izany, dia
feno voa.
29 Fa rehefa azo
jinjana izy, dia jinjany miaraka amin'izay, fa efa tonga ny fararano.
30 Ary hoy Izy:
Ahoana no hanoharantsika ny fanjakan'Andriamanitra, ary inona no fanoharana
hanoharantsika azy?
31 Tahaka ny
voantsinapy izy, izay kely noho ny voa rehetra, raha vao afafy amin'ny tany;
32 Fa rehefa voafafy
kosa izy, dia maniry ka tonga lehibe noho ny anana rehetra, ary mandrantsana
vaventy, ka azon'ny voro-manidina itoerana ny alokalony.
33 Ary fanoharana
maro toy izany no nanambarany ny teny taminy, araka izay hainy hohenoina.
34 Ary raha tsy tamin'ny
fanoharana dia tsy niteny taminy Izy; ary tamin'ny mangingina no nilazany
tamin'ny mpianany ny hevitr'ireo rehetra ireo.
35 Ary androtrizay
ihany, rehefa hariva ny andro, dia hoy Izy taminy: Andeha isika hita ho eny
am-pita.
36 Ary rehefa
nampodin'ny mpianany ny vahoaka, dia nentiny tamin'io sambokely io tamin'izao
ihany Jesosy. Ary nisy sambokely sasany koa niaraka taminy.
37 Ary nisy
tafio-drivotra mahery, ary nianjerazeran'ny alondrano ny sambokely ka nila ho
feno rano.
38 Ary Jesosy natory
teo am-bodin'ny sambokely tambonin'ny ondana; ary namoha Azy izy ireo ka nanao
taminy hoe: Mpampianatra ô, tsy mampaninona Anao va izao hahafatesanay izao?
39 Ary nifoha Izy,
dia niteny mafy ny rivotra sady nilaza tamin'ny ranomasina hoe: Mangina,
mitsahara. Ary dia nitsahatra ny rivotra, ka tony tsara ny andro.
40 Ary hoy Izy
taminy: Nahoana no saro-tahotra ianareo? Tsy mbola manam-pinoana va ianareo?
41 Ary natahotra
indrindra izy ireo ka niresaka hoe: Iza moa Ity, fa ny rivotra sy ny ranomasina
aza manaiky Azy?
1 Ary tonga
teny am-pitan'ny ranomasina tao amin'ny tanin'ny Gerasena izy ireo.
2 Ary nony
niala teo an-tsambokely Izy, niaraka tamin'izay dia nisy lehilahy azom-panahy
maloto nivoaka avy teny amin'ny fasana ka nifanena taminy,
3 fa nitoetra
tao amin'ny fasana izy; ary tsy nisy olona nahafatotra azy intsony na dia
tamin'ny gadra aza.
4 Fa efa
nafatony matetika tanin'ny gadra, na ny tànany, na ny tongony; nefa ny gadra
tamin'ny tànany notapahiny, ary ny gadra tamin'ny tongony notorotoroiny, ka tsy
nisy olona nahafolaka azy.
5 Ary
mandrakariva, na andro na alina, dia nitoetra teny amin'ny fasana sy teny
an-tendrombohitra izy ka ninananana sady niteti-tena tamin'ny vato.
6 Fa nony
nahita an'i Jesosy teny lavitra eny izy, dia nihazakazaka ka niankohoka teo
anatrehany
7 sady niantso
tamin'ny feo mahery hoe: Moa mifaninona akory izaho sy Hianao, ry Jesosy,
Zanak'Andriamanitra Avo Indrindra? Ampianianiko amin'Andriamanitra Hianao, aza
mampijaly ahy,
8 satria Jesosy
efa nanao taminy hoe: Mivoaha amin'ity lehilahy ity, ry fanahy maloto.
9 Dia nanontany azy
Jesosy hoe: Iza moa no anaranao? Ary izy namaly hoe: Legiona no anarako, satria
maro izahay.
10 Ary nifona mafy
taminy izy mba tsy horoahiny hiala amin'izany tany izany.
11 Ary nisy kisoa
maro andiany izay nandrasana teny akaikin'ny tendrombohitra.
12 Ary nifona
taminy ireo ka nanao hoe: Alefaso izahay ho any anatin'ny kisoa mba hiditra any
aminy.
13 Dia neken'i
Jesosy. Ary ny fanahy maloto, rehefa nivoaka, dia niditra tao anatin'ny kisoa;
ary ireo kisoa andiany ireo nitratrevatreva teny amin'ny hantsana ho any
amin'ny ranomasina (tokony ho roa arivo no isany), ka dia maty* tany amin'ny
ranomasina izy.[*Gr. kenda]
14 Ary ny
mpiandry azy dia nandositra ka nilaza tao an-tanàna sy tany an-tsaha. Dia
nandeha ny olona mba hizaha izany zavatra izany;
15 ary tonga
tany amin'i Jesosy izy ka nahita ilay demoniaka, izay nisy ny legiona, fa indro
izy nipetraka nitafy lamba sady ary saina; ka raiki-tahotra ny olona.
16 Ary izay efa
nahita dia nilazalaza tamin'ny olona izay natao tamin'ilay demoniaka sy ny
amin'ny kisoa.
17 Ary nifona
tamin'i Jesosy izy mba hiala amin'ny taniny.
18 Ary rehefa
hiondrana teo an-tsambokely Jesosy, dia nangataka taminy ilay demoniaka mba
hanaraka Azy.
19 Nefa tsy
navelan'i Jesosy izy; fa hoy Izy taminy: Modia ihany any an-tranonao ho any
amin'ny havanao, ka lazao aminy izay zavatra lehibe nataon'ny Tompo taminao sy
ny namindrany fo taminao.
20 Dia nandeha
izy ka nitory tany Dekapolisy izay zavatra lehibe efa nataon'i Jesosy taminy;
ka dia gaga ny olona rehetra.
21 Ary rehefa
nita an-tsambokely indray Jesosy ka tonga teny am-pita, dia nisy vahoaka
betsaka tafangona teo aminy; ary teo amoron-dranomasina Izy.
22 Dia avy ny
anankiray tamin'ny mpanapaka ny synagoga, Jairo no anarany; ary rehefa nahita
an'i Jesosy izy, dia niankohoka teo amin'ny tongony
23 ka niangavy
fatratra taminy hoe: Marary efa ho faty ny zanako-vavy kely; andeha re,
mametraha ny tananao aminy, mba ho sitrana* izy ka ho velona.[*Gr. voavonjy]
24 Dia nandeha
niaraka taminy Izy; ary nisy vahoaka betsaka nanaraka Azy ka nifanety taminy.
25 Ary nisy
vehivavy anankiray izay efa narary* roa ambin'ny folo taona [*Gr. narary
nandeha rà]
26 sady efa
niaritra zavatra be tamin'ny mpanao fanafody maro ka nandany ny fananany
rehetra, nefa tsy nety sitrana, fa vao mainka nihanarary kokoa aza;
27 koa rehefa
nahare ny amin'i Jesosy izy, dia nankeo ivohony namaky ny vahoaka ary nanendry
ny lambany.
28 Fa hoy izy: Na dia
ny fitafiany ihany aza no voatendriko, dia ho sitrana* aho.[*Gr. voavonjy]
29 Ary niaraka
tamin'izay dia ritra ny loharanon'aretiny*, ka tsaroany tao amin'ny tenany fa
sitrana izy.[*Gr. fandehanan'ny ràny]
30 Ary niaraka
tamin'izay dia fantatr'i Jesosy fa nisy hery niala taminy, dia nihodina teo
afovoan'ny vahoaka Izy ka nanao hoe: Iza izany nanendry ny lambako izany?
31 Fa hoy ny mpianany
taminy: Hitanao izao vahoaka mifanety aminao izao, ka hoy Hianao va: Iza no
nanendry Ahy?
32 Ary nijery
manodidina Izy hizaha ny vehivavy izay efa nanao izany.
33 Fa raiki-tahotra
sady tora-kovitra ravehivavy, satria fantany izay natao taminy, ka dia nankeo
aminy izy ka niankohoka teo anatrehany ary nanambara taminy ny marina rehetra.
34 Ary hoy Izy
taminy: Anaka, ny finoanao no nahasitrana* anao: mandehana soa aman-tsara, ary
sitràna amin'ny aretinao.[*Gr. namonjy]
35 Raha mbola niteny
Jesosy, dia nisy tonga avy tany amin'ilay mpanapaka ny synagoga ka nanao hoe:
Efa maty ny zanakao-vavy; nahoana ianao no mbola manahirana ny Mpampianatra
ihany?
36 Fa tsy nahoan'i
Jesosy izany teny nataony izany, fa* hoy Izy tamin'ilay mpanapaka ny synagoga:
Aza matahotra, minoa fotsiny ihany.[*Na: Ary nony ren'i Jesosy ny teny nataony,
dia]
37 Ary tsy nisy olona
navelany hanaraka Azy afa-tsy Petera sy Jakoba ary Jaona, rahalahin'i Jakoba.
38 Ary dia tonga tao
an-tranon'ilay mpanapaka ny synagoga izy ireo, ka hitan'i Jesosy ny tabataba,
dia ny olona izay nitomany sy ninaonaona be ihany.
39 Ary rehefa niditra
Izy, dia niteny taminy hoe: Nahoana ianareo no mitabataba sy mitomany? Tsy maty
razazavavy, fa matory.
40 Dia nihomehy Azy
fatratra ny olona. Fa nandroaka azy rehetra Izy, dia nitondra ny ray
aman-drenin-drazazavavy mbamin'izay olona teo aminy ka niditra tao amin'izay
nisy an-drazazavavy.
41 Dia nandray ny
tànan-drazazavavy Izy ka niteny taminy hoe: Talita komy, izany hoe, raha adika:
Ry zazavavy, hoy Izaho aminao: Mitsangàna.
42 Dia nitsangana
niaraka tamin'izay razazavavy ka afa-nandeha; fa efa roa ambin'ny folo taona
izy. Ary niaraka tamin'izay dia talanjona indrindra ny olona.
43 Ary Jesosy
nandrara azy mafy mba tsy ho fantatr'olona izany; ary nasainy nomena hanina
razazavavy.
1 Ary niala teo Izy
ka tonga tany amin'ny taniny, sady nanaraka Azy ny mpianany.
2 Ary rehefa tonga ny
Sabata, dia nampianatra tao amin'ny synagoga Izy; ary maro izay nihaino Azy dia
talanjona indrindra ka nanao hoe: Taiza no nahazoan'ilehity izany zavatra
izany, ary manao ahoana ny fahendrena nomena Azy sy izao asa lehibe ataon'ny
tànany izao?
3 Tsy ilay
mpandrafitra, zanak'i Maria, ary rahalahin'i Jakoba sy Josesy sy Jodasy sy Simona
va Ilehity? Ary tsy etỳ amintsika va ireo anabaviny? Dia tafintohina
taminy izy.
4 Fa ho Jesosy
taminy: Tsy misy mpaminany tsy hajaina afa-tsy eo amin'ny taniny sy ny havany
ary ny ankohonany ihany.
5 Ary tsy nahazo
nampiseho hery akory Izy teo, afa-tsy ny nametraka ny tànany tamin'ny olona
marary vitsy foana ka nahasitrana azy.
6 Ary gaga Izy noho
ny tsi-finoany. Dia nitety ny vohitra manodidina Izy ka nampianatra.
7 Ary niantso ny roa
ambin'ny folo lahy hankeo aminy Izy ka naniraka azy tsiroaroa sy nanome azy
fahefana hamoaka fanahy maloto.
8 Ary nandrara azy
Izy mba tsy hitondra zavatra ho any amin'ny halehany, na hanina, na kitapo, na
vola* ao amin'ny fehin-kibony, afa-tsy tehina ihany.[*Gr. varahina]
9 Fa asio kapa ny
tongotrareo; ary aza mitondra akanjo roa.
10 Ary hoy koa Izy
taminy: Izay trano hidiranareo, dia mitoera ao mandra-pialanareo any.
11 Ary izay tanàna
tsy hampandroso anareo, na tsy hihaino anareo, raha miala ianareo, dia
ahintsano ny vovoka ao am-paladianareo ho vavolombelona aminy.
12 Dia lasa nandeha
izy ireo ka nitory fa tokony hibebaka ny olona.
13 Ary demonia
maro no navoakany; ary nohosorany diloilo ny marary maro ka nositraniny.
14 Ary nahare
izany Heroda mpanjaka (fa efa nalaza ny anaran'i Jesosy), dia hoy izy: Jaona
Mpanao-batisa efa nitsangana tamin'ny maty izay, ka izany no ananany hery hanao
ireo asa lehibe ireo.
15 Fa hoy ny
sasany: Elia Izy; ary hoy ny sasany: Mpaminany Izy dia toy ny anankiray amin'ny
mpaminany.
16 Ary rehefa
nahare izany Heroda, dia hoy izy: Jaona izay, ilay notapahiko ny lohany; efa
nitsangana izy.
17 Fa Heroda
ihany no naniraka sy nisambotra an'i Jaona ka namatotra azy tao an-tranomaizina
noho ny amin'i Herodiasy vadin'i Filipo rahalahiny; fa nanambady azy izy.
18 Fa Jaona efa
nilaza tamin'i Heroda hoe: Diso ianao, raha manambady ny vadin'ny rahalahinao.
19 Ary
Herodiasy dia nanao otri-po taminy ka naniry hahafaty azy, nefa tsy nahazo.
20 Fa Heroda
natahotra an'i Jaona, satria fantany fa lehilahy marina sy masina izy, ka dia
niaro azy izy; ary rehefa nandre azy izy, dia very hevitra be ihany*; ary
nihaino azy tamin'ny hafaliana izy.[*Na: nanao zavatra maro]
21 Ary rehefa
tonga izay andro antonona, dia ilay nanaovan'i Heroda fanasana ho an'ny lehibe
sy ny mpifehy arivo ary ny loholona tany Galilia tamin'ny andro fahatsiarovana
ny* nahaterahany,[*Na: tamin'ny fitsingerenan'ny taona]
22 ka niditra
ny zanakavavin'i Herodiasy ary nandihy ka nahafaly an'i Heroda mbamin'izay
niara-nipetraka nihinana teo aminy, dia hoy ny mpanjaka tamin-drazazavavy:
Angataho amiko izay tianao na inona na inona, dia homeko anao.
23 Ary nianiana
taminy hoe izy: Na inona na inona hangatahinao amiko dia homeko anao na dia
hatramin'ny antsasaky ny fanjakako aza.
24 Dia nivoaka
razazavavy ka nanao tamin-dreniny hoe: Inona no hangatahiko? Ary hoy reniny: Ny
lohan'i Jaona Mpanao-batisa.
25 Dia niditra
faingana niaraka tamin'izay izy ho ao amin'ny mpanjaka ka nangataka hoe: Tiako
raha homenao ahy faingana eto an-dovia ny lohan'i Jaona Mpanao-batisa.
26 Dia nalahelo
indrindra ny mpanjaka, kanefa noho ny fianianany sy ny olona izay nipetraka
nihinana teo, dia tsy sahy nandà azy izy.
27 Ary niaraka
tamin'izay ny mpanjaka dia naniraka mpiambina, ka nasainy nentiny ny lohan'i
Jaona. Ary dia nandeha izy, ka notapahiny tao an-tranomaizina ny lohany.
28 Dia nentiny
teo an-dovia ny lohany ka nomeny an-drazazavavy; ary razazavavy kosa dia nanome
azy an-dreniny.
29 Ary rehefa
nandre izany ny mpianany, dia tonga ka naka ny faty ary nandevina azy.
30 Ary ny
Apostoly niangona teo amin'i Jesosy ka nilaza taminy izay rehetra efa nataony
mbamin'izay nampianariny.
31 Ary hoy
Jesosy taminy: Avia ianareo hitokana any an-tany foana, ka mialà sasatra
kelikely (fa maro no nifamoivoy, ka tsy nisy hihinanana aza).
32 Dia nandeha
an-tsambokely izy hitokana any an-tany foana.
33 Ary ny olona
nahita azy mandeha, sady betsaka no nahalala an'i Jesosy, dia niala avy teny
amin'ny tanàna rehetra ny olona ka nihazakazaka nandeha an-tanety*, dia tonga
talohany.[*Na: nandeha tongotra]
34 Ary nony
niala Jesosy, dia nahita vahoaka betsaka Izy ka onena azy, fa tahaka ny ondry
tsy manana mpiandry ireo; dia nampianatra azy zavatra maro Izy.
35 Ary rehefa
hariva ny andro, dia nanatona Azy ny mpianany ka nanao hoe: Tany foana ity, ka
efa hariva ny andro ankehitriny;
36 ravao ny
olona mba hankanesany eny an-tsaha sy eny amin'ny vohitra manodidina hividy
hanina ho azy.
37 Fa Izy
namaly ka nanao taminy hoe: Omeonareo hanina izy. Fa hoy kosa izy ireo taminy:
Handeha hividy mofo izay azon'ny denaria roan-jato va izahay, ka homenay azy
hohaniny?
38 Fa hoy Izy
taminy: Misy mofo firy any aminareo? Andeha, izahao. Ary rehefa fantany, dia
hoy izy: Dimy sy hazandrano roa.
39 Dia nasain'i
Jesosy nampipetraka ny olona rehetra hatao an-tokotokony eny ambonin'ny
ahi-maitso izy.
40 Dia
nipetraka an-tokony zato sy dimam-polo avy ny olona.
41 Ary rehefa
voarain'i Jesosy ny mofo dimy sy ny hazandrano roa, dia niandrandra ny lanitra
Izy ka nisaotra, dia novakiny ny mofo ka natolony ny mpianatra mba harosony eny
anoloan'ny olona; ary ny hazandrano roa nozarainy tamin'ny olona rehetra.
42 Ary samy
nihinana avokoa ny olona rehetra ka voky.
43 Ary
nangoniny izay sombintsombin'ny mofo sy ny hazandrano, ka dia nahafeno harona
roa ambin'ny folo.
44 Ary izay
nihinana ny mofo dia dimy arivo lahy.
45 Ary niaraka
tamin'izay Jesosy dia nanery ny mpianany hiondrana an-tsambokely hita hialoha
ho any Betsaida, mandra-pandràvany ny vahoaka.
46 Ary rehefa
nanao veloma ny olona Izy, dia lasa nankany an-tendrombohitra hivavaka.
47 Ary nony
hariva ny andro, dia efa mby teo ampovoan'ny ranomasina ny sambokely, ary Izy
irery ihany no teo an-tanety.
48 Ary nahita
azy ireo sahirana nivoy fatratra Izy, fa notohain'ny rivotra: ary tokony ho
tamin'ny fiambenana fahefatra amin'ny alina dia nankeny aminy nitsangantsangana
tambonin'ny ranomasina Jesosy ka nikasa handalo azy.
49 Ary rehefa
hitany nitsangantsangana tambonin'ny ranomasina Izy, dia nataony ho matoatoa,
ka niantso mafy izy ireo.
50 Fa izy
rehetra samy nahita Azy avokoa, ka dia raiki-tahotra. Ary Izy niteny taminy
niaraka tamin'izay ka nanao taminy hoe: Matokia, fa Izaho ihany; aza matahotra.
51 Ary niakatra
nankeo aminy teo an-tsambokely Izy; dia nitsahatra ny rivotra, ka dia talanjona
izy ireo.
52 Ary tsy
fantany ny amin'ny mofo; fa efa mafy ny fony.
53 Ary nony tafita
izy, dia tonga teo amin'ny tany Genesareta ka niantsona teo.
54 Ary raha niala teo
an-tsambokely izy, dia nahalala an'i Jesosy niaraka tamin'izay ny olona teo
55 ka nihazakazaka
tamin'izany tany rehetra izany ary nitondra ny marary tamin'ny fandriana ho any
amin'izay reny fa nitoerany.
56 Ary na taiza na
taiza no nidiran'i Jesosy, na tao amin'ny vohitra, na tao an-tanàna, na tany
an-tsaha, dia napetraka teo an-kianja ny marary, ary ny olona nangataka
hanendry na dia ny somotraviavin-dambany ihany aza; ary sitrana* izay rehetra
nanendry Azy.[*Gr. voavonjy]
1 Ary niangona teo
aminy ny Fariseo sy ny mpanora-dalàna sasany, izay avy tany Jerosalema
2 ka nahita ny
mpianatra sasany fa nihinan-kanina tamin'ny tanana tsy madio, izany hoe, tsy
voasasa.
3 (Fa ny Fariseo sy
ny Jiosy rehetra tsy mba mihinana, raha tsy efa manasa tsara* ny tànany, satria
mitàna ny fampianarana voatolotry ny razana izy.[*Gr. sasàny amin'ny
totohondry]
4 Ary raha avy
any an-tsena, dia tsy mihinana izy, raha tsy misasa aloha. Ary misy fomba maro
koa izay noraisiny hotanana, dia ny manasa kapoaka sy famarana* mbamin'izay
fanaka varahina**.) [* Gr. sekstaria] [** ampio hoe: ary farafara]
5 Dia nanontany
Azy ny Fariseo sy ny mpanora-dalàna hoe: Nahoana ny mpianatrao no tsy manaraka
ny fampianarana voatolotry ny razana, fa mihinan-kanina amin'ny tanana tsy
misasa izy?
6 Fa Jesosy
nanao taminy hoe: Marina ny naminanian'Isaia anareo mpihatsaravelatsihy, araka
ny voasoratra hoe: Ity firenena ity manaja Ahy amin'ny molony, Fa ny fony kosa
lavitra Ahy.
7 Koa foana ny
ivavahan'ireo amiko, Raha mampianatra ny didin'olombelona ho fampianarana izy.
(Isa. 29. 13).
8 Mahafoy ny
didin'Andriamanitra ianareo ka mitana ny fanaon'ny olona.
9 Ary hoy koa Izy
taminy: Hay! tsara ny nahafoizanareo ny didin'Andriamanitra mba hitandremanareo
ny fampianarana voatolotra anareo!
10 Fa hoy
Mosesy: Manajà ny rainao sy ny reninao (Eks. 20. 12), ary koa: Izay miteny
ratsy ny rainy sy ny reniny dia hatao maty tokoa (Eks. 21. 17).
11 Fa hoy kosa
ianareo: Raha misy olona milaza amin'ny rainy na amin'ny reniny hoe: Efa
korbana (izany hoe, fanatitra ho an'Andriamanitra) izay rehetra tokony
hahazoanao soa avy amiko,
12 dia* tsy
avelanareo hanao na inona na inona ho an'ny rainy sy ny reniny intsony
izy,[*Na: dia voafehin'ny voadiny izy. Ary dia etc]
13 ka dia
foananareo ny tenin'Andriamanitra amin'ny fampianarana voatolotra anareo, izay
nasainareo hotandremana; ary zavatra maro mifanahatahaka amin'izany koa no
ataonareo.
14 Ary niantso
ny vahoaka hankeo aminy indray Izy ka nanao taminy hoe: Mihainoa Ahy ianareo
rehetra, ka mahafantara.
15 Fa tsy ny
zavatra avy eo ivelany izay miditra ao anatin'ny olona no mahaloto azy; fa izay
mivoaka avy ao anatin'ny olona no mahaloto azy*. [*Ampio hoe:]
16 [Raha misy
manan-tsofina ho enti-mihaino, aoka izy hihaino]
17 Ary rehefa niala
teo amin'ny vahoaka Izy ka niditra tao an-trano, dia nanontany Azy ny mpianany
ny amin'izany fanoharana izany.
18 Ary hoy Izy
taminy: Hay! ianareo koa aza mba tsy mahafantatra! Tsy fantatrareo va fa izay
rehetra eo ivelan'ny olona ka miditra ao anatiny dia tsy mahaloto azy,
19 satria tsy miditra
ao am-pony izany, fa ao an-kibony ihany, ka dia mivoaka ao amin'ny fivoahana;
izany no nolazainy mba hahadio ny hanina rehetra.
20 Ary hoy Izy: Izay
mivoaka avy ao amin'ny olona, dia izany no mahaloto azy.
21 Fa avy ao
anatin'ny olona dia avy ao am-pony, no ivoahan'ny sain-dratsy, dia ny
fijangajangana, ny halatra, ny vonoan-olona, ny fakam-badin'olona,
22 ny fieremana, ny
lolom-po, ny fitaka, ny fijejojejoana, ny maso ratsy, ny fitenenan-dratsy*, ny
avonavona, ny fahadalana:[*Gr. blasfemia; izahao Mat. 9. 3]
23 izany zava-dratsy
rehetra izany no mivoaka avy ao anatin'ny olona ka mahaloto azy.
24 Ary niala teo
Jesosy ka lasa nankany amin'ny sisin-tanin'i Tyro sy Sidona; dia niditra tao an-trano
Izy, ary tiany tsy ho fantatry ny olona izany; kanefa tsy nahazo niery Izy.
25 Fa niaraka
tamin'izay dia nisy vehivavy anankiray nandre ny aminy (ny zananivavy tanora
dia azom-panahy maloto), dia nankao ka niankohoka tamin'ny tongony.
26 Ary jentilisa
ravehivavy, avy amin'ny firenena Syro-foinika; dia nangataka taminy izy mba
hamoaka ny demonia amin'ny zananivavy.
27 Fa hoy Jesosy
taminy: Aoka ho voky aloha ny zaza; fa tsy mety raha maka ny mofon-jaza ka
manipy azy ho an'ny amboakely.
28 Fa ravehivavy
namaly ka nanao taminy hoe: Eny, Tompoko; kanefa na dia ny amboakely ao
ambanin'ny latabatra aza dia mba mihinana ny sombintsombin'ny mofon-jaza ihany.
29 Dia hoy Jesosy
taminy: Noho izany teny izany mandehana ianao; efa nivoaka tamin'ny
zanakao-vavy ny demonia.
30 Ary raha tonga tao
an-tranony ravehivavy, dia hitany nandry teo ambonin'ny farafara ny zananivavy,
ary ny demonia efa nivoaka taminy.
31 Ary Jesosy niala
indray tamin'ny sisin-tanin'i Tyro, dia namaky an'i Sidona sy ny tany
Dekapolisy ka nankany amoron'ny Ranomasin'i Galilia.
32 Ary nisy marenina
sady raiki-dela anankiray nentiny tany aminy, ka nangataka taminy ireo mba
hametrahany tanana.
33 Ary nitondra
an-dralehilahy nitanila niala teo amin'ny vahoaka Izy, dia nangarona ny sofiny
tamin'ny rantsan-tànany, dia nandrora ka nanendry ny lelany;
34 ary niandrandra ny
lanitra Izy, dia nisento ka nanao taminy hoe: Efata, izany hoe: Maladia.
35 Dia nalady ny
sofiny, sady voavaha ny fatoran'ny lelany, ka dia nahateny tsara izy.
36 Ary nandrara ny
olona teo Jesosy mba tsy hilazalaza na amin'iza na amin'iza; fa na dia norarany
aza izy, dia vao mainka nampiely izany bebe kokoa.
37 Dia talanjona
indrindra ny olona ka nanao hoe: Tsara ny nanaovany ny zavatra rehetra; fa sady
mampahalady ny marenina Izy no mampiteny ny moana.
1 Tamin'izany andro
izany, nony betsaka indray ny vahoaka teo sady tsy nanan-kohanina izy, dia
nantsoin'i Jesosy hanatona Azy ny mpianany ka nilazany hoe:
2 Mahonena Ahy ireo
vahoaka, fa hateloana izay no nitoerany tatỳ amiko, sady tsy
manan-kohanina izy;
3 koa raha hampodiko
ho any an-tranony mbola tsy nihinana izy, dia ho reraka eny an-dalana, sady avy
lavitra ny sasany.
4 Fa ny mpianany
namaly Azy hoe: Aiza no hahazoana mofo atỳ an-efitra hahavoky ireto olona
ireto!
5 Ary izy
nanontany azy hoe: Misy mofo firy any aminareo? Ary hoy ireo: Fito.
6 Dia nasainy
nipetraka tamin'ny tany ny vahoaka; ary dia nandray ny mofo fito Izy, ka rehefa
nisaotra, dia novakiny ka natolony ny mpianany mba harosony; dia narosony teny
anoloan'ny vahoaka izany.
7 Ary nisy
hazandrano madinika vitsy tao aminy; ka rehefa nanaovan'i Jesosy fisaorana
ireo, dia nasainy naroso teny anoloany koa.
8 Ary nihinana
ny olona, ka dia voky; ary nangoniny ny sombintsombiny sisa tsy lany, ka nisy
fito sobiky.
9 Ary tokony ho
efatra arivo ireo. Dia nampodiny izy.
10 Ary niaraka
tamin'izay dia niondrana an-tsambokely Izy mbamin'ny mpianany ka tonga tany
amin'ny fari-tanin'i Dalmanota.
11 Ary ny Fariseo
nankany, dia niady hevitra taminy ary naka fanahy Azy ka nitady famantarana avy
any an-danitra.
12 Ary nisento
mafy am-panahy Jesosy ka nanao hoe: Nahoana ity taranaka ity no mitady
famantarana? Lazaiko aminareo
marina tokoa fa tsy homena famantarana akory ity taranaka ity.
13 Ary nandao azy
Izy, dia niondrana indray ka lasa nankeny am-pita.
14 Ary tsy
tsaroan'ireo ny hitondra mofo, ka tsy nisy teo an-tsambokely afa-tsy mofo iray
ihany.
15 Dia nananatra azy
Izy ka nanao hoe: Mihevera, ka mitandrema ianareo, fandrao azon'ny
masirasiran'ny Fariseo sy ny masirasiran'i Heroda.
16 Ary niara-nisaina
izy ka nanao hoe: Ny tsy nitondrantsika mofo angaha izany.
17 Ary Jesosy
nahalala izany, dia nanao taminy hoe: Nahoana ianareo no miara-misaina, satria
tsy manana mofo? Tsy mbola mahazo an-tsaina na mahafantatra va ianareo? Efa
mafy va ny fonareo?
18 Mana-maso, fa tsy
mahita va ianareo? Ary manan-tsofina, fa tsy mandre va ianareo? Ary tsy
mahatadidy va ianareo?
19 Raha ny mofo dimy
no novakiko ho an'ny dimy arivo, firy harona moa no sombintsombiny
nangoninareo? Hoy ny mpianany taminy: Roa ambin'ny folo.
20 Ary raha ny mofo
fito ho an'ny efatra arivo, firy sobiky moa no sombintsombiny nangoninareo? Dia
hoy ny mpianany: Fito.
21 Ary hoy Izy
taminy: Mbola tsy mahafantatra ihany va ianareo?
22 Ary tonga tany
Betsaida izy; ary nisy nitondra lehilahy jamba teo amin'i Jesosy ka nangataka
taminy hanendry ilay jamba.
23 Ary nitantana ilay
jamba Izy ka nitondra azy teny ivelan'ny tanàna; ary rehefa nororany ny masony,
ka napetrany taminy ny tànany, dia nanontaniany hoe izy: Mahita zavatra va
ianao?
24 Dia niandrandra
ralehilahy ka nanao hoe: Mahita ny olona aho: fa toa hazo ny fijeriko azy,
saingy mamindra.
25 Dia napetrany
tamin'ny masony indray ny tànany, dia nibanjina ralehilahy ka nahiratra tsara,
ary hitany miharihary ny zavatra rehetra.
26 Ary Jesosy
nampody azy ho any an-tranony ka nanao hoe: Aza mankao an-tanàna.
27 Ary Jesosy
sy ny mpianany dia lasa nankeny amin'ireny tanàna momba an'i Kaisaria-filipo;
ary nony teny an-dalana dia nanontany ny mpianany Izy ka nanao taminy hoe:
Ataon'ny olona ho iza moa Aho?
28 Ary izy
nanao taminy hoe: Jaona Mpanao-batisa; fa hoy ny sasany: Elia; ary hoy ny
sasany: Anankiray amin'ny mpaminany.
29 Ary Jesosy
nanontany azy hoe: Fa ianareo kosa manao Ahy ho iza? Dia namaly Petera ka nanao taminy hoe: Hianao
no Kristy.
30 Ary nandrara
azy rehetra Izy mba tsy hilazalaza Azy amin'olona.
31 Dia
nampianatra azy Izy fa ny Zanak'olona tsy maintsy hijaly mafy ka holavin'ny
loholona sy ny lohan'ny mpisorona ary ny mpanora-dalàna, dia hovonoiny, ary
rehefa afaka hateloana, dia hitsangana indray Izy.
32 Ary
naharihariny tsara no filaza izany teny izany. Ary Petera nanohina Azy hitanila
kely, dia niteny mafy Azy.
33 Fa Izy
nihodina, dia nijery ny mpianany ka niteny mafy an'i Petera hoe: Mankanesa ato
ivohoko, ry Satana, satria tsy misaina izay an'Andriamanitra ianao, fa izay
an'ny olona.
34 Ary
nantsoiny hanatona Azy ny vahoaka mbamin'ny mpianany, dia hoy Izy taminy: Raha
misy ta-hanaraka Ahy, dia aoka izy handà ny tenany sy hitondra ny hazo
fijaliany ka hanaraka Ahy.
35 Fa na iza na
iza no ta-hamonjy ny ainy, dia hahavery ary; ary na iza na iza no hahavery ny
ainy noho ny amiko sy ny filazantsara, dia hamonjy izany.
36 Fa inona no
soa azon'ny olona, raha mahazo izao tontolo izao aza, kanefa very ny ainy?
37 Fa inona no
homen'ny olona ho takalon'ny ainy?
38 Fa na iza na iza
no ho menatra Ahy sy ny teniko amin'ity taranaka sady mijangajanga no manota
ity, dia ho menatra azy kosa ny Zanak'olona, raha avy amin'ny voninahitry ny
Rainy mbamin'ny anjely masina.
Chapitre 9. 1 Ary hoy Izy taminy: Lazaiko aminareo marina tokoa: Misy ny sasany eto
izay tsy mba hanandrana fahafatesana mandra-pahitany ny fanjakan'Andriamanitra
tonga amin'ny hery.
2 Ary nony afaka
henemana, Jesosy dia naka an'i Petera sy Jakoba ary Jaona ka nitondra azy
nitokana niakatra ho any an-tendrombohitra avo anankiray; dia niova tarehy teo
anatrehany Izy,
3 ary ny fitafiany
niova nanelatrelatra sady fotsy indrindra, ka tsy misy mpamotsy lamba
ambonin'ny tany mahafotsy toy izany.
4 Ary Elia sy Mosesy
niseho taminy ka niresaka tamin'i Jesosy.
5 Ary niteny Petera
ka nanao tamin'i Jesosy hoe: Raby ô, tsara raha mitoetra eto isika; ary aoka
hanao lay telo izahay: ny anankiray ho Anao, ny anankiray ho an'i Mosesy, ary
ny anankiray ho an'i Elia.
6 Fa tsy fantany izay
havaliny, satria efa raiki-tahotra izy rehetra.
7 Ary nisy rahona
niseho nanarona azy; ary dia nisy feo avy tao amin'ny rahona nanao hoe: Ity no
Zanako malalako, Izy no henoy.
8 Ary niaraka
tamin'izay, nony nijery manodidina izy ireo, dia tsy nisy hitany intsony na iza
na iza afa-tsy Jesosy irery ihany, Izay teo aminy.
9 Ary nony nidina avy
teo an-tendrombohitra Izy, dia nandrara azy Jesosy mba tsy hilazalaza
amin'olona izay zavatra efa hitany mandra-pitsangan'ny Zanak'olona amin'ny
maty.
10 Ary nitana izany
teny izany izy ka nifampaka saina ny amin'izay hevitr'izany fitsanganana
amin'ny maty izany.
11 Dia nanontany an'i
Jesosy izy ka nanao hoe: Lazain*'ny mpanora-dalàna fa Elia tsy maintsy ho avy
aloha.[*Na: Nahoana no lazain']
12 Ary Izy nanao
taminy hoe: Elia dia avy aloha ihany ka mampody ny zavatra rehetra. Ary ahoana
kosa no nanoratana ny amin'ny Zanak'olona fa tsy maintsy mijaly mafy Izy ka
hatao tsinontsinona?
13 Nefa lazaiko
aminareo: Efa tonga Elia, sady nataon'ny olona taminy izay sitraky ny fony
araka ny nanoratana azy.
14 Ary nony tonga teo
amin'ny mpianatra izy, dia nahita vahoaka betsaka manodidina azy sy
mpanora-dalàna niady hevitra taminy.
15 Ary niaraka
tamin'izay, nony nahita Azy ny vahoaka rehetra, dia talanjona ka nihazakazaka
nanatona sy niarahaba Azy.
16 Ary Izy nanontany
azy hoe: Inona no iadianareo hevitra amin'ireto?
17 Ary ny anankiray
tamin'ny vahoaka namaly ka nanao hoe: Mpampianatra ô, nentiko ho etỳ
aminao ny zanako-lahy, izay azom-panahy moana;
18 ary na aiza na
aiza no ahazoany azy, dia ampihinjitrinjiriny izy, ary mandoa vory, dia
mikitro-nify sady valaka dia valaka; ary niteny tamin'ny mpianatrao aho mba
hamoaka izany; fa tsy hainy.
19 Ary Jesosy namaly
azy hoe: Ry taranaka tsy mino, mandra-pahoviana no hitoerako aminareo?
Mandra-pahoviana no handeferako aminareo? Ento etỳ amiko izy.
20 Dia nentiny teo
aminy izy; fa nony nahita an'i Jesosy izy, dia nampifanintontsintona ny tenany
niaraka tamin'izay ny fanahy. Dia lavo tamin'ny tany izy sady nitsinkasinkasina
sy nandoa vory.
21 Ary Jesosy
nanontany an-drainy hoe: Hoatrinona izay no nahatongavan'izao taminy? Ary hoy
izy: Hatry ny fony izy mbola zaza.
22 Ary nazerany
matetika tao anaty afo sy tao anaty rano izy hamonoany azy; fa raha mba misy
hainao, dia mamindrà fo aminay, ka vonjeo izahay.
23 Fa hoy Jesosy
taminy: Hainao hoe? Ny zavatra rehetra dia hain'ny mino.
24 Ary niaraka
tamin'izay dia niantso* ny rain-drazazalahy ka nanao hoe: Mino aho; vonjeo mba
ho afaka amin'ny tsi-finoako.[*Ampio hoe: sady nandrotsa-dranomaso].
25 Ary nony hitan'i
Jesosy fa nihazakazaka nanatona azy ny vahoaka, dia niteny mafy ny fanahy maloto
Izy ka nanao taminy hoe: Ry fanahy moana sy marenina! Izaho mandidy anao:
Mivoaha aminy, ka aza miditra ao anatiny intsony.
26 Ary rehefa
ninananana izy sady nampifanintontsintona mafy ilay zazalahy, dia nivoaka
taminy; ary efa toy ny maty, ka dia nataon'ny maro hoe: Maty.
27 Fa Jesosy nandray
ny tànany ka nanarina azy; dia nitsangana izy.
28 Ary rehefa tonga
tao an-trano Jesosy, dia nanontany Azy mangingina ny mpianany hoe: izahay* tsy
nahavoaka azy.[*Na:Nahoana izahay no]
29 Ary hoy Izy
taminy: Iny karazana iny tsy mba azo avoaka na amin'inona na amin'inona,
afa-tsy amin'ny fivavahana* ihany.[*Ampio hoe: sy ny fifadian-kanina].
30 Dia niala teo izy
ka nizotra namaky an'i Galilia, ary tsy tian'i Jesosy ho fantatry ny olona
izany.
31 Fa nampianatra ny mpianany
Izy ka nanao taminy hoe: Ny Zanak'olona dia hatolotra eo an-tànan'ny olona ka
hovonoiny; ary rehefa voavono Izy, dia hitsangana rehefa afaka hateloana.
32 Fa izy ireo tsy
nahafantatra izany teny izany sady natahotra hanontany Azy.
33 Ary tonga tao
Kapernaomy izy; ary rehefa mby tao an-trano Jesosy, dia nanontany ny mpianany
hoe: Inona no niadianareo hevitra teny an-dalana?
34 Fa tsy nahateny
izy, satria efa niady hevitra teny an-dalana izy ny amin'izay lehibe indrindra.
35 Ary rehefa
tafapetraka Jesosy, dia niantso ny roa ambin'ny folo lahy Izy ka nanao taminy
hoe: Raha misy te-ho voalohany, dia hatao farany amin'izy rehetra sy ho
mpanompo'izy rehetra izy.
36 Ary nandray zaza
Izy ka nametraka azy teo afovoany; ary raha notrotroiny ilay zaza, dia hoy Izy
tamin'ny mpianany:
37 Na zovy na zovy no
mandray zaza iray tahaka itony amin'ny anarako, dia mandray Ahy; ary na zovy na
zovy no mandray Ahy, dia tsy mandray Ahy, fa Izay naniraka Ahy.
38 Ary hoy Jaona
taminy: Mpampianatra ô, nahita olona anankiray namoaka demonia tamin'ny
anaranao izahay, ka noraranay izy, satria tsy nanaraka antsika.
39 Fa hoy Jesosy: Aza
mandrara azy; fa tsy misy olona izay hanao asa lehibe amin'ny anarako ka
hahateny ratsy Ahy vetivety.
40 Fa izay tsy
manohitra antsika dia momba antsika.
41 Fa na iza na iza
no manome anareo rano eran'ny kapoaka hosotroinareo, satria an'i Kristy
ianareo, dia lazaiko aminareo marina tokoa fa tsy ho very ny valim-pitiany.
42 Ary na iza na iza
no mahatafintohina na iray aza amin'ireo madinika mino Ahy ireo, dia tsara ho
azy, raha anantonana vato lehibe fikosoham-bary ny vozony, ka hatsipy ao anaty
ranomasina izy.
43 Ary raha ny
tananao no manafintohina anao, tapaho izy; fa tsara ho anao ny hiditra
kilemaina any amin'ny fiainana noho ny manana tanana roa, nefa hariana any
amin'ny helo*, dia any amin'ny afo tsy azo vonoina. [* Gr. Gehena]
44 * [* Ampio hoe:
any amin'ny kankana tsy maty, ary ny afo tsy vonoina]
45 Ary raha ny
tongotrao no manafintohina anao, tapaho izy; fa tsara ho anao ny hiditra
mandringa any amin'ny fiainana noho ny manana tongotra roa, nefa hariana any
amin'ny helo.
46 * [*Ampio hoe: any
amin'ny afo tsy azo vonoina; any ny kankany tsy maty, ary ny afo tsy vonoina]
47 Ary raha ny
masonao no manafintohina anao, esory hiala izy: fa tsara ho anao ny hiditra
toka-maso amin'ny fanjakan'Andriamanitra noho ny manana maso roa, nefa hariana
any amin'ny helo;
48 any ny
kankany tsy maty, ary ny afo tsy vonoina.
49 Fa samy ho
voasira amin'ny afo izy rehetra*.[*Ampio hoe: ary ny fanatitra rehetra samy ho
voasira amin'ny fanasina]
50 Tsara ny sira, fa
raha tonga matsatso izy, inona no ho entinareo mampody ny tsirony? Aoka hisy
sira ao anatinareo, ka mihavàna tsara ianareo.
1 Ary niainga niala
teo Jesosy, dia tonga tany amin'ny sisin-tanin'i Jodia sy tany an-dafin'i
Jordana; ary nisy vahoaka betsaka indray niangona teo aminy; koa araka ny
fanaony dia nampianatra azy indray Izy.
2 Ary nisy Fariseo
nanatona Ary, dia naka fanahy Azy ka nanontany hoe: Mahazo misao-bady va ny
lehilahy?
3 Ary Izy namaly ka
nanao taminy hoe: Ahoana no nandidian'i Mosesy anareo?
4 Ary hoy izy:
Navelan'i Mosesy hanoratra taratasy fisaoram-bady ny lehilahy ka hisao-bady
(Deo. 24.1).
5 Fa hoy Jesosy
taminy: Ny hamafin'ny fonareo no nanoratany izany didy izany ho anareo;
6 fa hatramin'ny fony
vao nanaovana izao tontolo izao dia lahy sy vavy no nanaovany ny olona (Gen.
1.27).
7 Ary noho izany ny
lehilahy dia handao ny rainy sy ny reniny ka hikambana amin'ny vadiny;
8 ary ho nofo iray
izy roroa (Gen. 2. 24); ka dia tsy ho roa intsony izy, fa ho nofo iray ihany.
9 Koa izay
nakamban'Andriamanitra dia aoka tsy hampisarahin'olona.
10 Ary nony mby tao
an-trano, dia nanontany ny amin'izany koa ny mpianatra.
11 Ary hoy izy
taminy: Na zovy na zovy no misao-bady ka mampakatra vehivavy hafa, dia
mijangajanga ka manala-baraka ny vadiny*.[*Na: mijangajanga mandika ny lalàn'ny
fanambadiana ny amin'ny vadiny]
12 Ary raha
ravehivavy kosa no misaotra ny lahy ka manambady olon-kafa, dia mijangajanga
izy.
13 Ary nisy nitondra
zazakely ho eo aminy mba hametrahany tanana; fa ny mpianany niteny mafy ireny.
14 Nefa tezitra
Jesosy, raha nahita izany, ka hoy Izy taminy: Avelao ny zaza hanatona Ahy, ary
aza raràna; fa an'ny toa azy ny fanjakan'Andriamanitra.
15 Lazaiko aminareo
marina tokoa: Na zovy na zovy no tsy handray ny fanjakan'Andriamanitra tahaka
ny zaza, dia tsy ho tafiditra aminy akory.
16 Ary nitrotro azy
Izy, dia nametra-tanana taminy ka nitso-drano azy.
17 Ary nony vao
nivoaka nankeny an-dalana Jesosy, dia nisy olona anankiray nihazakazaka nanatona
ka nandohalika teo anatrehany ary nanontany Azy hoe: Mpampianatra tsara ô,
inona no hataoko handovako fiainana mandrakizay?
18 Ary hoy
Jesosy taminy: Nahoana Aho no ataonao hoe tsara? Tsy misy tsara afa-tsy Iray
ihany, dia Andriamanitra.
19 Fantatrao ny
didy hoe: Aza mamono olona, Aza mijangajanga, Aza mangalatra, Aza mety ho
vavolombelona mandainga, Aza manambaka, Manajà ny rainao sy ny reninao (Eks.
20. 12-17).
20 Ary hoy izy
taminy Mpampianatra ô, izany rehetra izany efa notandremako hatry ny fony aho
mbola kely.
21 Ary Jesosy
nijery azy tsara, dia tia azy ka nanao taminy hoe: Diso zavatra iray loha
ianao; mandehana, amidio izay rehetra anananao ka omeo ny malahelo, dia hanana
rakitra any an-danitra ianao; ary avia hanaraka Ahy.
22 Dia
nanjombona terỳ ny tarehiny tamin'izany teny izany, ka niala
tamin'alahelo izy, satria nanana harena be.
23 Ary Jesosy
nijery manodidina ka nanao tamin'ny mpianany hoe: Manao ahoana ny hasarotry ny
hidiran'ny manan-karena amin'ny fanjakan'Andriamanitra!
24 Ary ny mpianatra
dia gaga tamin'ny teniny. Fa Jesosy namaly indray ka nanao taminy hoe: Anaka,
manao ahoana ny hasarotry ny hidiran'ny matoky ny harena amin'ny
fanjakan'Andriamanitra!
25 Moramora kokoa ny
hidiran'ny rameva amin'ny vodi-fanjaitra noho ny hidiran'ny manan-karena
amin'ny fanjakan'Andriamanitra.
26 Dia talanjona
indrindra izy ka nanao taminy* hoe: Iza indray no azo hovonjena?[* Na:
nifampilaza].
27 Fa Jesosy nijery
azy ka nanao hoe: Raha amin'ny olona, dia zavatra tsy hainy izany; fa tsy mba
tahaka izany amin'Andriamanitra; fa ny zavatra rehetra dia hain'Andriamanitra.
28 Ary hoy Petera
taminy: Indro, izahay efa nahafoy ny zavatra rehetra ka nanaraka Anao.
29 Hoy Jesosy:
Lazaiko aminareo marina tokoa: Tsy misy olona efa nahafoy trano, na rahalahy,
na anabavy, na reny, na ray, na zanaka, na tany, noho ny amiko sy ny
filazantsara,
30 ka tsy handray
zato heny amin'izao andro ankehitriny izao-dia trano sy rahalahy sy anabavy sy
reny sy zanaka sy tany mbamin'ny fanenjehana-ary amin'ny andro ho avy dia
fiainana mandrakizay.
31 Nefa maro izay
voalohany no ho farany, ary izay farany no ho voalohany.
32 Ary Jesosy sy ny
mpianany dia teny an-dalana niakatra ho any Jerosalema, ary Jesosy nandeha eo
alohany; dia gaga ny mpianany, ary izay nanaraka Azy dia natahotra. Ary naka ny
roa ambin'ny folo lahy indray Izy, dia nilaza taminy izay efa hanjo Azy
33 ka nanao hoe:
Indro, miakatra ho any Jerosalema isika; ary ny Zanak'olona hatolotra ho
amin'ireo lohan'ny mpisorona sy mpanora-dalàna; ary hohelohiny ho faty Izy ka
hatolony amin'ny jentilisa;
34 ary hanao Azy ho
fihomehezana ireny sy handrora Azy sy hikapoka Azy ary hahafaty Azy; fa rehefa
afaka hateloana, dia hitsangana indray Izy.
35 Ary Jakoba sy
Jaona, zanak'i Zebedio, nanatona an'i Jesosy ka nanao taminy hoe: Mpampianatra
ô, tianay mba hataonao aminay izay angatahinay aminao.
36 Ary hoy Izy
taminy: Inona moa no tianareo hataoko aminareo?
37 Dia hoy izy
mirahalahy taminy: Mba ekeo ny hipetrahanay, ny anankiray ho eo amin'ny
ankavananao, ary ny anankiray ho eo amin'ny an-kavianao, any amin'ny
voninahitrao.
38 Fa hoy Jesosy
taminy: Tsy fantatrareo izay angatahinareo; hainareo va ny hisotro amin'ny
kapoaka izay sotroiko, na ny hatao batisa amin'ny batisa izay anaovana Ahy
batisa?
39 Dia hoy izy
mirahalahy taminy: Hainay ihany. Ary hoy Jesosy taminy: Raha ny kapoaka izay
sotroiko, dia hosotroinareo ihany, ary ny batisa izay anaovana Ahy batisa dia
hanaovana anareo ihany;
40 fa ny
hipetraka eo an-tanako ankavanana na eo an-tanako ankavia kosa, dia tsy Ahy ny
hanome izany, fa izay nanamboarana izany no homena.
41 Ary nony
nandre izany izy folo lahy, dia tezitra noho ny nataon'i Jakoba sy Jaona izy.
42 Fa Jesosy
niantso azy hanatona Azy ka nanao taminy hoe: Fantatrareo fa izay eken'ny
jentilisa ho mpanapaka dia mampanompo azy, ary ny lehibeny dia mifehy azy.
43 Fa tsy mba toy
izany aminareo; fa na iza na iza no te-ho lehibe eo aminareo, dia ho mpanompo
anareo izy.
44 Ary na iza na iza
no te-ho ambony eo aminareo, dia ho mpanompon'izy rehetra.
45 Fa ny Zanak'olona
tsy tonga mba hotompoina, fa mba hanompo ka hanolotra ny ainy ho avotra hisolo
ny maro.
46 Ary tonga tao
Jeriko izy; ary raha vao niala tao Jeriko Jesosy mbamin'ny mpianany sy ny
vahoaka betsaka, dia nipetraka teo amoron-dalana Bartimeo jamba mpangataka,
zanak'i Timeo.
47 Ary nony
reny fa, injay! Jesosy avy any Nazareta, dia niantso izy ka nanao hoe: Ry
Jesosy, Zanak'i Davida ô, mamindrà fo amiko!
48 Ary maro no
niteny mafy azy mba hangina; fa vao mainka niantsoantso izy ka nanao hoe: Ry
Zanak'i Davida ô, mamindrà fo amiko.
49 Ary Jesosy
nijanona, dia nanao hoe: Antsoy ilay jamba. Ary ny olona niantso azy ka nanao
taminy hoe: Matokia, mitsangàna, miantso anao Izy.
50 Dia nanary
ny lambany izy ka niantsambotra nankeo amin'i Jesosy.
51 Ary Jesosy
namaly azy hoe: Inona no tianao hataoko aminao? Ary hoy ilay jamba taminy:
Rabôny ô, ny mba hampahiratina ny masoko.
52 Ary hoy
Jesosy taminy: Mandehana ianao, ny finoanao no efa namonjy anao. Dia nahiratra
niaraka tamin'izay ny masony, ka nanaraka an'i Jesosy teny an-dalana izy.
1 Ary raha
nanakaiky any Jerosalema tao Betifaga sy Betania any an-tendrombohitra Oliva
izy, dia naniraka roa lahy tamin'ny mpianany Jesosy
2 ka nanao
taminy hoe: Mankanesa amin'iroa vohitra tandrifinareo iroa; ary raha vao
miditra eo ianareo, miaraka amin'izay dia hahita zana-boriky mifatotra, izay
tsy mbola nitaingenan'olona; vahao izy, ka ento etỳ.
3 Ary raha misy
olona manao aminareo hoe: Ahoana no anaovanareo izao? dia lazao hoe: Misy
raharaha analan'ny Tompo azy; dia havelany ho entina etỳ indray miaraka
amin'izay izy.
4 Dia nandeha izy ka
nahita zana-boriky nifatotra teo ala-trano anilan'ny varavarana teo an-dalana,
dia novahany izy.
5 Ary ny olona sasany
teo nanao taminy hoe: Ahoana no amahanareo ny zana-boriky?
6 Ary izy nilaza
taminy araka izay nolazain'i Jesosy taminy, dia navelan'ny olona handeha izy.
7 Ary nentiny teo
amin'i Jesosy ny zana-boriky, dia nataony teo amboniny ny lambany; ary Jesosy
nitaingina azy.
8 Ary maro no
namelatra ny lambany teny an-dalana; ary ny sasany kosa nampihahaka
rantsan-kazo izay efa nalainy tany an-tsaha.
9 Ary izay
nandeha teo alohany sy izay nanaraka teo aoriany dia samy niantso hoe: Hosana!
Isaorana anie Izay avy amin'ny anaran'i Jehovah!
10 Hotahina
anie ny fanjakana izay avy, dia ny an'i Davida raintsika! Hosana any amin'ny
avo indrindra (Sal. 118. 26).
11 Ary Jesosy
niditra tany Jerosalema ka nankeo an-kianjan'ny tempoly; ary rehefa nijerijery
ny zavatra rehetra Izy, sady efa hariva ny andro tamin'izay, dia niala Izy
mbamin'ny roa ambin'ny folo lahy ka nankany Betania.
12 Ary nony
ampitson'iny, rehefa niala tany Betania izy, dia noana Jesosy.
13 Ary
nahatsinjo aviavy anankiray mandravina erỳ lavidavitra Izy, dia nankeo,
fa toa hahita voany eo aminy; kanjo nony tonga teo aminy Izy, dia tsy nahita na
inona na inona, afa-tsy ravina ihany; fa tsy mbola tonga ny taom-pamoazan'ny
aviavy.
14 Ary Jesosy
namaly ka nanao taminy hoe: Aza misy mihinana voa avy aminao intsony
mandrakizay. Ary ny mpianany nahare izany.
15 Ary tonga
tany Jerosalema izy: ary Jesosy niditra teo an-kianjan'ny tempoly, dia
nandroaka izay nivarotra sy izay nividy teo an-kianjan'ny tempoly sady nanjera
ny latabatry ny mpanakalo vola sy ny fipetrahan'ny mpivarotra ny voromailala;
16 ary tsy
navelany hisy olona hitondra fanaka handeha hamaky ny kianjan'ny tempoly.
17 Dia
nampianatra Izy ka nanao taminy hoe: Tsy voasoratra hoe va: Ny tranoko hatao
hoe trano fivavahana ho an'ny firenena rehetra? (Isa. 56. 7); fa ianareo kosa efa nanao azy ho
zohy fieren'ny jiolahy (Jery. 7. 11).
18 Ary nahare izany
ny lohan'ny mpisorona mbamin'ny mpanora-dalàna, ka dia nitady izay hamonoany
Azy; saingy natahotra Azy izy, satria talanjona ny vahoaka rehetra noho ny
fampianarany.
19 Ary isan-kariva
dia niala tao an-tanàna Izy.
20 Ary nony maraina,
raha nandalo izy, dia hitany fa efa nalazo hatramin'ny fakany ilay aviavy.
21 Ary Petera
nahatsiahy ka nanao taminy hoe: Raby ô, indro fa efa malazo ilay aviavy
nozoninao.
22 Ary Jesosy namaly
ka nanao taminy hoe: Manàna finoana an'Andriamanitra.
23 Lazaiko aminareo
marina tokoa: Na zovy na zovy no hilaza amin'ity tendrombohitra ity hoe:
Mifindrà, ka mianjerà any an-dranomasina, ka tsy hiahanahana ao am-pony, fa
hino fa ho tonga ny zavatra lazainy, dia ho azony izany.
24 Koa lazaiko
aminareo: Na inona na inona tononinareo amin'ny fivavahana sy angatahinareo,
dia minoa fa efa nandray ianareo, dia ho azonareo izany.
25 Ary raha
mitsangana mivavaka ianareo, ka misy olona anananareo alahelo, dia mamelà ny
helony, mba havelan'ny Rainareo Izay any an-danitra kosa ny helokareo.
26 * [*Ampio hoe: 26
Fa raha ianareo tsy mamela heloka, ny Rainareo Izay any an-danitra kosa tsy
hamela ny helokareo]
27 Ary tonga tany
Jerosalema indray izy; ary raha nitsangantsangana teo an-kianjan'ny tempoly
Jesosy, dia nanatona Azy ny lohan'ny mpisorona sy ny mpanora-dalàna ary ny
loholona
28 ka nanao taminy
hoe: Fahefana manao ahoana no anaovanao izao zavatra izao? Ary iza no nanome
Anao izany fahefana izany hanaovanao izao zavatra izao?
29 Ary Jesosy nanao
taminy hoe: Hanontany anareo zavatra iray loha kosa Aho, ka valio Aho; ary dia
holazaiko aminareo izay fahefana anaovako izao zavatra izao:
30 Ny batisan'i Jaona
avy tany an-danitra va, sa avy tamin'ny olona? Valio Aho.
31 Ary izy ireo
niara-nisaina ka nanao hoe: Raha holazaintsika hoe mantsy: Avy tany an-danitra,
dia hataony hoe: Nahoana ary no tsy nino azy ianareo?
32 Fa raha
holazaintsika hoe kosa: Avy tamin'ny olona, natahotra ny olona izy, satria
neken'ny olona rehetra fa mpaminany tokoa Jaona.
33 Dia namaly
an'i Jesosy izy ka nanao hoe: Tsy fantatray. Ary Jesosy nanao taminy hoe: Izaho
kosa tsy hilaza aminareo izay fahefana anaovako izao zavatra izao.
1 Ary niteny
taminy Izy ka nanao fanoharana hoe: Nisy lehilahy anankiray nanao
tanim-boaloboka ka namefy azy manodidina sy nihady famiazana ary nanao
tilikambo, ka nahofany tamin'olona mpiasa tany izany, dia lasa nankany an-tany
hafa izy.
2 Ary nony
tonga ny fotoana, dia naniraka mpanompo anankiray izy hankany amin'ny mpiasa
tany handray amin'ny vokatry ny tanim-boaloboka.
3 Fa ireo nisambotra
ilay mpanompo sady nikapoka azy ka nampiala azy maina.
4 Ary izy naniraka
mpanompo anankiray koa ho any aminy indray, fa io koa, dia noratrainy ny
lohany, ka nalany baraka izy.
5 Ary naniraka
anankiray koa izy, fa io kosa indray dia novonoiny ho faty; ary maro koa no
nirahiny, fa ny sasany nokapohiny, ary ny sasany novonoiny ho faty.
6 Ary mbola nanana
anankiray izy, dia ny zananilahy malalany, ka nony farany dia naniraka azy
hankany aminy izy ka nanao hoe: Hanaja ny zanako izy.
7 Fa izany mpiasa
tany izany niresaka hoe: Ity no mpandova; andeha hovonointsika izy, dia ho
antsika ny lova.
8 Ary rehefa
nisambotra azy izy, dia nahafaty azy sy namoaka azy teo ivelan'ny
tanim-boaloboka.
9 Koa ahoana no
hataon'ny tompon'ny tanim-boaloboka amin'izany? Ho avy izy, dia handringana ny
mpiasa tany, ka homeny olon-kafa ny tanim-boaloboka.
10 Ary tsy mbola
novakinareo va izao Soratra Masina izao: Ny vato izay nolavin'ny mpanao trano,
Dia izy no efa natao fehizoro;
11 Avy tamin'i
Jehovah izao Ka mahagaga eo imasontsika? (Sal. 118. 22, 23.)
12 Ary nitady
hisambotra Azy izy ireo, nefa natahotra ny vahoaka izy, satria fantany fa ny
tenany no nolazainy tamin'izany fanoharana izany; dia nandao an'i Jesosy ny
olona ka lasa.
13 Ary nirahiny
hankeo amin'i Jesosy ny sasany avy tamin'ny Fariseo sy ny Herodiana hamandrika
Azy amin'ny teniny.
14 Ary rehefa tonga
izy ireo, dia nanao taminy hoe: Mpampianatra ô, fantatray fa marina Hianao, ka
tsy mampaninona Anao ny hevitry ny olona, fa tsy mba mizaha tavan'olona Hianao,
fa mampianatra marina ny lalan'Andriamanitra. Mety va ny mandoa vola hetra ho
an'i Kaisara, sa tsia?
15 Handoa va izahay, sa tsy
handoa? Fa Izy nahalala ny fihatsaram-belatsihiny, ka dia nanao taminy hoe:
Nahoana no maka fanahy Ahy ianareo? Itondray denaria etỳ amiko hizahako
azy.
16 Dia nitondrany Izy. Ary
hoy Izy taminy: An'iza io sary sy soratra io? Ary hoy izy taminy: An'i Kaisara.
17 Dia hoy Jesosy taminy:
Aloavy ho an'i Kaisara izay an'i Kaisara, ary ho an'Andriamanitra izay
an'Andriamanitra. Dia gaga taminy ireny.
18 Ary ny Sadoseo, izay
milaza fa tsy misy fitsanganan'ny maty, dia nisy sasany tonga teo aminy ka
nanontany Azy hoe:
19 Mpampianatra ô, Mosesy
nanoratra ho antsika hoe: Raha misy manan-drahalahy maty momba, ka mbola velona
ny vadin'ny maty, dia aoka ny rahalahiny hampakatra azy hiteraka hamelo-maso ny
rahalahiny (Deo. 25. 5).
20 Nisy fito mirahalahy;
ary ny zokiny nampaka-bady, dia maty momba.
21 Ary ny
faharoa nampakatra an-dravehivavy, dia maty momba koa; ary ny fahatelo dia toy
izany ihany koa.
22 Ary izy fito
mirahalahy dia samy maty momba avokoa. Koa faran'izy rehetra dia maty koa ravehivavy.
23 Koa amin'ny
fitsanganan'ny maty, ho vadin'iza moa ravehivavy, satria efa samy nanambady azy
avokoa izy fito mirahalahy?
24 Ary hoy Jesosy
taminy: Tsy izao tsi-fahafantaranareo ny Soratra Masina sy ny
herin'Andriamanitra izao va no mahadiso hevitra anareo?
25 Fa amin'ny
hitsanganana amin'ny maty dia tsy hisy hampaka-bady na havoaka hampakarina; fa
tahaka ny anjely any an-danitra izy.
26 Ka ny amin'ny
hananganana ny maty, tsy mbola novakinareo va ny eo amin'ny bokin'i Mosesy, eo
amin'ilay teny milaza ny Voaroy, dia ny nanaovan'Andriamanitra taminy hoe:
Izaho no Andriamanitr'i Abrahama sy Andriamanitr'isaka ary Andriamanitr'i
Jakoba? (Eks. 3. 6.)
27 Tsy Andriamanitry
ny maty Izy, fa an'ny velona; koa diso indrindra ianareo.
28 Dia nanatona an'i
Jesosy ny mpanora-dalàna anankiray, izay efa nahare ny niadiany hevitra
tamin'ny Sadoseo ka nahalala fa namaly azy tsara Izy, dia nanontany Azy hoe: Ny
didy manao ahoana no voalohany amin'izy rehetra?
29 Ary Jesosy namaly
hoe: Ny voalohany dia izao: Mihainoa, ry Isiraely: Jehovah Andriamanitsika dia
Jehovah iray ihany;
30 koa tiava an'i
Jehovah Andriamanitrao amin'ny fonao rehetra sy ny fanahinao rehetra sy ny
sainao rehetra ary ny herinao rehetra (Deo. 6. 4, 5).
31 Ary ny faharoa dia
izao: Tiava ny namanao tahaka ny tenanao (Lev. 19. 18). Tsy misy didy hafa
lehibe noho ireo.
32 Ary hoy ilay
mpanora-dalàna taminy: Marina izany, Tompoko; tsara ny nilazanao fa iray ihany
Andriamanitra, ary tsy misy afa-tsy Izy.
33 Ary ny ho tia Azy
amin'ny fo rehetra sy ny saina rehetra sy ny hery rehetra, ary ny ho tia ny
namana tahaka ny tena, dia mihoatra lavitra noho ny fanatitra hodorana sy ny
fanatitra hafa rehetra izany.
34 Ary raha hitan'i
Jesosy fa namaly tamim-pahendrena izy, dia hoy Izy taminy: Tsy lavitra ny
fanjakan'Andriamanitra ianao. Ary tsy nisy sahy nanontany Azy intsony.
35 Ary Jesosy, raha
nampianatra teo an-kianjan'ny tempoly, dia namaly ka nanao hoe: Ahoana no
lazain'ny mpanora-dalàna fa Kristy no Zanak'i Davida?
36 Kanefa ny tenan'i
Davida dia nampilazain'ny Fanahy Masina hoe: Jehovah nilaza tamin'ny Tompoko
hoe: Mipetraha eo an-tanako ankavanana Ambara-panaoko ny fahavalonao ho
fitoeran-tongotrao (Sal. 110. 1).
37 Ny tenan'i Davida
manao Azy hoe Tompo, koa ahoana no maha-Zanany Azy? Ary ny vahoaka betsaka
nihaino Azy tamin'ny hafaliana.
38 Ary hoy Izy
amin'ny fampianarany: Mitandrema ny amin'ny mpanora-dalàna izay mazoto
mandehandeha miakanjo akanjo lava sy te-hoharabain'olona eny an-tsena,
39 ary tia ny
fipetrahana aloha ao amin'ny synagoga sy ny fitoerana aloha ao amin'ny
fanasana,
40 ary mandany ny
tranon'ny mpitondratena ka manao vavaka lavareny mba ho fiolahana; ireo no
hahazo fahamelohana mafimafy kokoa.
41 Ary raha nipetraka
tandrifin'ny fandatsahan-drakitra Jesosy, dia nijery ny fandatsaky ny vahoaka
tao; ary maro ny mpanankarena nandatsaka be tao.
42 Fa nisy
mpitondratena malahelo anankiray kosa tonga teo, ka nandatsaka farantsakely*
roa an-kevitry ny variroaventy avy.[*Gr. lepta roa, dia farantsakely varahina
izany = kodranta iray = tokony ho variroaventy]
43 Ary Jesosy niantso
ny mpianany hanatona Azy ka nanao taminy hoe: Lazaiko aminareo marina tokoa fa
io mpitondratena malahelo io no efa nandatsaka be noho izay rehetra nandatsaka
tao amin'ny fandatsahan-drakitra.
44 Fa ireo rehetra
ireo, dia tamin'ny haben'ny fananany ho nandatsahany tao; fa izy kosa, tamin'ny
alahelony no nandatsahany tao izay rehetra nananany, dia ny fivelomany rehetra.
1 Ary nony niala teo
an-kianjan'ny tempoly Jesosy, dia hoy ny mpianany anankiray taminy:
Mpampianatra ô, akory re ireto vato sy rafitra ireto!
2 Ary Jesosy nanao
taminy hoe: Hitanao va ireto rafitra lehibe ireto? Tsy havela hisy vato
hifanongoa eto ka tsy horavana.
3 Ary raha nipetraka
teo amin'ny tendrombohitra Oliva tandrifin'ny tempoly Izy, dia nanontany Azy
mangingina Petera sy Jakoba sy Jaona ary Andrea hoe:
4 Lazao aminay:
Rahoviana no hisy izany? ary inona no ho famantarana, rehefa ho tonga izany
rehetra izany?
5 Ary Jesosy nilaza
taminy hoe: Mitandrema, fandrao hisy hamitaka anareo.
6 Fa maro no ho avy
amin'ny anarako hanao hoe: Izaho no Izy, ka maro no ho voafitany.
7 Ary raha mandre ady
sy filazana ady ianareo, dia aza matahotra; tsy maintsy hisy izany, nefa tsy
mbola tonga ny farany.
8 Fa hisy firenena
hitsangana hamely firenena, ary hisy fanjakana hitsangana hamely fanjakana; ary
hisy horohorontany any amin'ny tany samy hafa, sady hisy mosary; izany no
fiandohan'ny fahoriana*.[*Gr. faharariam-piterahana]
9 Fa mitandrema
ianareo, fa hatolotra amin'ny Synedriona sy hokapohina ao amin'ny synagoga ary
hitsangana eo anatrehan'ny mpanapaka sy ny mpanjaka noho ny amiko ianareo ho
vavolombelona aminy.
10 Ary ny firenena
rehetra tsy maintsy hitoriana ny filazantsara aloha.
11 Koa raha mitondra
anareo hatolotra izy, dia aza manahy rahateo izay holazainareo; fa izay teny
homena anareo'amin'izany ora izany no holazainareo; fa tsy ianareo no hiteny,
fa ny Fanahy Masina.
12 Ary ny rahalahy
hanolotra ny rahalahiny ho amin'ny fahafatesana, ary ny ray hanolotra ny
zanany; ary ny zanaka hitsangana hanohitra ny rainy aman-dreniny ka hahafaty
azy.
13 Ary ho halan'ny
olona rehetra ianareo noho ny anarako: fa izay maharitra hatramin'ny farany no
hovonjena.
14 Fa raha hitanareo
mitsangana amin'izay tsy mety hitsanganany ny fahavetavetan'ny fandravana (Dan.
12. 11; 9. 27) (aoka hisaina izay mamaky izany), dia aoka handositra ho any
an-tendrombohitra izay olona any Jodia.
15 Ary izay ao
an-tampon-trano aoka tsy hidina na hiditra haka zavatra ao an-tranony.
16 Ary izay any
an-tsaha aoka tsy hiverina haka ny lambany.
17 Ary lozan'ny
bevohoka sy ny mitaiza kely amin'izany andro izany!
18 Fa mivavaha
ianareo mba tsy ho amin'ny ririnina izany.
19 Fa amin'izany
andro izany dia hisy fahoriana izay tsy mbola nisy toy izany hatrizay
nanaovan'Andriamanitra izao tontolo izao ka mandraka izao ankehitriny izao,
sady tsy hisy intsony.
20 Ary raha tsy
nohafohezin'ny Tompo izany andro izany, dia tsy nisy nofo hovonjena; fa noho ny
olom-boafidy, izay nofidiny, dia nohafoheziny izany andro izany.
21 Ary amin'izay raha
tàhiny misy olona manao aminareo hoe: Indro, etỳ Kristy, na: Indro,
erỳ ; aza mino ianareo.
22 Fa hisy Kristy
sandoka sy mpaminany sandoka hitsangana*, ka haneho famantarana sy fahagagana
hamitahany na dia ny olom-boafidy aza, raha azo atao izany.[*Na: hatsangana]
23 Fa mitandrema kosa
ianareo; indro, efa voalazako taminareo raha-teo ny zavatra rehetra.
24 Fa amin'izany
andro izany, raha afaka izany fahoriana izany, ny masoandro hohamaizinina, ary
ny volana tsy haneho fahazavana,
25 ary ny kintana
hiraraka avy eny amin'ny lanitra, ary hohozongozonina ny hery izay ao amin'ny
lanitra.
26 Ary amin'izay ny
Zanak'olona dia ho hita avy eo amin'ny rahona amin'ny hery lehibe sy ny
voninahitra.
27 Ary amin'izay dia
haniraka ny anjely Izy, ary hanangona ny olom-boafidiny avy amin'ny vazan-tany
efatra* hatramin'ny faran'ny tany ka hatramin'ny faran'ny lanitra.[*Gr.
rivotra]
28 Ary mianara ny
fanoharana ny amin'ny aviavy: Raha vao manaroka ny rantsany ka mandravina, dia
fantatrareo fa efa akaiky ny lohataona.
29 Dia tahaka izany
koa ianareo, raha vao hitanareo fa tonga izany zavatra izany, dia aoka ho
fantatrareo fa efa akaiky eo am-baravarana Izy*.[*Na: izany]
30 Lazaiko aminareo
marina tokoa fa tsy mba ho lany* ity taranaka ity** mandra-pahatongan'izany
rehetra izany. [* Gr. handalo] [** Na: ity firenena ity]
31 Ny lanitra sy ny
tany ho levona, fa ny teniko tsy mba ho levona.
32 Fa ny amin'izany
andro na ora izany dia tsy misy mahalala, na dia ny anjely any an-danitra, ary
na dia ny Zanaka aza, afa-tsy ny Ray ihany.
33 Mitandrema,
miambena*, ka mivavaha; fa tsy fantatrareo izay hihavian'ny fotoana.[*Gr.
miareta tory]
34 Izany dia tahaka
ny olona nandeha hivahiny, izay nandao ny tranony ka nanome fahefana ny
mpanompony, ka samy notolorany ny raharahany avy, ary ny mpiandry varavarana
dia nasainy niambina tsara;
35 Koa miambena
ianareo, fa tsy fantatrareo izay andro hihavian'ny tompon-trano, na ho hariva,
na ho mamatonalina, na ho maneno akoho, na ho maraina,
36 fandrao avy
tampoka izy ka mahita anareo matory.
37 Ary izay lazaiko
aminareo dia lazaiko amin'ny olona rehetra
1 Rehefa indroa andro
no sisa tsy hahatongavan'ny Paska, fihinanana ny mofo tsy misy masirasira, dia
nitady hisambotra an'i Jesosy tamin'ny fitaka ny lohan'ny mpisorona sy ny
mpanora-dalàna mba hamonoany Azy.
2 Nefa hoy izy: Tsy
amin'ny andro firavoravoana, fandrao hampitabataba ny vahoaka.
3 Ary nony tany
Betania Jesosy tao an-tranon'i Simona boka ka nipetraka nihinana, dia avy ny
vehivavy anankiray nitondra tavoara alabastara feno menaka manitra nisy narda
saro-bidy indrindra; dia novakiny ny tavoara, ka naidiny tamin'ny lohan'i
Jesosy ny menaka.
4 Ary nisy ny sasany
tezitra ka nifampilaza hoe: Inona no anton'izao fandaniam-poana ny menaka
manitra izao?
5 Fa azo namidy ho
lafo tsy omby denaria telon-jato iny menaka manitra iny ka homena ny malahelo.
Dia tezitra indrindra tamin-dravehivavy ireo.
6 Fa hoy Jesosy
taminy: Avelao izy; nahoana ianareo no mampalahelo azy? Asa soa no nataony
tamiko.
7 Fa ny malahelo dia
eto aminareo mandrakariva, ary na oviana na oviana no tianareo hanaovana soa
aminy, dia mahazo manao ianareo; fa Izaho kosa tsy mba ho eto aminareo
mandrakariva.
8 Efa nanao izay
azony natao izy: namonjy nanosotra ny tenako hanamboarany Ahy halevina izy.
9 Ary lazaiko
aminareo marina tokoa: Na aiza na aiza amin'izao tontolo izao no hitoriana ny
filazantsara, dia holazaina koa izao nataon-dravehivavy izao mba ho
fahatsiarovana azy.
10 Ary Jodasy
Iskariota, ilay isan'ny roa ambin'ny folo lahy, dia nankeo amin'ny lohan'ny
mpisorona hamadika an'i Jesosy aminy.
11 Ary rehefa nandre
izany izy ireo, dia faly ka nanaiky hanome vola azy. Ary Jodasy dia nitady izay
andro hahazoany mamadika Azy.
12 Ary tamin'ny
voalohan'ny andro fihinanana ny mofo tsy misy masirasira, izay famonoana ny
Paska, dia hoy ny mpianany taminy: Aiza no tianao halehanay hanamboaranay mba
hihinananao ny Paska?
13 Dia naniraka roa
lahy tamin'ny mpianany Izy ka nanao taminy hoe: Mankanesa any an-tanàna, ary
hisy lehilahy mitondra siny feno rano hifanena aminareo; dia manaraha azy.
14 Ary lazao amin'ny
tompon'ny trano izay hidirany hoe: Izao no lazain'ny Mpampianatra: Aiza ny
efi-trano hiarahako mihinana ny Paska amin'ny mpianatro?
15 Ary izy hanoro
anareo efi-trano malalaka ambony rihana izay voaisy fipetrahana sady voavoatra
tsara; any no amboary ho antsika.
16 Ary ny mpianatra
nandeha, dia tonga tany an-tanàna ka nahita araka izay nolazainy taminy; dia
namboatra ny Paska izy.
17 Ary nony hariva ny
andro, dia tonga Izy sy ny roa ambin'ny folo lahy.
18 Ary raha nipetraka
nihinana izy, dia hoy Jesosy: Lazaiko aminareo marina tokoa fa ny anankiray
aminareo, dia izay iray miara-mihinana amiko, no hamadika Ahy.
19 Dia nalahelo izy,
ka samy nanontany Azy tsirairay hoe: Izaho va izany?
20 Ary Izy nanao
taminy hoe: Izay anankiray amin'ny roa ambin'ny folo lahy miara-manatsoboka
amiko ao anatin'ny lovia no izy.
21 Fa ny Zanak'olona
dia mandeha tokoa, araka ny nanoratana Azy, nefa lozan'izay olona hahazoana ny
Zanak'olona hatolotra! Tsara ho an'izany olona izany raha tsy ary akory.
22 Ary raha mbola
nihinana izy, Jesosy nandray mofo; ka nony efa nisaotra, dia novakiny ka
natolony azy ary nataony hoe: Raiso, ity no tenako.
23 Dia nandray
kapoaka Izy, ka nony efa nisaotra, dia natolony azy; ka dia nisotroan'izy
rehetra izany.
24 Ary hoy Izy
taminy: Ity no rako amin'ny fanekena*, izay alatsaka hamonjy ny maro.[*Na:
fanekena vaovao]
25 Lazaiko aminareo
marina tokoa: Tsy mba hisotro ny vokatry ny voaloboka intsony Aho
mandre-pihavin'ny andro hisotroako izay vaovao any amin'ny
fanjakan'Andriamanitra.
26 Ary rehefa nihira
fiderana izy, dia lasa nankany an-tendrombohitra Oliva.
27 Ary hoy Jesosy
taminy: Ho tafintohina avokoa ianareo rehetra; fa voasoratra hoe: Hamely ny
mpiandry Aho, dia hihahaka ny ondry (Zak. 13. 7).
28 Fa rehefa
mitsangana Aho, dia hialoha anareo ho any Galilia.
29 Fa hoy Petera
taminy: Na dia ho tafintohina avokoa aza ny olona rehetra, izaho tsy mba ho
tafintohina.
30 Ary hoy Jesosy
taminy: Lazaiko aminao marina tokoa: Anio, dia amin'ity alina ity, raha tsy
mbola misy akoho maneno fanindroany, dia handà Ahy intelo ianao.
31 Fa vao mainka
niteny mafy dia mafy izy hoe: Na dia hiara-maty aminao aza aho, tsy mba handà
Anao tokoa aho. Ary toy izany koa no nolazain'izy rehetra.
32 Ary tonga tany
amin'ny saha izay atao hoe Getsemane izy; dia hoy Jesosy tamin'ny mpianany:
Mipetraha eto ianareo mandra-pivavako.
33 Ary nitondra an'i
Petera sy Jakoba sy Jaona Izy, dia talanjona sady ory indrindra.
34 Ary hoy Izy
taminy: Fadiranovana loatra ny fanahiko toy ny efa ho faty; mitoera eto, ka
miareta tory.
35 Ary nony nandroso
kelikely Izy, dia niankohoka tamin'ny tany ka nivavaka mba hialan'izany ora
izany aminy, raha azo atao.
36 Ary hoy Izy: Aba,
Raiko ô, ny zavatra rehetra hainao; esory amiko ity kapoaka ity; nefa aoka tsy
ny sitrapoko anie no hatao, fa ny Anao.
37 Ary avy Izy ka
nahita azy ireo matory, dia hoy Izy tamin'i Petera: Ry Simona, matory va ianao?
Tsy nahazaka niari-tory na dia ora iray ihany aza va ianao?
38 Miareta tory
ianareo, ka mivavaha, mba tsy hidiranareo amin'ny fakam-panahy; mety ihany ny
fanahy, fa ny nofo no tsy manan-kery.
39 Dia lasa indray
Izy ka nivavaka nanao ilay teny teo ihany.
40 Ary nony niverina
indray Izy, dia nahita azy matory, fa efa nilondolondo ny masony, ka tsy hitany
izay havaliny Azy.
41 Ary avy
fanintelony Izy, dia nanao taminy hoe: Matoria ary ankehitriny, ka mialà
sasatra ianareo. Aoka izay; efa tonga ny ora; indro, ny Zanak'olona hatolotra
ao an-tànan'ny mpanota.
42 Mitsangàna, andeha
isika; indro fa efa akaiky ilay mamadika Ahy.
43 Ary niaraka
tamin'izay, raha mbola niteny Izy, dia avy Jodasy, isan'ny roa ambin'ny folo
lahy, sady nisy vahoaka niaraka taminy, nitondra sabatra sy langilangy,
nirahin'ny lohan'ny mpisorona sy ny mpanora-dalàna ary ny loholona.
44 Ary ilay hamadika
Azy efa nanome famantarana ireo ka nanao hoe: Izay horohako no Izy; sambory Izy
ka ento, fa aza avela ho afaka.
45 Ary rehefa tonga
izy, dia nanatona an'i Jesosy niaraka tamin'izay ka nanao hoe: Raby ô! dia
nanoroka Azy izy.
46 Ary ny olona
naninjitra ny tànany taminy ka nisambotra Azy.
47 Ary ny anankiray
tamin'izay teo anilany nanatsoaka ny sabany, dia nikapa ny mpanompon'ny
mpisoronabe ka nahafaka ny sofiny.
48 Ary Jesosy namaly
ka nanao taminy hoe: Mivoaka mitondra sabatra sy langilangy hisambotra Ahy toy
ny hisambotra jiolahy va ianareo?
49 Teo aminareo
isan'andro Aho an-kianjan'ny tempoly, nefa tsy nisambotra Ahy ianareo; fa mba
hahatanteraka ny Soratra Masina izao.
50 Ary samy nandao
Azy izy rehetra ka nandositra.
51 Ary nisy zatovo
anankiray nanaraka Azy, ka lamba hariry madinika fotsiny ihany no nitafiany, ary
nosamborin'ny olona teo izy.
52 Dia navelany teny
aminy ny lambany hariry madinika, ka nandositra nitanjaka izy.
53 Ary nitondra an'i
Jesosy ho any amin'ny mpisoronabe izy; ary niangona teo aminy ny lohan'ny
mpisorona rehetra sy ny loholona ary ny mpanora-dalàna.
54 Ary Petera efa
nanaraka Azy teny lavidavitra eny hatrany amin'ny kianjan'ny tranon'ny
mpisoronabe; ary niara-nipetraka teo amin'ny mpiandry raharaha izy namindro teo
anilan'ny afo.
55 Ary ny lohan'ny
mpisorona sy ny Synedriona rehetra nitady vavolombelona hiampanga an'i Jesosy
hamonoany Azy, nefa tsy nahita.
56 Fa maro no
niampanga lainga Azy, nefa tsy nifanaraka ny fiampangany.
57 Ary nitsangana ny
sasany, dia niampanga lainga Azy nanao hoe:
58 Izahay efa nandre
Azy nanao hoe: Izaho handrava ity tempoly nataon-tanana ity, ary amin'ny
hateloana dia hanangana hafa izay tsy nataon-tanana Aho.
59 Fa tsy nifanaraka
ny filàzany na dia tamin'izany aza.
60 Ary ny mpisoronabe
nitsangana nankeo afovoany, dia nanontany an'i Jesosy ka nanao hoe: Tsy mety mamaly
akory va Hianao? Inona no iampangan'ireto Anao?
61 Fa tsy niteny
Jesosy sady tsy namaly akory. Dia nanontany Azy indray ny mpisoronabe ka nanao
taminy hoe: Hianao va no Kristy, Zanaky ny Isaorana?
62 Ary hoy Jesosy:
Izaho no Izy; ary ho hitanareo ny Zanak'olona mipetraka eo ankavanan'ny Hery
sady avy eo amin'ny rahon'ny lanitra.
63 Ary ny mpisoronabe
nandriatra ny fitafiany ka nanao hoe: Ahoana no mbola ilantsika vavolombelona
indray?
64 Efa renareo ny
fitenenany ratsy*; ahoana no hevitrareo? Dia nataon'izy rehetra fa miendrika ho
faty Izy.[*Gr. blasfemia, izahao Mat. 9.3]
65 Ary ny sasany
nandrora Azy, dia nanarona ny tavany sady namely tahamaina Azy ka nanao hoe:
Maminania; ary ny mpiandry raharaha namely tahamaina* Azy koa.[*Na. tehina]
66 Ary raha nitoetra
teo ambany teo an-kianja Petera, dia avy ny anankiray tamin'ny ankizivavin'ny
mpisoronabe;
67 ary nony nahita
an'i Petera namindro izy, dia nijery azy ka nanao hoe: Hianao koa nomba an'i
Jesosy avy any Nazareta.
68 Fa izy nandà ka
nanao hoe: Tsy fantatro sy tsy azoko ny teninao. Dia niala ho eo am-bavahady izy, ary nisy akoho
naneno.
69 Ary ilay
ankizivavy nahita azy indray, dia niteny tamin'izay teo anilany hoe: Io
lehilahy io mba naman'ireny;
70 fa izy nandà
indray. Ary nony afaka kelikely, izay teo anilany koa dia nilaza tamin'i Petera
hoe: Naman'ireo tokoa ianao; fa Galiliana ianao.
71 Dia niozona
sy nianiana izy ka nanao hoe: Tsy fantatro izany Lehilahy lazainareo izany.
72 Ary niaraka
tamin'izay dia nisy akoho naneno fanindroany. Ary Petera nahatsiaro ny teny
izay nolazain'i Jesosy taminy hoe: Raha tsy mbola misy akoho maneno
fanindroany, dia handà Ahy intelo ianao. Ary nony nieritreritra izany izy, dia
nitomany.
1 Ary niaraka
tamin'izay raha vao maraina ny andro, ny lohan'ny mpisorona sy ny loholona sy
ny mpanora-dalàna mbamin*'ny Synedriona rehetra dia niara-nisaina ary namatotra
an'i Jesosy ka nitondra Azy, dia nanolotra Azy teo amin'i Pilato.[*Na: dia]
2 Ary Pilato
nanontany Azy hoe: Hianao va no Mpanjakan'ny Jiosy? Ary Izy namaly ka nanao
taminy hoe: Voalazanao.
3 Ary ny lohan'ny
mpisorona niampanga Azy zavatra maro.
4 Ary Pilato
dia nanontany Azy indray hoe: Tsy mety mamaly akory va Hianao? He! izao
hamaroan'ny zavatra iampangany Anao izao!
5 Fa Jesosy tsy
namaly intsony, na dia indraim-bava akory aza, ka dia gaga Pilato.
6 Ary isaky ny
avy ny andro firavoravoana dia fanaony ny mandefa mpifatotra iray izay
angatahin'ny vahoaka.
7 Ary nisy
anankiray ilay atao hoe Barabasy, nifatotra tao mbamin'ny mpikomy sasany, izay
efa nahafaty olona tamin'ny fikomiana.
8 Ary ny
vahoaka niakatra ka nangataka azy hanao araka izay fanaony aminy.
9 Fa Pilato namaly
azy ka nanao hoe: Tianareo va mba ny Mpanjakan'ny Jiosy no halefako ho anareo?
10 Fa fantany fa
fialonana no nanoloran'ny lohan'ny mpisorona Azy.
11 Fa ny lohan'ny
mpisorona nanome fo ny vahoaka, fa aleo Barabasy no halefan'i Pilato ho azy.
12 Ary Pilato namaly
ka nanao taminy indray hoe: Ka inona ary no hataoko amin'ilay ataonareo hoe:
Mpanjakan'ny Jiosy?
13 Ary ny vahoaka
niantso indray hoe: Homboy amin'ny hazo fijaliana Izy!
14 Ary hoy Pilato
taminy: Fa inona moa no ratsy nataony? Nefa vao mainka niantsoantso izy ka
nanao hoe: Homboy amin'ny hazo fijaliana Izy!
15 Ary Pilato
ta-hahazo sitraka tamin'ny vahoaka, ka dia nandefa an'i Barabasy ho azy; fa
Jesosy nasainy nokapohina*, dia natolony azy mba hohomboana amin'ny hazo
fijaliana.[*Izahao Mat. 27.36]
16 Ary ny miaramila
nitondra an'i Jesosy ho eo an-kianja, dia ao anati-rova*, sady nanangona ny
miaramila namany rehetra.
17 Ary dia nampitafy
Azy lamba volomparasy izy, sady nandrandrana satroka tsilo, ka nasatrony ny
lohany.
18 Ary dia niarahaba
Azy hoe izy: Arahaba, ry Mpanjakan'ny Jiosy!
19 Ary dia nikapoka
ny lohany tamin'ny volotara izy sady nandrora Azy, dia nandohalika sy
niankohoka teo anatrehany.
20 Ary rehefa nanao
Azy ho fihomehezana izy, dia nanala ilay lamba volomparasy teny aminy, ka
nampitafiny Azy indray ny fitafiany; ary dia nentiny hohomboany amin'ny hazo
fijaliana Izy.
21 Ary Simona
Kyreniana (rain'i Aleksandro sy Rofosy) izay nandalo avy tany an-tsaha, no
notereny hitondra ny hazo fijalian'i Jesosy.
22 Ary Jesosy dia
nentiny teo amin'ny tany Golgota, izany hoe, raha adika, Fitoeran-karan-doha.
23 Dia notolorany
divay miharo miora Izy; nefa tsy nety nisotro Izy.
24 Ary rehefa
voahombony tamin'ny hazo fijaliana Izy, dia nanaovany loka no fizara ny
fitafiany, hahitany izay ho azony avy.
25 Ary tamin'ny ora
fahatelo no nanomboany tamin'ny hazo fijaliana.
26 Ary ny soratra
milaza ny nanamelohana Azy dia voasoratra teo amboniny hoe: MPANJAKAN'NY JIOSY.
27 Ary nisy jiolahy
roa nohomboany tamin'ny hazo fijaliana koa, ny anankiray teo amin'ny
ankavanany, ary ny anankiray teo amin'ny ankaviany.
28 *[*Ampio hoe: 28
Dia tanteraka ny Soratra Masina izay manao hoe: Ary natao ho isan'ny mpanota
Izy (Isa. 53. 12)]
29 Ary izay nandalo
niteny ratsy Azy sady nihifikifi-doha ka nanao hoe: Hià! ry Ilay maharava ny
tempoly sy mahatsangana azy amin'ny hateloana,
30 vonjeo ny tenanao,
ka mid́na hiala amin'ny hazo fijaliana.
31 Ary toy izany koa
no faneson'ny lohan'ny mpisorona, fa niresaka izy sy ny mpanora-dalàna nanao
hoe: Namonjy ny sasany Izy, fa ny tenany tsy hainy vonjena.
32 Aoka Kristy,
Mpanjakan'ny Isiraely, hidina hiala amin'ny hazo fijaliana ankehitriny mba ho
hitantsika ka hinoantsika. Ary ireo niaraka nohomboana taminy tamin'ny hazo
fijaliana dia naneso Azy koa.
33 Ary nony tamin'ny
ora fahenina, dia tonga maizina ny tany rehetra, ka naharitra hatramin'ny ora
fahasivy izany.
34 Ary tamin'ny ora
fahasivy Jesosy dia niantso tamin'ny feo mahery ka nanao hoe: Eloy, Eloy, lamà
sabaktany! izay hoe, raha adika: Andriamanitro ô, Andriamanitro ô, nahoana no
mahafoy Ahy Hianao? (Sal. 22. 2).
35 Ary ny sasany izay
nijanona teo, raha nandre izany, dia nanao hoe: Indro, miantso an'i Elia Izy.
36 Ary ny anankiray
nihazakazaka, dia nanatsoboka sipaonjy tamin'ny vinaingitra, ka notohiziny
tamin'ny volotara, dia natohony hotsentsefin'i Jesosy, fa hoy izy: Aoka ho
hizahantsika, na ho avy hampidina Azy Elia, na tsia.
37 Ary Jesosy
niantso tamin'ny feo mahery, dia afaka ny ainy.
38 Ary ny
efitra lamba tao amin'ny tempoly dia triatra nizara roa hatrany ambony ka
hatrany ambany.
39 Ary ny
kapiteny izay nijanona tandrifiny, raha nahita fa afaka toy izany ny ainy*, dia
nanao hoe: Marina tokoa fa Zanak'Andriamanitra io Lehilahy io.[*Na: nahita Azy
niantso toy izany, sady afaka ny ainy]
40 Ary nisy
vehivavy koa nitsinjo teny lavidavitra eny, ary isan'ireny Maria Magdalena sy
Salome ary Maria, renin'i Jakoba kely sy Josesy,
41 izay
nanaraka Azy ka nanompo Azy, fony Izy tany Galilia, mbamin'ny vehivavy maro koa
izay niaraka taminy niakatra tany Jerosalema.
42 Ary nony hariva
(satria andro fiomanana ny andro, dia ny andro alohan'ny Sabata),
43 dia avy Josefa avy
any Arimatia, lehilahy manan-kaja, izay isan'ny Synedriona sady niandry ny
fanjakan'Andriamanitra koa; ary sahy niditra tao amin'i Pilato izy ka nangataka
ny fatin'i Jesosy.
44 Ary gaga Pilato
raha maty sahady Jesosy, ka dia niantso ny kapiteny hankao aminy izy ka
nanontaniany azy na efa maty ela Izy, na tsia.
45 Ary rehefa nahare
tamin'ny kapiteny izy, dia nomeny an'i Josefa ny faty.
46 Ary izy nividy
hariry madinika, dia nampidininy ny fatin'i Jesosy ka nofonosiny hariry
madinika, ary naleviny tao amin'ny fasana, izay nolavahana tamin'ny vatolampy,
dia nanakodia vato ho eo amin'ny varavaran'ny fasana izy.
47 Ary Maria
Magdalena sy Maria, renin'i Josesy, dia nijery izay nametrahany Azy.
1 Ary rehefa
afaka ny andro Sabata, dia lasa nividy zava-manitra Maria Magdalena sy Salome
ary Maria, renin'i Jakoba, mba handeha hanosotra ny fatin'i Jesosy.
2 Ary nony
maraina koa tamin'ny voalohan'andro amin'ny herinandro, rehefa niposaka ny
masoandro, dia nankany amin'ny fasana izy ireo.
3 Ary niresaka hoe
izy: Iza re no hanakodia ny vato ho afaka amin'ny varavaram-pasana hisolo
antsika?
4 Fa nony nitraka
izy, dia, indro, hitany fa efa voakodia niala ny vato; fa lehibe dia lehibe ny
vato.
5 Ary raha niditra
tao anatin'ny fasana izy, dia nahita zatovo anankiray nipetraka teo amin'ny
ankavanana niakanjo akanjo fotsy, dia talanjona izy.
6 Fa hoy ilay zatovo
taminy: Aza talanjona; mitady an'i Jesosy avy any Nazareta, Izay nohomboana
tamin'ny hazo fijaliana, ianareo; efa nitsangana Izy; tsy ato Izy; jereo fa teo
no nametrahany Azy.
7 Fa mandehana, lazao
amin'ny mpianany sy Petera fa mialoha anareo ho any Galilia Izy; any no
hahitanareo Azy, araka izay nolazainy taminareo.
8 Dia nivoaka izy ka
lasa nandositra niala tamin'ny fasana, fa tora-kovitra sady talanjona izy; ary
tsy mba nilaza na inona na inona tamin'olona izy, satria natahotra.
9 [Ary rehefa
nitsangana tamin'ny marain'ny andro voalohany amin'ny herinandro Jesosy, dia
niseho voalohany tamin'i Maria Magdalena, ilay namoahany demonia fito, Izy]
10 [Ary Maria nandeha
ka nilaza tamin'ireo efa nomba an'i Jesosy, izay mbola nisaona sy nitomany]
11 [Ary izy ireo, na
dia nandre aza fa velona Izy sady efa hitan-dravehivavy, dia mbola tsy nety
nino ihany]
12 [Ary taorian'izany
Jesosy dia niseho tamin'ny endrika hafa tamin'ny roa lahy aminy, izay nankany
an-tsaha]
13 [Ary izy ireo
nandeha ka nilaza tamin'ny namany; fa na dia ireo aza tsy ninoany koa]
14 [Rehefa afaka
izany, dia niseho tamin'ny iraika ambin'ny folo lahy Jesosy, raha nipetraka
nihinana ireo; ary izy nanome tsiny azy noho ny tsi-finoany sy ny hamafin'ny
fony, satria tsy ninoany ireo efa nahita Azy, rehefa nitsangana Izy]
15 [Ary hoy Izy
taminy: Mandehana any amin'izao tontolo izao ianareo, ka mitoria ny
filazantsara amin'ny olombelona rehetra]
16 [Izay mino sy atao
batisa no hovonjena; fa izay tsy mety mino no hohelohina]
17 [Ary izao
famantarana izao no hanaraka izay mino: hamoaka demonia amin'ny anarako izy;
hiteny amin'ny fiteny izay tsy mbola hainy izy;]
18 [handray menarana
izy; ary na dia misotro zava-mahafaty aza izy, dia tsy hampaninona azy izany;
hametra-tanana amin'ny marary izy, dia ho sitrana ireny]
19 [Ary Jesosy Tompo,
rehefa niteny taminy, dia nampiakarina ho any an-danitra ka nipetraka eo
an-kavanan'Andriamanitra]
20 [Fa izy ireo kosa
dia lasa ka nitori-teny eny tontolo eny, ary ny Tompo niara-niasa taminy ka
nanamarina ny teny tamin'ny famantarana izay nomba azy. Amena]
Accès direct
aux chapitres de Luc : 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24
1 Satria maro no efa
nanoratra nandahatra tantara ny amin'ny zavatra izay efa tanteraka* tamintsika
tokoa[*Na: inoana tokoa amintsika]
2 araka izay efa
noraisintsika natolotry ny vavolombelona izay sady nahita maso no efa mpitory*
ny teny hatramin'ny voalohany:[*Gr. mpanompo]
3 dia sitrako koa,
rehefa nofotorako tsara ny zavatra rehetra hatramin'ny niandohany, ny hanoratra
izany aminao araka ny filaharany, ry Teofilo tsara indrindra*,[*Gr. mahery
indrindra; teny fanajana ny lehibe izany]
4 mba hahafantaranao
tsara fa mafy orina ny teny izay nampianarina anao.
5 Tamin'ny andron'i
Heroda, mpanjakan'i Jodia, nisy mpisorona anankiray atao hoe Zakaria, isan'ny
antokon'i Abia; ary ny vadiny dia avy tamin'ny taranak'i Arona, Elizabeta no
anarany.
6 Ary samy marina teo
anatrehan'Andriamanitra izy mivady sady nitondra tena tsy nanan-tsiny araka ny
didy sy ny fitsipika rehetra nomen'ny Tompo.
7 Ary tsy
nanan-janaka izy, fa momba Elizabeta; ary samy efa antitra izy mivady.
8 Ary nony nanao
raharaham-pisoronana teo anatrehan'Andriamanitra Zakaria araka ny
fifandimbiasan'ny antokony,
9 araka ny fanao
amin'ny fisoronana, dia anjarany araka ny filokana ny hiditra ao amin'ny
tempolin'ny Tompo ka handoro ditin-kazo manitra.
10 Ary ny vahoaka
rehetra nitoetra teo ivelany nivavaka tamin'ny ora fandoroana ny ditin-kazo
manitra.
11 Ary nisy
anjelin'ny Tompo niseho taminy teo an-kavanan'ny alitara fandoroana ny
ditin-kazo manitra.
12 Ary nony nahita
azy Zakaria, dia taitra loatra izy ka raiki-tahotra.
13 Fa hoy ilay anjely
taminy: Aza matahotra, ry Zakaria; fa efa nohenoina ny fangatahanao, ka
Elizabeta vadinao dia hiteraka zazalahy aminao, ary Jaona no hataonao anarany.
14 Ary ho faly sy ho ravoravo
ianao; ary maro no hifaly amin'ny hahaterahany.
15 Fa ho lehibe eo
anatrehan'ny Tompo izy ary tsy hisotro divay na toaka sady hofenoina ny Fanahy
Masina hatrany an-kibon-dreniny aza.
16 Ary maro amin'ny
Zanak'isiraely no hampodiny amin'i Jehovah Andriamaniny.
17 Ary izy handeha eo
alohany amin'ny fanahy sy ny herin'i Elia mba hampody ny fon'ny ray ho amin'ny
zanaka, ary ny tsy manoa ho amin'ny fahendren'ny marina, hamboatra firenena
voaomana ho an'ny Tempo (Mal. 3. 23, 24).
18 Ary hoy Zakaria
tamin'ilay anjely: Inona no hahafantarako izany? fa izaho efa antitra, ary efa
antitra koa ny vadiko.
19 Ary ilay anjely
namaly ka nanao taminy hoe: Izaho no Gabriela, izay mitsangana eo
anatrehan'Andriamanitra; ary nirahina hiteny aminao aho ka hilaza aminao izany
teny mahafaly izany.
20 Koa, indro, ho
moana ianao ka tsy hahay miteny ambara-pahatongan'ny andro hisehoan'izany
zavatra izany, ho valin'ny tsy ninoanao ny teniko, izay ho tanteraka amin'ny
fotoany.
21 Ary ny olona dia
niandry an'i Zakaria ka gaga noho izy naharitra ela tao amin'ny tempoly.
22 Kanjo rehefa
nivoaka izy, dia tsy nahay niteny taminy; ary dia fantatry ny olona fa efa
nahita fahitana tao amin'ny tempoly izy; ary izy nanao baikon'ny moana taminy,
ary dia mbola moana ihany.
23 Ary rehefa tapitra
ny andro nanaovany fanompoam-pivavahana, dia lasa nody tany an-tranony izy.
24 Ary taorian'izany
andro izany dia nitoe-jaza Elizabeta vadiny, dia niery dimy volana izy ka nanao
hoe:
25 Izao no nataon'ny
Tompo tamiko tamin'ny andro izay nitsinjovany hahafa-tondromaso ahy amin'ny
olona.
26 Ary tamin'ny
fahenim-bolana dia nirahin'Andriamanitra ny anjely Gabriela ho any an-tanàna
anankiray any Galilia atao hoe Nazareta,
27 ho any amin'ny
virijina anankiray, izay voafofo ho vadin'ny lehilahy atao hoe Josefa, avy
tamin'ny taranak'i Davida; ary ny anaran'ny virijina dia Maria.
28 Ary nony niditra
tao aminy ilay anjely, dia nanao hoe: Arahaba, ry ilay nohasoavina, ny Tompo
momba anao*.[*Ampio hoe: voatahy samy vehivavy ianao]
29 Ary taitra loatra
izy noho ny teniny ka nieritreritra izay tokony ho hevitr'izany fiarahabana
izany.
30 Ary hoy ilay
anjely taminy: Aza matahotra, ry Maria, fa efa nahita fitia tamin'Andriamanitra
ianao.
31 Ary, indro,
hitoe-jaza ianao ka hiteraka zazalahy, ary ny anarany dia hataonao hoe Jesosy.
32 Izy ho lehibe ka
hatao hoe Zanaky ny Avo Indrindra; ary Jehovah Andriamanitra hanome Azy ny seza
fiandrianan'i Davida rainy;
33 ary hanjaka
amin'ny taranak'i Jakoba mandrakizay Izy; ary ny fanjakany tsy
hanam-pahataperana.
34 Ary hoy Maria tamin'ilay
anjely: Hanao ahoana re no hahatanteraka izany, fa tsy mahalala lahy aho?
35 Ary ilay anjely
namaly ka nanao taminy hoe: Ny Fanahy Masina ho tonga ao aminao, ary hisy
herin'ny Avo Indrindra hanaloka anao; koa ny Masina Izay hateraka* dia hatao
hoe Zanak'Andriamanitra.[*Na: haterakao]
36 Ary, indro,
Elizabeta havanao dia efa mitoe-jaza koa, na dia efa antitra aza; ary efa
mandray enina izy izao, izay natao hoe momba.
37 Fa tsy hisy tsy ho
tanteraka ny teny rehetra ataon'Andriamanitra.
38 Dia hoy Maria:
Inty ny ankizivavin'ny Tompo; aoka anie ho tonga amiko araka ny teninao. Dia
nandao azy ilay anjely.
39 Ary Maria niainga
tamin'izany andro izany ka nandeha faingana ho any amin'ny tany havoana, ho ao
an-tanàna anankiray any Joda;
40 ary niditra tao
an-tranon'i Zakaria izy ka niarahaba an'i Elizabeta.
41 Ary rehefa ren'i
Elizabeta ny fiarahaban'i Maria, dia nibitaka* ny zaza tao an-kibony; ary
nofenoina ny Fanahy Masina Elizabeta,[*Na: niantsambotra]
42 dia niantso
tamin'ny feo mahery hoe izy: Voatahy samy vehivavy ianao, ary voatahy ny
hateraky ny kibonao.
43 Avy aiza no
ahatongavan'izao amiko, no mba vangian'ny renin'ny Tompoko aho?
44 Fa, indro, raha
vao ren'ny sofiko ny feon'ny fiarahabanao, dia nibitaka noho ny hafaliana ny
zaza ao an-kiboko.
45 Ary sambatra ianao
izay nino; fa hefaina izay zavatra nampilazain'ny Tompo taminao.
46 Ary hoy
Maria: Ny foko mankalaza ny Tompo,
47 Ary ny
fanahiko efa ravoravo tamin'Andriamanitra, Mpamonjy ahy;
48 Fa efa
nijery ny fahambani-toetry ny ankizivaviny Izy. Fa, indro, hatramin'ny ankehitriny dia hataon'ny
taranaka rehetra ho sambatra aho.
49 Fa ny Mahery efa
nanao zavatra lehibe tamiko; Ary masina ny anarany.
50 Ary ny
famindram-pony dia amin'izay matahotra Azy hatramin'ny taranaka fara mandimby.
51 Nanao asa lehibe
tamin'ny sandriny Izy; Nampihahaka ny mpiavonavona tamin'ny fiheveran'ny fony
Izy.
52 Nampiala ny lehibe
tamin'ny seza fiandrianany Izy, Ary nanandratra ny ambany kosa.
53 Ny noana
novokisany soa; Fa ny manan-karena kosa nampialainy maina.
54 Niahy an'isiraely
mpanompony Izy, fa nahatsiaro ny famindram-pony
55 (Araka ny
voalazany tamin'ny razantsika), tamin'i Abrahama sy ny taranany mandrakizay.
56 Ary Maria nitoetra
teo amin'i Elizabeta tokony ho telo volana vao nody tany an-tranony.
57 Ary tonga ny andro
hahaveloman'i Elizabeta, dia niteraka zazalahy izy.
58 Ary ny
niara-monina taminy sy ny havany nandre fa efa nohalehibiazin'ny Tompo ny
famindram-pony taminy; dia niara-nifaly taminy ireo.
59 Ary tamin'ny andro
fahavalo dia tonga hamora ny zaza izy, ka efa saiky hataony hoe Zakaria araka
ny anaran-drainy ny anarany.
60 Fa ny reniny
namaly ka nanao hoe: Tsy izany, fa hatao hoe Jaona izy.
61 Fa hoy izy ireo
taminy: Tsy misy na dia iray akory aza amin'ny havanao izay manana izany
anarana izany.
62 Ary nanao
baikon'ny moana tamin'ny rainy iry ireo, izay tokony ho tiany hatao anarany.
63 Ary nangataka
fàfana izy ka nanoratra hoe: Jaona no anarany. Dia gaga avokoa izy rehetra.
64 Ary dia nisokatra
niaraka tamin'izay ny vavany, ka afaka niteny ny lelany; dia niteny izy ka
nidera an'Andriamanitra.
65 Dia raiki-tahotra
izay rehetra niara-monina taminy; ary niely teny amin'ny tany havoan'i Jodia
rehetra ny lazan'izany rehetra izany.
66 Ary izay rehetra
nandre dia nandatsaka izany tam-pony ka nanao hoe: Ho zaza hanao ahoana re io?
Fa ny tanan'ny Tompo nomba azy.
67 Ary dia feno ny
Fanahy Masina Zakaria rainy ka naminany hoe:
68 Isaorana anie ny
Tompo Andriamanitry ny Isiraely; Fa nitsinjo ny olony Izy ka nanao fanavotana
ho azy,
69 Ary nanangana
tandro-pamonjena ho antsika Amin'ny taranak'i Davida mpanompony Izy
70 (Araka izay
nampilazainy ny mpaminaniny masina hatramin'ny fahagola),
71 Dia famonjena
antsika amin'ny fahavalontsika, sy amin'ny tànan'izay rehetra mankahala
antsika;
72 Manefa
famindram-po amin'ny razantsika Izy Sady mahatsiaro ny fanekeny masina,
73 Dia ny fianianana
izay nianianany tamin'i Abrahama razantsika,
74 Hanao izay
hahazoantsika hanompo Azy tsy amin-tahotra, Satria afaka amin'ny fahavalontsika
isika,
75 Amin'ny
fahamasinana sy ny fahamarinana eo anatrehany amin'ny andro rehetra
hiainantsika.
76 Ary ianao, ry
zaza, dia hatao hoe mpaminanin'ny Avo Indrindra; Fa hialoha eo anatrehan'ny
Tompo ianao hamboatra ny lalany.
77 Hanome ny olony ny
fahalalam-pamonjena amin'ny famelana ny helony,
78 Noho ny halehiben'ny
famindram-pon'Andriamanitsika, izay hiposahan*'ny mazava avy any amin'ny avo ho
antsika.[*Na: niposahan']
79 Hamirapiratra
amin'izay mipetraka ao amin'ny maizina sy ao amin'ny aloky ny fahafatesana,
Hanitsy ny diantsika ho amin'ny lalam-piadanana.
80 Ary ny zazakely
nitombo ka nihahery tam-panahy; ary nitoetra tany an-efitra izy
ambara-pahatongan'ny andro nisehoany tamin'ny Isiraely.
1 Ary tamin'izany
andro izany dia nisy didy navoak'i Aogosto Kaisara hampanoratra ny anaran'ny
vahoaka rehetra amin'ny fanjakany.
2 (Izany no
fanoratana voalohany* natao fony Kyrenio nanapaka tany Syria.)[*Na: Ny tena
fanoratana voalohany anefa dia]
3 Dia samy
nankany amin'ny tanànany avy izy rehetra mba hosoratana.
4 Ary Josefa
koa niakatra avy tany Galilia, dia avy tao an-tanàna Nazareta, hankany Jodia,
ho ao an-tanànan'i Davida, iza atao hoe Betlehema (satria avy tamin'ny
taranak'i Davida sy ny mpianakaviny),
5 mba
hosoratana izy sy Maria fofom-badiny, izay efa bevohoka.
6 Ary raha
nitoetra teo Izy, dia tonga ny andro hahavelomany.
7 Ary niteraka
ny Lahimatoany izy, dia nohodidininy lamban-jaza ka nampandriny teo amin'ny
fihinanam-bilona; fa tsy nisy nitoerany tao an-tranom-bahiny.
8 Ary nisy
mpiandry ondry tamin'izany tany izany nitoetra tany an-tsaha nitandrina ny
ondriny tamin'ny alina.
9 Ary nisy
anjelin'ny Tompo nitsangana teo anilany, ary ny voninahitry ny Tompo
nanelatrelatra manodidina azy, ka raiki-tahotra indrindra izy.
10 Ary hoy ny
anjely taminy: Aza matahotra; fa, indro, milaza teny soa mahafaly aminareo aho,
dia fifaliana lehibe izay ho an'ny olona rehetra;
11 fa Mpamonjy no
teraka ho anareo anie ao an-tanànan'i Davida, dia Kristy Tompo.
12 Ary izao no ho
famantarana ho anareo: ianareo hahita Zazakely voahodidina lamban-jaza sady
mandry ao am-pihinanam-bilona;
13 Ary nisy anjely
maro be avy any an-danitra niseho tampoka niaraka tamin'ilay anjely teo ka
nidera an'Andriamanitra nanao hoe:
14 Voninahitra any
amin'ny avo Indrindra ho an'Andriamanitra! Ary fiadanana ho etỳ
ambonin'ny tany amin'ny olona ankasitrahany*. [*Na: Fankasitrahana ho amin'ny
olona]
15 Ary tamin'izany
rehefa niala teo aminy ireo anjely ireo ka nankany an- danitra, dia niresaka
ireo lehilahy mpiandry ondry ka nanao hoe: Andeha isika hankany Betlehema ka
hizaha izany zavatra vao tonga izany, izay nampahafantarin'ny Tompo antsika.
16 Dia nandeha
faingana izy ka nahita an'i Maria sy Josefa, ary ny Zazakely nandry teo
am-pihinanam-bilona.
17 Ary nony efa
nahita izy, dia nampiely izay teny nolazaina taminy ny amin'izany Zaza izany.
18 Ary izay rehetra
nandre dia gaga tamin'izay zavatra nolazain'ny mpiandry ondry taminy.
19 Fa Maria kosa
nitadidy izany teny rehetra izany ka nieritreritra azy tao am-pony.
20 Ary ny mpiandry
ondry niverina nankalaza ny nidera an'Andriamanitra noho ny zavatra rehetra
izay reny ny hitany, araka izay nolazaina taminy.
21 Ary rehefa tapitra
ny havaloana, ka hoforana ny Zaza, dia nataony hoe Jesosy ny anarany, araka
ilay nataon'ny anjely, fony tsy mbola torontoronina tao an-kibo Izy.
22 Ary rehefa tapitra
ny andro fidiovany, araka ny lalàn'i Mosesy, dia nitondra Azy niakatra tany
Jerosalema izy mba hatolotra ho an'ny Tompo
23 araka ny
voasoratra ao amin'ny lalàn'ny Tompo hoe: Ny lahy voalohan-teraka rehetra hatao
hoe masina ho an'i Jehovah. (Eks. 13. 2)
24 ary mba hanatitra
fanatitra araka izay voalaza ao amin'ny lalàn'ny Tompo hoe: domohina roa, na
zana-boromailala roa (Lev. 12. 8).
25 Ary, indro, nisy
lehilahy atao hoe Simeona tao Jerosalema; ary marina sady mpivavaka tsara izany
lehilahy izany ka niandry ny fampiononana ny Isiraely; ary ny Fanahy Masina dia
tao aminy.
26 Ary efa
nambaran'ny Fanahy Masina taminy fa tsy hahita fahafatesana izy mandra-pahitany
ny Kristin'ny Tompo.
27 Ary nentin'ny
Fanahy Masina niditra teo an-kianjan'ny tempoly izy; ary rehefa nampidirin'ny
ray aman-dreniny Jesosy zaza mba hanaovany araka ny fomban'ny lalàna ny amin'ny
zaza,
28 dia nitrotro Azy
izy ka nidera an'Andriamanitra nanao hoe:
29 Tompo ô,
ankehitriny ny mpanomponao dia alefanao amin'ny fiadanana Araka ny teninao;
30 Fa ny masoko efa
nahita ny famonjenao,
31 Izay namboarinao
teo anatrehan'ny firenena rehetra,
32 Dia fahazavana
hahazava ny firenena sady voninahitry ny Isiraely olonao.
33 Dia gaga ny
ray aman-dreniny noho ny teny nilazana Azy.
34 Ary Simeona
nitso-drano azy ireo ka nanao tamin'i Maria, renin'ny Zaza, hoe: Indro, Ity
Zaza ity no voatendry ho fandavoana sy ho fananganana ny maro ao amin'ny
Isiraely ary ho famantarana holavina
35 ary ny
fanahinao aza dia hotsatohana sabatra - mba haseho ny hevitry ny fo maro.
36 Ary nisy
mpaminanivavy anankiray, dia Ana, zanakavavin'i Fanoela, avy tamin'ny firenen'i
Asera; efa anti-panahy tokoa izy ary efa nitoetra tamin'ny vadiny fito taona
taorian'ny naha-virijina azy,
37 ary efa mpitondratena
tokony ho efatra amby valo-polo taona; ary tsy niala teo an-kianjan'ny tempoly
izy, fa nanompo tamin'ny fifadian-kanina sy ny fivavahana andro aman'alina.
38 Ary nony
niditra tamin'izany ora izany izy, dia nisaotra an'Andriamanitra ka nilaza Azy
tamin'izay rehetra niandry ny fanavotana tao Jerosalema.
39 Ary rehefa
vitany ny zavatra rehetra araka ny lalàn'ny Tompo, dia niverina tany Galilia
izy, dia tao Nazareta tanànany.
40 Ary ny Zaza
dia nitombo ka nihahery sady feno fahendrena; ary ny fahasoavan'Andriamanitra
no tao aminy.
41 Ary ny ray
aman-dreniny nankany Jerosalema isan-taona, raha avy ny andro firavoravoana
amin'ny Paska.
42 Ary rehefa
roa ambin'ny folo taona Jesosy, dia niakatra izy ireo, araka ny fanao amin'ny
andro firavoravoana.
43 Ary rehefa
tapitra izany andro izany, ka nody izy, Jesosy zaza dia mbola nitoetra tany
Jerosalema ihany, nefa tsy fantatry ny ray aman-dreniny izany;
44 ary satria
nataony fa niaraka tamin'ny niara-dia taminy Izy, dia nandeha lalana indray
andro izy vao nitady Azy tamin'ny havany sy ny olom-pantany.
45 Ary nony tsy
nahita Azy izy, dia niverina ho any Jerosalema nitady Azy.
46 Ary rehefa
afaka hateloana, dia hitany teo an-kianjan'ny tempoly Izy nipetraka teo
afovoan'ny mpampianatra ka nihaino sady nanontany azy.
47 Ary
talanjona izay rehetra nandre Azy noho ny fahalalany sy ny famaliany.
48 Ary raha
nahita Azy izy, dia talanjona, ka hoy ny reniny taminy: Anaka, nahoana no nanao
toy izay taminay Hianao? He! izato alahelon-drainao sy izaho nitady Anao!
49 Fa hoy Izy
taminy: Nahoana no nitady Ahy ianareo? tsy fantatrareo va fa tsy maintsy ho eto
an-tranon*'ny Raiko Aho?[*Na: eto amin'ny raharahan']
50 Nefa tsy
azon'ireo ny teny izay nolazainy taminy.
51 Ary
niara-nidina taminy nankany Nazareta Izy ka nanoa azy. Ary ny reniny nitahiry
izany teny rehetra izany tao am-pony.
52 Ary Jesosy
nitombo saina sy tena* sady nandroso fitia tamin'Andriamanitra sy ny
olona.[*Na: taona]
1 Ary tamin'ny
taona fahadimy ambin'ny folo nanjakan'i Tiberia Kaisara, fony Pontio Pilato no
governora tany Jodia, ary Heroda no mpanapaka tany Galilia, ary Filipo
rahalahiny no mpanapaka ny tany Itoria sy Trakonitisy, ary Lysania no mpanapaka
tany Abilena,
2 ary Anasy sy
Kaiafa no mpisoronabe,- dia tonga tamin'i Jaona, zanak'i Zakaria, tany
an-efitra ny tenin'Andriamanitra.
3 Ary nankany
amin'ny tany rehetra any amoron'i Jordana izy nitory ny batisan'ny fibebahana
ho famelan-keloka;
4 araka ny
voasoratra ao amin'ny bokin'ny tenin'Isaia mpaminany hoe: Injany! misy feon'ny
miantso mafy any an-efitra hoe: Amboary ny lalan'i Jehovah, Ataovy mahitsy ny
lalan-kalehany.
5 Ny lohasaha
rehetra hototofana, Ary ny tendrombohitra sy ny havoana rehetra haetry, Ary ny
meloka hahitsy, Ary ny lalana mikitoantoana hohamarinina;
6 Ary ny nofo rehetra
hahita ny famonjen'Andriamanitra (Isa. 40:3-5).
7 Dia hoy izy
tamin'ny vahoaka izay nankeo aminy mba hataony batisa: Ry taranaky ny menarana,
iza no nanoro hevitra anareo handositra ny fahatezerana ho avy?
8 Koa mamoaza voa
miendrika ny fibebahana; ary aza manao anakampo hoe: Manana an'i Abrahama ho
rainay izahay; fa lazaiko aminareo fa Andriamanitra mahay manangana zanaka ho
an'i Abrahama avy amin'ireto vato ireto.
9 Ary, indro, efa
mipetraka ao amin'ny fototry ny hazo sahady ny famaky; koa ny hazo rehetra izay
tsy mamoa voa tsara dia hokapohina ka hatsipy any anaty afo.
10 Ary ny
vahoaka nanontany an'i Jaona hoe: inona ary no hataonay?
11 Ary namaly
izy ka nanao taminy hoe: Izay manana akanjo roa dia aoka hanome ho an'ny tsy
manana; ary izay manan-kanina, dia aoka hanao toy izany koa izy.
12 Dia avy koa
ny mpamory hetra sasany mba hataony batisa ka nanao taminy hoe: Mpampianatra ô,
inona no hataonay?
13 Ary hoy izy
taminy: Aza mampandoa mihoatra noho izay notendrena halainareo.
14 Ary nisy
miaramila koa nanontany azy ka nanao hoe: Ary inona kosa no mba hataonay? Dia
hoy izy taminy: Aza mitohatoha foana amin'olona, ary aza miampanga lainga, ary
mianina amin'ny karamanareo.
15 Fa raha
mbola niandry ny olona, ka samy nisaina an'i Jaona tam-pony, na izy no Kristy,
na tsia,
16 dia namaly
Jaona ka nanao tamin'izy rehetra hoe: Izaho manao batisa anareo amin'ny rano,
fa avy Izay mahery noho izaho, ka tsy miendrika hamaha ny fehin-kapany aza aho;
Izy no hanao batisa anareo amin'ny Fanahy Masina sy ny afo;
17 eny
an-tànany ny fikororohany hanadiovany tsara ny no am-pamoloany ka hanangonany
ny vary ho any amin'ny sompiny; fa ny akofa sy ny mololo hodorany amin'ny afo
tsy azo vonoina.
18 Ary fananarana
maro hafa koa no notoriny tamin'ny olona.
19 Fa Heroda
mpanapaka, nony nanarin'i Jaona noho ny amin'i Herodiasy, vadin-drahalahiny, sy
noho ny ratsy rehetra izay nataony,
20 dia nanidy an'i
Jaona tao an-tranomaizina ho fanampin'izany rehetra izany koa.
21 Ary rehefa natao
batisa ny vahoaka rehetra, ary Jesosy koa efa natao batisa sy nivavaka, dia
nisokatra ny lanitra;
22 ary ny Fanahy
Masina nidina teo amboniny, ka ny endriny dia tahaka ny voromailala; ary nisy
feo avy tany an-danitra nanao hoe: Hianao no Zanako malalako; Hianao no
sitrako.
23 Ary tokony ho efa
telo-polo taona Jesosy, raha vao nanomboka ny raharahany, ka natao ho zanak'i
Josefa, izay zanak'i Hely,
24 zanak'i Matata,
zanak'i Levy, zanak'i Melky, zanak'i Janay, zanak'i Josefa,
25 zanak'i Matitia,
zanak'i Amosa, zanak'i Nahoma, zanak'i Esly, zanak'i Nagay,
26 zanak'i Mata,
zanak'i Matatia, zanak'i Semey, zanak'i Joseka, zanak'i Joda,
27 zanak'i Joanana,
zanak'i Resa, zanak'i Zerobabela, zanak'i Sealtiela*, zanak'i Nery,[*Gr.
Salatiela]
28 zanak'i Melky,
zanak'i Ady, zanak'i Kosama, zanak'i Elmadama, zanak'i Era,
29 zanak'i Jesosy,
zanak'i Eliezera, zanak'i Joreima, zanak'i Matata, zanak'i Levy,
30 zanak'i Simeona,
zanak'i Joda, zanak'i Josefa, zanak'i Jonama, zanak'i Eliakima,
31 zanak'i Melea,
zanak'i Mena, zanak'i Matata, zanak'i Natana, zanak'i Davida,
32 zanak'i Jese,
zanak'i Obeda, zanak'i Boaza, zanak'i Salmona, zanak'i Nahasona,
33 zanak'i Aminadaba,
zanak'i Arny*, zanak'i Hezrona, zanak'i Fareza, zanak'i Joda,[*Na: (Arama)]
34 zanak'i Jakoba,
zanak'isaka, zanak'i Abrahama, zanak'i Tera, zanak'i Nahora,
35 zanak'i Seroga,
zanak'i Reo, zanak'i Palega, zanak'i Ebera, zanak'i Sela,
36 zanak'i Kenana,
zanak'i Arpaksada, zanak'i Sema, zanak'i Noa, zanak'i Lameka,
37 zanak'i Metosela,
zanak'i Enoka, zanak'i Jareda, zanak'i Mahalalila, zanak'i Kenana,
38 zanak'i Enosa, zanak'i
Seta, zanak'i Adama, zanak'Andriamanitra.
1 Ary Jesosy feno ny
Fanahy Masina dia niverina avy tany Jordana, ary nentin'ny Fanahy tany
an-efitra efa-polo andro Izy
2 ka nalain'ny devoly
fanahy. Ary tsy nihinan-kanina akory Izy tamin'izany andro izany, ka rehefa
tapitra izany, dia noana Izy.
3 Ary hoy ny devoly
taminy: raha Zanak'Andriamanitra Hianao, teneno io vato io mba ho tonga mofo.
4 Fa Jesosy namaly
azy ka nanao hoe: Voasoratra hoe: Tsy mofo ihany no hiveloman'ny olona (Deo. 8.
3).
5 Ary ny devoly
nitondra Azy niakatra, dia naneho Azy indray mipi-maso ny fanjakana rehetra
amin'izao tontolo izao.
6 Dia hoy ny devoly
taminy: Homeko Anao izao fanapahana rehetra izao mbamin'ny voninahiny, fa efa
natolotra ahy izany, ka izay tiako no homeko azy;
7 koa raha hiankohoka
eto anatrehako Hianao, dia ho Anao avokoa izany rehetra izany.
8 Fa Jesosy namaly ka
nanao taminy hoe: Voasoratra hoe: Jehovah Andriamanitrao no hiankohofanao, ary
Izy irery ihany no hotompoinao (Deo. 6. 13; 10. 20).
9 Ary nitondra Azy
nankany Jerosalema izy, dia nampitoetra Azy teo an-tampon'ny tempoly ka nanao
taminy hoe: Raha Zanak'Andriamanitra Hianao, mivarina any ambany any;
10 fa voasoratra hoe:
Izy handidy ny anjeliny ny aminao mba hiaro Anao;
11 Ary eny an-tànany
no hitondran'ireo Anao, Fandrao ho tafintohina amin'ny vato ny tongotrao (Sal.
91. 11, 12).
12 Fa Jesosy namaly
ka nanao taminy hoe: Voalaza hoe: Aza maka fanahy an'i Jehovah Andriamanitrao
(Deo. 6. 16).
13 Ary rehefa
nahatapitra izay fakam-panahy rehetra ny devoly, dia nandao Azy izy aloha.
14 Ary Jesosy
niverina tamin'ny herin'ny Fanahy nankany Galilia; dia niely tamin'ny tany
rehetra manodidina ny lazany.
15 Ary Izy
nampianatra teny amin'ny synagogan'ny olona ka nankalazain'izy rehetra.
16 Dia tonga tao
Nazareta, izay nahabe Azy Izy; ary araka ny fanaony dia niditra tao amin'ny
synagoga tamin'ny andro Sabata Izy ka nitsangana hamaky teny.
17 Dia natolotra Azy
ny bokin'Isaia mpaminany; ary nony namelatra ny boky Izy, dia nahita ny teny
voasoratra hoe:
18 Ny Fanahin'i
Jehovah no ato amiko, Satria nanosotra Ahy hitory teny soa mahafaly amin'ny
malahelo Izy; Naniraka Ahy hitory fandefasana amin'ny mpifatotra Izy, Sy
fampahiratana amin'ny jamba, Hanafaka izay nampahorina,
19 Hitory ny taona
ankasitrahan'i Jehovah (Isa. 61. 1, 2).
20 Ary rehefa
nahorony ny boky ka naveriny tamin'ny mpanao raharaha, dia nipetraka Izy. Ary
nandinika Azy ny mason'izay rehetra teo amin'ny synagoga.
21 Ary Jesosy niteny
taminy hoe: Androany no efa tanteraka eto anatrehanareo izany soratra izany.
22 Ary izy rehetra
nankalaza Azy sady talanjona noho ny tenin'ny fahasoavana naloaky ny vavany, ka
hoy izy: Tsy Zanak'i Josefa va Ity?
23 Ary hoy kosa
Jesosy taminy: Hataonareo amiko tokoa izao ohabolana izao hoe: Mpanao fanafody,
sitrano ny tenanao: izay renay fa nataonao tao Kapernaomy dia mba ataovy eto
amin'ny taninao koa.
24 Ary hoy koa Izy:
Lazaiko aminareo marina tokoa: Tsy misy mpaminany izay ankasitrahana ao amin'ny
taniny.
25 Fa lazaiko
aminareo marina tokoa: Maro no mpitondratena teo amin'ny Isiraely tamin'ny
andron'i Elia, raha nihantona ny andro* telo taona sy enim-bolana, ka nisy
mosary mafy tamin'ny tany rehetra;[*Gr.nirindrina ny lanitra]
26 nefa tsy mba
nirahina ho any amin'ny anankiray tamin'ireo Elia, fa ho any Zarefata any
amin'ny tany Sidona ihany, dia ho any amin'izay vehivavy mpitondratena.
27 Ary maro no boka
teo amin'ny Isiraely tamin'ny andron'i Elisa mpaminany, nefa tsy mba nisy
nodiovina na dia iray akory aza fa Namàna Syriana ihany.
28 Dia tezitra loatra
izay rehetra teo amin'ny synagoga, raha nandre izany,
29 ka nitsangana izy,
dia nandroaka Azy hiala ao an-tanàna ary nitondra Azy ho any an-tampon'ny
havoana niorenan'ny tanàna, mba hazerany amin'ny hantsana.
30 Nefa Izy namaky
teo afovoany, ka dia lasa nandeha.
31 Ary nidina tany
Kapernaomy, tanàna any Galilia, Jesosy ka nampianatra ny olona tamin'ny Sabata.
32 Dia talanjona ny
olona tamin'ny fampianarany, satria nisy fahefana ny teniny.
33 Ary nisy olona tao
amin'ny synagoga, izay nanana ny fanahin'ny demonia maloto, dia niantso
tamin'ny feo mahery izy
34 ka nanao hoe:
Indrisy! moa mifaninona akory izahay sy Hianao, ry Jesosy avy any Nazareta? avy
handringana anay va Hianao? Fantatro fa Ilay Masin'Andriamanitra Hianao.
35 Fa Jesosy niteny
mafy azy ka nanao hoe: Mangina ianao, ka mivoaha aminy. Ary ny demonia, nony
namotraka azy teo afovoan'ny olona, dia nivoaka taminy, nefa tsy naharatra azy.
36 Ary talanjona
avokoa izy rehetra ka niresaka hoe: Manao ahoana izao teny izao! fa amin'ny
fahefana sy ny hery no andidiany ny fanahy maloto, dia mivoaka ireo.
37 Ary niely
teny amin'ny tany manodidina rehetra ny lazany.
38 Ary nony
nitsangana niala tao amin'ny synagoga Jesosy, dia niditra tao an-tranon'i
Simona. Ary azon'ny tazo mafy ny rafozam-bavin'i Simona; ary izy ireo nangataka
taminy hahasitrana azy.
39 Dia
nitsangana teo akaikiny Izy, ka noteneniny mafy ny tazo, dia niala
tamin-dravehivavy izany; ary nitsangana niaraka tamin'izay izy ka nanompo azy
ireo.
40 Ary raha
nilentika ny masoandro, ny olona rehetra izay nanana marary tamin'ny aretina
samy hafa dia nitondra azy teo aminy; ary dia nametra-tanana tamin'izy rehetra
tsirairay Izy ka nahasitrana azy.
41 Ary nisy
demonia nivoaka tamin'ny maro ka niantso hoe: Hianao no Zanak'Andriamanitra.
Nefa norarany ireo ka tsy navelany hiteny, satria nahalala Azy ho Kristy.
42 Ary nony
maraina ny andro, dia niala Jesosy ka nankany an-tany foana; ary ny vahoaka
nitady Azy, dia nankeo aminy ka te-hihazona Azy mba tsy hialany tao aminy.
43 Fa hoy Izy
taminy: Tsy maintsy mitory ny teny soa mahafaly ny amin'ny
fanjakan'Andriamanitra any amin'ny tanàna hafa koa Aho, satria izany no
nanirahana Ahy.
44 Ary Izy
nitori-teny tao amin'ny synagoga eran'i Galilia.
1 Ary raha nifanizina
taminy ny vahoaka mba hihaino ny tenin'Andriamanitra, dia nijanona teo
amoron'ny Farihin'i Genesareta Jesosy;
2 ary nahita
sambokely roa nijanona teo an-tsisin'ny farihy Izy; fa ny mpanarato efa niala
taminy ka nanasa ny haratony.
3 Ary niditra teo
amin'ny sambokely anankiray izay an'i Simona Izy, dia nangataka taminy hihataka
kely amin'ny tany. Dia nipetraka teo an-tsambokely Izy ka nampianatra ny
vahoaka.
4 Ary rehefa
nitsahatra niteny Jesosy, dia hoy Izy tamin'i Simona: Mandrosoa ho any amin'ny
lalina, dia alatsaho ny haratonareo hahazoana hazandrano.
5 Fa Simona namaly ka
nanao hoe: Tompoko, mandritra ny alina no efa nikelezanay aina, nefa tsy nahazo
na inona na inona; kanefa noho ny teninao; dia halatsako ihany ny harato.
6 Ary rehefa nataony
izany, dia nahazo hazandrano be dia be izy, ka efa nisy triatra ny haratony.
7 Ary izy nanatsika
ny namany, izay teo amin'ny sambokely hafa, mba ho avy hanampy azy. Dia avy ireny, ary nofenoiny ny
sambokely roa, ka efa saiky nilentika.
8 Ary rehefa
hitan'i Simona Petera izany, dia niankohoka tamin'ny tongotr'i Jesosy izy ka nanao
hoe: Tompoko, mialà amiko, fa olo-meloka aho.
9 Fa talanjona
izy sy izay rehetra teo aminy noho ny haben'ny hazan-drano izay azony.
10 Ary toy
izany koa Jakoba sy Jaona, zanak'i Zebedio, izay niombon-draharaha tamin'i
Simona. Dia hoy Jesosy
tamin'i Simona: Aza matahotra; hatramin'izao ankehitriny izao dia olona kosa no
ho azonao.
11 Ary rehefa
nampiantsona ny sambokeliny teo an-tanety izy, dia nahafoy ny zavatra rehetra
ka nanaraka an'i Jesosy.
12 Ary raha tao
an-tanàna anankiray Jesosy, indro, nisy lehilahy heniky ny habokana: ary nony
nahita Azy io, dia niankohoka ka nitaraina taminy hoe: Tompoko, raha mety
Hianao, dia mahay manadio ahy.
13 Ary Jesosy
naninjitra ny tanany, dia nanendry azy ka nanao hoe: Mety Aho; madiova ianao.
ry ny habokany niala taminy niaraka tamin'izay.
14 Ary Jesosy
nandrara azy tsy hilaza amin'olona na dia iray akory aza; fa mandehana, hoy
Izy, misehoa amin'ny mpisorona, ka manatera ny fanadiovana anao araka ny
nandidian'i Mosesy, ho vavolombelona amin'ireo.
15 Fa mainka niely bebe
kokoa ny lazany, dia niangona ny vahoaka betsaka hihaino Azy sy hositranina
tamin'ny aretiny.
16 Ary niala teo Izy,
dia nitoetra tany an-efitra ka nivavaka.
17 Ary tamin'ny andro
anankiray, raha nampianatra Jesosy, dia nipetraka teo ny Fariseo sasany sy ny
mpampiana-dalàna, izay efa niala tamin'ny tanàna rehetra any Galilia sy Jodia
ary tany Jerosalema; ary ny herin'ny Tompo dia tao aminy mba hahasitranany.
18 Ary, indro, nisy
nitondra lehilahy tamin'ny fandriana, izay mararin'ny paralysisa, ka nitady izay
hampidirany sy hametrahany azy teo anatrehany.
19 Ary satria tsy
nahita izay hampidirany azy izy noho ny habetsahan'ny vahoaka, dia niakatra teo
an-tampon-trano ka nanesorany ny tafo tanimanga, dia nampidininy ralehilahy
mbamin'ny fandriany ho eo afovoan'ny olona, dia teo anatrehan'i Jesosy.
20 Ary raha hitan'i
Jesosy ny finoan'ireo, dia hoy Izy: Ralehilahy, voavela ny helokao.
21 Fa ny
mpanora-dalàna sy ny Fariseo niara-nisaina hoe: Iza moa Ity miteny ratsy* Ity?
Iza no mahavela heloka, afa-tsy Andriamanitra ihany?[*Gr. manao blasfemia;
izahao Mat. 9.3]
22 Fa Jesosy
nahafantatra ny eritreriny, dia namaly ka nanao taminy hoe: Nahoana ianareo no
mieritreritra ao am-ponareo?
23 Iza moa no
moramora kokoa, ny manao hoe va: Voavela ny helokao, sa ny manao hoe:
Mitsangàna, ka mandehana?
24 Fa mba ho
fantatrareo fa ny Zanak'olona manana fahefana etỳ ambonin'ny tany hamela
heloka - dia hoy Izy tamin'ilay mararin'ny paralysisa: Izaho milaza aminao hoe:
Mitsangàna, dia betao ny fandrianao, ary modia any an-tranonao.
25 Ary tamin'izay dia
nitsangana teo anatrehan'ny olona izy ka nambeta ny fandriany, dia lasa nody
sady nankalaza an'Andriamanitra.
26 Ary talanjona
avokoa ny olona rehetra, dia nankalaza an'Andriamanitra sady raiki-tahotra
indrindra ka nanao hoe: Efa nahita zavatra mahagaga isika androany.
27 Ary rehefa afaka
izany, dia nandeha Jesosy ka nahita mpamory hetra atao hoe Levy, nipetraka teo
am-pamorian-ketra*; dia hoy Izy taminy: Manaraha Ahy.[*Izahao Mat. 9,9]
28 Ary nahafoy ny
zavatra rehetra izy ka nitsangana, dia nanaraka Azy.
29 Ary Levy nanao
fanasana lehibe tao an-tranony ho an'i Jesosy; ary nisy mpamory hetra maro sy
olon-kafa koa, izay niara-nipetraka nihinana teo aminy.
30 Fa ny Fariseo sy
ny mpanora-dalàna izay teo aminy dia nimonomonona tamin'ny mpianatr'i Jesosy ka
nanao hoe: Nahoana ianareo no miara-mihinana sy misotro amin'ny mpamory hetra
sy ny mpanota?
31 Ary Jesosy namaly
ka nanao taminy hoe: Tsy ny finaritra no mila mpanao fanafody, fa ny marary;
32 tsy avy hiantso ny
marina Aho, fa ny mpanota mba hibebaka.
33 Ary hoy izy ireo
taminy: Ny mpianatr'i Jaona mifady hanina matetika sy mivavaka, ary ny an'ny
Fariseo koa mba tahaka izany ihany, fa ny Anao kosa mihinana sy misotro ihany.
34 Ary hoy Jesosy
taminy: Mahay mampifady ny havan'ny mpampakatra va ianareo, raha mbola ao aminy
ihany ny mpampakatra?
35 Fa ho avy ny
andro; ary rehefa voaisotra* ny mpampakatra hiala aminy, dia amin'izany andro
izany vao hifady izy.[*Na: Ny andro izay hanesorana]
36 Ary Izy nanao
fanoharana taminy koa nanao hoe: Tsy misy olona mandriatra lamba vaovao
hanalany tapa-damba hatampina ny lamba tonta; fa raha izany, dia mahatriatra ny
vaovao izy, ary ilay tapa-damba nalaina tamin'ny vaovao dia tsy hifanaraka
amin'ny tonta.
37 Ary tsy misy olona
manisy divay vaovao no anaty siny hoditra tonta; fa raha izany, ny divay vaovao
mahatriatra ny siny hoditra, ka ho raraka ny divay, sady ho simba foana ny siny
hoditra;
38 Fa ny divay vaovao
dia tsy maintsy hatao ao anaty siny hoditra vaovao.
39 Tsy misy olona,
rehefa nisotro ny divay ela, no maniry ny vaovao; fa hoy izy: Ny ela no
tsara*.[*Na: tsaratsara kokoa]
1 Ary tamin'ny Sabata
anankiray* dia nandeha namaky ny tanimbary Jesosy, ary ny mpianany nanoty ny
salohim-bary, ka rehefa nokosokosohiny tamin'ny tànany, dia nohaniny.[* Na:
faharoa manaraka ny voalohany].
2 Fa ny Fariseo
sasany nanao hoe: Nahoana ianareo no manao izay tsy mety hatao amin'ny Sabata?
3 Ary Jesosy namaly
azy ka nanao hoe: Tsy mbola novakinareo va ny teny milaza ilay nataon'i Davida,
raha noana izy mbamin'izay nanaraka azy,
4 fa niditra tao
an-tranon'Andriamanitra izy ka nandray ny mofo aseho ary nihinana sady nanome
he an'izay nanaraka azy koa, nefa mahadiso raha misy homana izany, afa-tsy ny
mpisorona ihany?
5 Ary hoy Izy taminy:
Tompon'ny Sabata ny Zanak'olona.
6 Ary nony tamin'ny
Sabata hafa koa niditra tao amin'ny synagoga Jesosy ka nampianatra; ary nisy
lehilahy anankiray maty* tanana tao.[*Gr. efa maina, na malazo]
7 Ary ny
mpanora-dalàna sy ny Fariseo nizaha taratra Azy, na hahasitrana amin'ny Sabata
Izy, na tsia, mba hahitany izay hiampangana Azy.
8 Fa Jesosy nahalala
ny hevitr'ireo, ka dia niteny tamin-dralehilahy maty tanana hoe: Mitsangàna, ka
mijoroa etsy afovoany. Dia nitsangana izy ka nijoro.
9 Ary hoy Jesosy
tamin'ireo: Manontany anareo Aho: Moa ny manao soa va no mety hatao amin'ny
Sabata, sa ny manao ratsy? ny mamonjy aina va, sa ny mahavery aina?
10 Ary nijery azy
rehetra manodidina Izy, dia nanao tamin-dralehilahy hoe: Ahinjiro ny tananao.
Dia nataony izany, ka sitrana ny tànany.
11 Dia safotry ny
hatezerana* izy ireo ka nioko ny amin'izay hanaovany an'i Jesosy.
12 Ary tamin'izany
andro izany dia lasa nankany an-tendrombohitra Jesosy mba hivavaka; ary
naharitra nivavaka tamin'Andriamanitra nandritra ny alina Izy.
13 Ary nony maraina
ny andro,dia nantsoiny hanatona Azy ny mpianany, ka nifidianany roa ambin'ny
folo lahy, izay nataony hoe Apostoly,
14 dia Simona, izay
nataony hoe koa Petera, sy Andrea rahalahiny, sy Jakoba sy Jaona sy Filipo sy
Bartelemeo
15 sy Matio sy Tomasy
sy Jakoba, zanak'i Alfeo, sy Simona, izay atao hoe Zelota,
16 sy Jodasy,
zanak'i* Jakoba, ary Jodasy Iskariota, izay tonga namadika. [* Na: rahalahin'i]
17 Ary Jesosy
niara-nidina tamin'ireo, dia nijanona teo an-kamarenana Izy sy ny mpianany maro
mbamin'ny vahoaka betsaka avy tany Jodia rehetra sy Jerosalema, ary avy tany
amoron-dranomasina any Tyro sy Sidona, izay tonga mba hihaino Azy sy
hositranina amin'ny aretiny;
18 ary izay
nampahorin'ny fanahy maloto dia nositranina.
19 Ary ny vahoaka
rehetra nitady hanendry Azy, satria nisy hery niala taminy ka nahasitrana azy
rehetra.
20 Ary Jesosy dia
nanopy ny masony tamin'ny mpianany ka nanao hoe: Sambatra ianareo malahelo, fa
anareo ny fanjakan'Andriamanitra.
21 Sambatra ianareo
noana ankehitriny, fa hovokisana ianareo. Sambatra ianareo mitomany ankehitriny,
fa hihomehy ianareo.
22 Sambatra ianareo,
raha halan'ny olona ka ariany sy haratsiny, ary laviny toy ny zava-dratsy ny
anaranareo, noho ny amin'ny Zanak'olona.
23 Mifalia ianareo
amin'izany andro izany, ka mibitaha*; fa, indro, lehibe ny valim-pitianareo any
an-danitra; fa izany no nataon'ny razany tamin'ny mpaminany.[*Na: miantsambora]
24 Fa lozanareo izay
manan-karena kosa! fa efa azonareo izay mahafa-po anareo.
25 Lozanareo izay
voky ankehitriny! fa mbola ho noana ianareo. Lozanareo izay mihomehy ankehitriny fa mbola be
ory sy hitomany ianareo.
26 Lozanareo,
raha milaza soa anareo ny olona rehetra! fa izany no nataon'ny razany tamin'ny
mpaminany sandoka.
27 Kanefa hoy
Izaho aminareo izay mihaino: Tiava ny fahavalonareo; manaova soa amin'izay
mankahala anareo;
28 misaora izay
manozona anareo, ary mivavaha ho an'izay manisy ratsy anareo.
29 Raha misy
mamely ny takolakao anankiray, dia atolory azy koa ny anankiray; ary raha misy
maka ny lambanao, aza lavinao na dia ny akanjonao aza.
30 Omeo izay
rehetra mangataka aminao; ary raha misy maka ny anananao, dia aza manaraka
izany aminy.
31 Ary araka
izay tianareo hataon'ny olona aminareo, dia mba ataovy aminy kosa.
32 Fa raha izay tia
anareo ihany no tianareo, inona moa no soa tokony ho azonareo? fa na dia ny mpanota
koa aza mba tia izay tia azy.
33 Ary raha izay
manisy soa anareo ihany no asianareo soa, inona moa no soa tokony ho azonareo?
fa na dia ny mpanota aza mba manao izany ihany.
34 Ary raha
mampisambotra izay antenainareo fa mbola hanonitra ianareo, inona moa no soa
tokony ho azonareo? fa na dia ny mpanota aza mba mampisambotra ny mpanota,
handraisany toraka izany indray.
35 Fa tiava ny
fahavalonareo, ary manaova soa, dia mampisambora, fa aza kivy na amin'inona na
amin'inona*, dia ho lehibe ny valim-pitianareo, ary ho zanaky ny Avo Indrindra
ianareo; fa Izy mora fanahy amin'izay tsy misaotra sy ny ratsy fanahy.[*Na: aza
manantena valiny]
36 Aoka ho mpamindra
fo ianareo mba ho tahaka ny Rainareo, Mpamindra fo.
37 Ary aza mitsara,
dia tsy hotsaraina ianareo; aza manameloka, dia tsy hohelohina ianareo; mamelà,
dia mba havela ianareo;
38 omeo, dia mba
homena ianareo; fatra tsara sady ahintsana no afatratra ka mihoatra no homeny
ho ao am-pofoanareo. Fa izay fatra ataonareo no hamarana ho anareo kosa.
39 Ary Jesosy nanao
fanoharana taminy koa hoe: Ny jamba va mahatari-dalana ny jamba? Tsy hianjera
any an-kady va izy roa?
40 Ny mpianatra tsy
mihoatra noho ny mpampianatra; fa izay rehetra tanteraka dia ho tahaka ny
mpampianatra azy ihany.
41 Ary nahoana ianao
no mijery ny sombin-kazo izay eo amin'ny mason'ny rahalahinao, nefa ny andry
izay eo amin'ny masonao dia tsy mba tsaroanao akory?
42 Ary ahoana no
ilazanao amin'ny rahalahinao hoe: Ry rahalahy, aoka hesoriko ny sombin-kazo eo
amin'ny masonao, nefa tsy mba hitanao ny andry eo amin'ny masonao? Ry
mpihatsaravelatsihy, esory aloha ny andry eo amin'ny masonao, ary amin'izany
dia ho hitanao tsara ny hanesoranao ny sombin-kazo eo amin'ny maso'ny
rahalahinao.
43 Fa tsy misy hazo
tsara mamoa voa ratsy na hazo ratsy mamoa voa tsara.
44 Fa samy fantatra
amin'ny voany avy ny hazo rehetra; fa tsy misy manoty aviavy* amin'ny tsilo, na
voaloboka amin'ny voaroy.[*aviavimbazaha]
45 Ny olona tsara
fanahy dia mamoaka ny tsara avy amin'ny rakitra tsaran'ny fony; ary ny ratsy
fanahy kosa dia mamoaka ny ratsy; fa amin'ny haben'ny ao am-pony no itenenan'ny
vavany.
46 Ary nahoana
ianareo no miantso Ahy hoe: Tompoko, Tompoko, nefa tsy manao izay lazaiko?
47 Izay rehetra
manatona Ahy sy mandre ny teniko ka mankaṭ azy, dia hasehoko aminareo izay
tahaka azy:
48 Tahaka ny olona
nanao trano izy, izay nihady lalina ary nanisy fanorenana teo ambonin'ny
vatolampy; ary nony tondraka ny rano, dia namely mafy izany trano izany ny
riaka, nefa tsy nahahozongozona azy, satria tsara fanorenana* izy.[*Na: naorina
teo ambonin'ny vatolampy izy]
49 Fa izay mandre, fa
tsy mankaṭ, dia tahaka ny olona izay nanao trano teo ambonin'ny tany, fa tsy
nanisy fanorenana; dia namely azy mafy ny riaka, ka dia nirodana niaraka
tamin'izay izy; ary loza ny naharavan'izany trano izany.
1 Ary rehefa vitan'i
Jesosy teo anatrehan'ny olona izany toriteniny rehetra izany, dia nankany
Kapernaomy Izy.
2 Ary ny
mpanompon'ny kapiteny anankiray, izay malalany, dia narary efa ho faty.
3 Koa raha
nahare ny amin'i Jesosy ilay kapiteny, dia naniraka loholon'ny Jiosy hankeo
aminy hangataka Azy mba ho avy ka hahasitrana ny mpanompony.
4 Ary rehefa
tonga teo amin'i Jesosy ireo, dia nangataka mafy taminy ka nanao hoe: Miendrika
ny hanaovanao izany izy,
5 satria tia ny
firenentsika izy, sady izy no efa nanao ny synagoga ho antsika.
6 Ary Jesosy
nandeha niaraka taminy. Ary rehefa efa mby teo akaikin'ny trano Izy, ilay
kapiteny dia naniraka sakaiza hitsena Azy ka nanao taminy hoe: Tompoko, aza
manahirana ny tenanao Hianao; fa tsy miendrika hidiranao ao ambanin'ny
tafon-tranoko aho.
7 Koa na dia ny
tenako aza dia nataoko fa tsy miendrika hankeo aminao; fa mitenena ihany, dia
ho sitrana ny ankizilahiko.
8 Fa izaho koa mba
lehilahy manan-dehibe ihany, ka manana miaramila izay feheziko; koa hoy izaho
amin'ny anankiray: Mandehana, dia mandeha izy, ary amin'ny anankiray koa Avia,
dia avy izy, ary amin'ny mpanompoko: Ataovy izao, dia manao izy.
9 Ary nony nahare
izany Jesosy, dia gaga taminy; ary dia nitodika Izy ka nanao tamin'ny vahoaka
izay nanaraka Azy hoe: Lazaiko aminareo fa tsy mbola nahita finoana lehibe toy
izany Aho, na dia tamin'ny Isiraely aza.
10 Ary nony
tafaverina tao an-trano ireo iraka ireo, dia hitany fa sitrana ilay mpanompo.
11 Ary taoriana
kelin'izany* Jesosy dia nankany an-tanana atao hoe Naina; ary naniraka Azy ny
mpianany sy ny vahoaka betsaka.[*Na: (nony ampitson'iny)]
12 Ary rehefa mby teo
akaikin'ny vavahadin'ny tanàna Izy, dia, indro, nisy fatin'ny lehilahy
anankiray nentina nivoaka, izay zanakalahy tokan'ny reniny, sady mpitondratena
ravehivavy; ary nisy vahoaka betsaka avy tao an-tanàna nanaraka azy.
13 Ary nony
nahita an-dravehivavy ny Tompo, dia onena azy ka nanao taminy hoe: Aza
mitomany.
14 Ary nanatona
Izy ka nanendry ny tranovorona, dia nijanona izay nilanja. Ary hoy Jesosy:
zatovo, hoy Izaho aminao: Miarena.
15 Dia niarina
ny maty sady niteny, ary dia natolony tamin-dreniny.
16 Ary
raiki-tahotra ny olona rehetra ka nankalaza an'Andriamanitra hoe: Mpaminany
lehibe no efa mitsangana eto amintsika; ary Andriamanitra efa nitsinjo ny
olony.
17 Dia niely
teny Jodia rehetra sy teny amin'ny tany manodidina rehetra ny lazan'i Jesosy ny
amin'izany zavatra izany.
18 Ary ny
mpianatr'i Jaona nanambara izany rehetra izany taminy.
19 Ary Jaona
niantso ny mpianany roa lahy hankao aminy, dia naniraka azy hankany amin'ny
Tompo hanao hoe: Hianao va Ilay ho avy, sa mbola hafa no andrasantsika?
20 Ary nony
tonga tany aminy ireo lehilahy ireo, dia nanao hoe: Jaona Mpanao-batisa
naniraka anay hankatỳ aminao hanao hoe: Hianao va Ilay ho avy, sa mbola
hafa no andrasantsika?
21 Ary
tamin'izany ora izany Jesosy dia nahasitrana olona maro tamin'ny rofy sy ny
aretina sy ny fanahy ratsy sady nampahiratra ny jamba maro.
22 Dia namaly
Izy ka nanao taminy hoe: Mandehana ianareo, ambarao amin'i Jaona izao hitanareo
sy renareo izao; mahiratra ny jamba, afaka ny mandringa, diovina ny boka,
malady ny marenina, atsangana ny maty, ary ny malahelo dia itoriana ny
filazantsara.
23 Ary sambatra
izay tsy ho tafintohina noho ny amiko.
24 Ary rehefa
lasa ny irak'i Jaona, dia nilaza an'i Jaona tamin'ny vahoaka Jesosy ka nanao
hoe: Hizaha inona no nalehanareo tany an-efitra? Volotara nohozongozonin'ny rivotra va?
25 Sa hizaha inona no
nalehanareo? Olona mitafy lamba soa* va? Indro, ny mitafy lamba soa sy mihinana
zava-py dia ao an-tranon'ny mpanjaka.[*Gr. malemy]
26 Sa hizaha inona no
nalehanareo tany? Mpaminany va? Eny, hoy Izaho aminareo, sady mihoatra lavitra
noho ny mpaminany izy.
27 Fa izy ilay
voasoratra hoe: Indro, Izaho maniraka ny irako hialoha Anao, Izay hamboatra ny
lalanao eo alohanao (Mal. 3. 1).
28 Lazaiko aminareo:
Amin'izay nateraky ny vehivavy tsy misy lehibe noho Jaona; nefa ny kely
indrindra amin'ny fanjakan'Andriamanitra dia lehibe noho izy.
29 Ary ny vahoaka
rehetra sy ny mpamory hetra raha nandre, dia nanamarina an'Andriamanitra,
satria natao batisa tamin'ny batisan'i Jaona izy.
30 Fa ny Fariseo sy
ny mpahay lalàna kosa nandà ny fikasan'Andriamanitra, satria tsy mba nanatona
hataon'i Jaona batisa izy.
31 Tahaka ny inona
ary no hanoharako ny olona amin'ity taranaka ity? tahaka ny inona moa izy?
32 Tahaka ny ankizy
madinika mipetraka eny an-tsena izy, izay mifampiantso hoe: Efa nitsoka sodina
taminareo izahay, nefa tsy nandihy ianareo; efa nanao feo fisaonana izahay,
nefa tsy nitomany ianareo.
33 Fa tonga Jaona
Mpanao-batisa tsy nihinan-kanina na nisotro divay, ka hoy ianareo: Manana
demonia izy.
34 Tonga ny
Zanak'olona mihinana sy misotro kosa, ka hoy ianareo: Indro, olona fatra-pitia
hanina sy mpisotro divay, sakaizan'ny mpamory hetra sy ny mpanota.
35 Fa ny fahendrena
dia hamarinin'ny zanany rehetra.
36 Ary ny Fariseo
anankiray nanasa an'i Jesosy hiara-mihinana aminy; ary dia niditra tao
an-tranon'ilay Fariseo Izy ka nipetraka nihinana.
37 Ary, indro, nisy
vehivavy mpanota tao an-tanàna, ka rehefa fantany fa Jesosy nipetraka nihinana
tao an-tranon'ilay Fariseo, dia nitondra tavoara alabastara feno menaka manitra
izy;
38 ary nijanona teo
ivohony tanilan'ny tongony izy ka nitomany, dia nahakotsa ny tongony tamin'ny
ranomasony sy namaoka azy tamin'ny volon-dohany, dia nanoroka fatratra ny
tongony ka nanosotra azy tamin'ny menaka manitra,
39 Ary nony nahita
izany ilay Fariseo nanasa Azy, dia nanao anakampo hoe: Raha mpaminany Ity, dia
ho nahalala io vehivavy manendry Azy io sy ny toeny; fa mpanota io.
40 Ary Jesosy namaly
ka nanao taminy hoe: Ry Simona, manan-kolazaina aminao Aho. Dia hoy izy: Lazao
ary, Mpampianatra ô.
41 Nisy roa lahy
nananan'ny mpampanàna vola anankiray trosa: ny iray nananany denaria diman-jato,
ary ny iray kosa dimam-polo.
42 Ary raha tsy
nanan-kaloa izy roa lahy, dia samy navelany. Koa iza moa amin'ireo no ho tia azy indrindra?
43 Simona
namaly ka nanao hoe: Ataoko fa ilay namoizany be. Dia hoy Izy taminy: Marina ny
hevitrao.
44 Ary Jesosy nitodika
nijery an-dravehivavy ka nanao tamin'i Simona hoe: Hitanao va io vehivavy io?
Niditra teto an-tranonao Aho; nefa tsy mba nanome Ahy rano hanasana ny tongotro
ianao; fa izy kosa nahakotsa ny tongotro tamin'ny ranomasony, dia namaoka azy
tamin'ny volon-dohany.
45 Tsy mba
nanoroka Ahy akory ianao; fa izy, hatr'izay nidirako, dia tsy mbola nitsahatra
nanoroka fatratra ny tongotro.
46 Ny lohako
tsy mba nohosoranao diloilo akory; fa izy kosa nanoso-menaka manitra ny
tongotro.
47 Ary
amin'izany dia lazaiko aminao: Voavela ny helony be, fa be fitiavana izy; fa
izay voavela tamin'ny kely dia kely fitiavana.
48 Dia hoy Izy
tamin-dravehivavy: Voavela ny helokao.
49 Ary izay
niara-nipetraka nihinana teo aminy dia niresaka hoe: Iza moa Ity no mba mamela
heloka?
50 Ary hoy Izy
tamin-dravehivavy: Ny finoanao efa namonjy anao; mandehana soa aman-tsara.
1 Ary taoriana
kelin'izany, dia lasa Jesosy nitety ny tanàna sy ny vohitra nitory ny
filazantsaran'ny fanjakan'Andriamanitra; ary ny roa ambin'ny folo lahy nanaraka
Azy.
2 mbamin'ny
vehivavy sasany, izay nositraniny tamin'ny fanahy ratsy sy ny aretina, dia
Maria atao hoe Magdalena, izay efa nivoahan'ny demonia fito,
3 sy Johana,
vadin'i Koza, mpitandrina ny fananan'i Heroda, ary Sosana mbamin'ny maro hafa
koa, izay nanompo azy* tamin'ny fananany. [*Na: Azy]
4 Ary nisy
vahoaka betsaka niangona, ka nanatona Azy ny olona avy tamin'ny isan-tanàna,
dia nanao fanoharana hoe Izy:
5 Nivoaka ny
mpamafy hamafy ny voa; ary raha namafy izy, ny sasany dia voafafy teny amoron-dalana
ka voahitsakitsaka, ary dia lanin'ny voro-manidina.
6 Ary ny sasany
dia voafafy teny ambonin'ny vatolampy; ary raha vao naniry izy, dia nalazo;
satria tsy nisy mandomando.
7 Ary ny sasany
dia voafafy teny amin'ny tsilo; ary ny tsilo niara-naniry taminy, dia nangeja
azy.
8 Ary ny sasany
dia voafafy teny amin'ny tany tsara, dia naniry ka namoa zato heny. Ary rehefa
nilaza izany Izy, dia niantso hoe: Izay manan-tsofina ho enti-mihaino, aoka izy
hihaino.
9 Ary ny
mpianany nanontany Azy ny amin'izay hevitr'izany fanoharana izany.
10 Dia hoy Izy:
Hianareo no navela* hahalala ny zava-miafina ny amin'ny fanjakan'Andriamanitra;
fa amin'ny olon-kafa dia fanoharana no atao, mba hijery izy, fa tsy hahita, ary
hahare, fa tsy hahafantatra (Isa. 6. 9). [*Gr. nomena]
11 Koa izao no
hevitry ny fanoharana: Ny voa dia ny tenin'Andriamanitra.
12 Ireo teny
amoron-dalana dia izay mandre, nefa avy ny devoly ka manaisotra ny teny ao
am-pony, fandrao hino izy ka hovonjena.
13 Ireo teny
ambonin'ny vatolampy dia izay mandre sady mandray ny teny amin'ny hafaliana;
nefa tsy manam-paka ireo, fa mino vetivety ihany, koa amin'izay andro
isehoan'ny fakam-panahy dia mihemotra izy.
14 Ireo teny amin'ny
tsilo dia izay mandre, fa nony mandeha izy, dia voagejan'ny fiahiahiana sy ny
harena ary ny fahafinaretan'izao fiainana izao ka tsy mahavanom-boa.
15 Fa ireo teny
amin'ny tany tsara kosa dia izay mandre ny teny amin'ny fo sady marina no
tsara, dia mitana azy ka mamoa amin'ny faharetana.
16 Tsy misy olona
mampirehitra jiro ka manarona azy, na nametraka azy ao ambanin'ny farafara; fa
ataony eo amin'ny fanaovan-jiro izy, mba ho hitan'izay miditra ny mazava.
17 Fa tsy misy takona
izay tsy ho hita, na miafina izay tsy ho fantatra sy tsy haseho.
18 Koa tandremo ny
fihainonareo; fa izay manana dia homena; ary izay tsy manana kosa, na dia izay
ataony ho ananany aza dia halaina aminy.
19 Ary renin'i Jesosy
sy ny rahalahiny nanatona Azy, fa tsy nahazo nihaona taminy, satria nifanety ny
vahoaka.
20 Ary nisy nilaza
taminy hoe: Ny reninao sy ny rahalahinao mijanona ato ala-trano ta-hahita Anao.
21 Fa namaly Izy ka
nanao taminy hoe: Ny reniko sy ny rahalahiko dia ireto izay mandre ny
tenin'Andriamanitra ka mankaṭ azy.
22 Ary tamin'ny andro
anankiray dia niondrana an-tsambokely Jesosy sy ny mpianany; ary hoy Izy
taminy: Andeha isika hankeny am-pitan'ny farihy; dia lasa izy.
23 Ary nony nandeha
ny sambokely, dia azon'ny torimaso Jesosy; ary nisy tafio-drivotra nidina
tamin'ny farihy, ka nila ho feno rano ny sambo, ary saiky nahita loza izy ireo.
24 Ary nanatona izy,
dia namoha Azy ka nanao hoe: Tompoko, Tompoko, maty izahay! Dia nitsangana Izy,
ka noteneniny mafy ny rivotra sy ny onjan-drano. Ary dia nitsahatra izany, ka
tonga tony tsara ny andro.
25 Ary hoy Izy
taminy: Aiza ny finoanareo? Ary natahotra izy ireo sady gaga ka niresaka hoe:
Iza moa Ity, no mandidy ny rivotra sy ny rano Izy, ka manaiky Azy izany!
26 Dia nitody tany
amin'ny tanin'ny Gerasena* izay tandrifin'i Galilia izy.[*Na: (Gadarena)]
27 Ary raha niala
nankeny an-tanety Jesosy, dia nifanena taminy ny lehilahy anankiray avy tao
an-tanàna, izay efa nanana demonia, ary efa ela izy no tsy nitafy lamba sady
tsy nitoetra tao an-trano, fa teny amin'ny fasana.
28 Fa nony nahita
an'i Jesosy izy, dia niantso mafy sady niankohoka teo anatrehany ka niteny
tamin'ny feo mahery hoe: Moa mifaninona akory Hianao, Jesosy,
Zanak'Andriamanitra Avo Indrindra ô? masina Hianao, aza mampijaly ahy.
29 Fa Izy nandidy ny fanahy maloto hivoaka tamin-dralehilahy. Fa efa nahazo azy ela izany; ary efa nafatotra tamin'ny gadra, na ny tànany, na ny